فوق هام السحب ( الشعر الشعبي) على متن القوافي

وين اودي شوق قلبي والوله
لوغديت بعيد عني ما اسمعك

تملك احساسي وفكري تشغله
ترحل طيوفك وفكري يجمعك

هاك قلبي هاك ليتك تقبله
خذ سنين العمر او خذني معك

انت تالي الحب عندي واوله
من يقول إني نسيتك يخدعك

.....

يدور الزمان ويثبتون الكبار اكبار
على معرفة وفعول وسلوم ومروه

مو كل من ناداك يستاهل المشوار
ولا كل من خاواك يستاهل الخوه

.....

‏بعض البشر لو كل عمرك تراعيه
غلطه وحيده تهدم اللي بنيته

لاشاف شيءٍ مايوده ويرضيه
ينسى جميع اللي بذلت وعطيته

.....

‏نتعب علي الطيب والايام ملحوقه
واللي يقدر غيابك يحفظ اسبابك

الصاحب اللي رزين وعذب منطوقه
احفظ حضوره مثل مايحفظ اغيابك

.....

ان جهلت الخوف خاف مْن الأمان
‏وان بغيت تدل ضيّع وبتدل

‏والمكان اللي ماتلقى به مكان
‏بدله لاتدور لعزك بدل

‏ولا تعجل كل خافي له اوآن
‏مهما يخفيه الستار بينسدل

‏كم شيٍ شفته بحب وحنان
‏يوم عقلي فاق ماشفته عدل

.....

النفس لولا القناعة ماعسفناها
اللي لجل عزها قامت قيامتنا

كم حاجةٍ ودنا فيها وعفناها
مهما غلت ماهي اغلى من كرامتنا

.....

الفقر والفرقى وقل التوافيق
تقضي على الرجال باول شبابه

شفها تراها دايمً فالمطاليق
لاجاك شفته ضايقً من ثيابه

يفطن له الي جرب العسر والضيق
والا الردي في غفلته مادرى به

.....

انا ليَا شفت وضع مايناسبني
اقفيت من غير لا أوضح ولا انوّه

......

عز الله ان الشدايد عندي اكبر فضيله
عرفت فيها جميع الناس هين وغالي

عرفت فيها النشاما والنفوس الذليله
كسبت منها رجال الجود وهل المعالي

ياعاشق المال كسب المال ماهو وسيله
انا الشرف والمروه والكرم راس مالي

.....

بعض المجالس مالنا فيه مقعاد
يصلح لهزلين الرجال وهمجها

ارفع مقام النفس عن كل نقاد
واترك عصاي اليا تبين عوجها

.....