فوق هام السحب ( الشعر الشعبي) على متن القوافي

من شرفة الشبّاك روفي وطلّي
واحيي الزمن والارض باللّي عليها
َ
ترى اصعب اللحظات في عمري اللي
تمرّ وانتي ماتمرّين فيها

......

لج قلبي لج خلف ٍعلى عدٍ عطاش
فوق جال الوقر ولاعلى جلهت حرض

فوح صدري فوح قدرٍ على الفاهين طاش
عدة الضوء المصالي وصبره منقبض

عيني اللي دمعها كل ماونيت جاش
كنّ وسط أصبيها مس عودٍ معترض

.....

‏ترا الوداع اللي مع غيبة الشمس
‏مايذبح الّا صادقين المشاعر

‏لاصار ليلٍ مقبل وخاطرٍ عمس
‏حتى لو انّك حيد بتصير شاعر

.....

‏والله إنّي ماهقيت اللي حصل لي منّك
‏وإنّك أخر واحد أخافه يخيّب ظنّي

‏جعل يسقى وقتنا اللي فيه كنت أظنّك
‏عادك أغلا من يشاف وغاية المتمنّي

.....

والله لو ان القصايد تنظم فوق جيد
لا انظم لها من بيوت الشعر سلسالها

من حقها لاتباهت فـي بيوت القصيد
منيف كاتب لها والعذب غنى لها

.....

وجهها نور بدرٍ عن ظلامه يزوح
ومبسم وسطه اللي تلمع صفوفها

النحر عن حدود الثوب مثل الصبوح
وصدرها معتلي من فوق سرجوفها

ياقوامٍ يهيض مبعدين الشبوح
الهواء لاكفخ عن مطرح ردوفها

تشبه الخيل عند الغطرسه والجموح
لاعرضت من تبخترها ومن نوفها

.....

غالي ولك كل الغلا وانت مسموح
لو طال بُعدك وامتلا قلبي جراح

بُعدك عذاب اتعب القلب والروح
وقُربك يريح القلب والروح ترتاح

غلاك ماهو هرج ولاكذب ومزوح
غلاك مثل النجم بالشوق قد لاح

.....

لولاك ماقمت اتردد على نجد
تزود في صدك وازود انتظاري

في ليلةٍ قمرا وباطرافها برد
شفني على خط الرفيعه وساري

.....

‏الجو له شغل بالاحساس
‏هالشي انا مجربه والله

‏في الغيم اسامح جميع الناس
‏وفي العج ادوّر على الزله

.....

‏مرحبابك في محلك ورى ملقى الضلوع
‏في مكان مابه احد بوسطه خاشرك

‏انت لو واصلتني من اسبوع الى اسبوع
‏دارين وشهي ظروفك وقلبي عاذرك

.....