فوق هام السحب ( الشعر الشعبي) على متن القوافي

والله لوتسعى من الشرق للغرب
يالعبد مالك كود شيٍ كتب لك

هاذي هي الدنيا بها الضيق والكرب
كم واحدٍ فيها شكى الهم قبلك

تابع طريق المصطفى واسلك الدرب
ولاينقطع من عروة الدين حبلك

واحذر عدوك جاهده واعلن الحرب
شيطانك اللي بالمكايد نصب لك

.....

صحيح بين الناس فرق وتفاوت
من خلقة الدنيا ليوم القيامه

مثل الأصابع تختلف ماتساوت
واللي يقوله ماكذب في كلامه

ناسٍ على فعل المراجل تخاوت
وناسٍ عسى منهم تشوف السلامه

وكم راح بالدنيا عروشٍ تهاوت
ويبقى بها المؤمن رفيعٍ مقامه


.....

هات الكلام الصح وابعد عن الكذب
ترى الكلام الزين للنفس راحه

مثل القراح اللي من المنبّع العذْب
وخير الكلام اللي يجي به صراحه

ولاخير في قولٍ به السب والشّذْب
اللي نهانا عنه دين السماحه

وياطيب رجلٍ في كلامه مؤدّبْ
من يسْتَمع قوله يزود أنشراحه

.....

تغنيك عن لذّة الدنيا وأهلها ثلاث
الستر والعافيه والسمعه الطيّبه

بقلمي

يامعطي النفس بالعصيان رغبتها
ماتستحي من إلهٍ يعلم أسرارك

دنياك فتنه ولا دامت بلذتها
وأحذر تمادى على المحذور بإصرارك

غيّر من النفس للأحسان عادتها
وأصدق بتوبه وربك يقبل أعذارك

وأجعل أمورك لرب البيت وجهتها
سبحان من هو خلقك ويعلم أقدارك

.....

مادري علام الناس ماتترك الناس
تدخلوا حتى بخاف النوايا

هذا يقول افلان ماعنده أحساس
وهذا يقول فلان راعي خطايا

كلام فاضي مايثبّتْ على ساس
ماغير هرجٍ فيه كذب وحكايا

واقول بعض الهرج مافيه نوماس
مايقبله رجلٍ كريم السجايا

.....

مايذبح الرجال غير الحسايف
ليا ذكر له فرصةٍ وقتها فات

يصير في صدره عليها لهايف
وده على ترجيعها مار هيهات

ياليت عرفي يوم ركبي نكايف
قد صار عندي يوم ركبي مغيرات

والا الحسايف عقب صدرت عايف
صيحة خلا يفرح بها كل شمات

.....

ياصاحبي منته عن الناس مسؤول
ولا انته بلا حاكم ولأنته بقاضي

الناس يبن الناس صاحي ومبدول
ومشاكل العالم طوالٍ عراضي

اللي يبي نفسه سنافي ومقبول
لابد يستخدم نضام التغاضي

لو مانجامل كل فاضي ومشغول
صرنانشوف إن كل مشغول فاضي

.....

اليوم لاتبدي ظروفك على الغير
حتى الرفيق اللي من اول حزامك

الناس لاشافوا عليك اي تقصير
البعض يتحاشون ردة سلامك

عنّز على اللي يرزق النمل والطير
يدري بحالك قبل تنطق كلامك


.....

إذا كسرتك ظروفك والدهر خانك
فالله هو الواحد القادر على جبرك

إذا تقدم عطاه بيفحص إيمانك
وإذ تأخر عطاه بيختبر صبرك

لاتشكي الحال حتى لقرب اخوانك
الناس ياصاحبي ماهم على خبرك

ابشر ليا مت يجتمعون من شانك
واتلى العهد فيك لاحطوك في قبرك

.....