فوق هام السحب ( الشعر الشعبي) على متن القوافي

‏اصبِر ولا تبدِي على الناس خافيك
‏كم ليلةٍ من عقب ضيق انفراجه

‏لو تجتمع كل البشر ماتداويك
‏لاتحتري لك من ورى الناس حاجه

‏ارفع يديك لخالق الكون يعطيك
‏عذْب القراح اللي ينسّي هماجه

‏خلّك قوّي عزوم لو فيك مافيك
‏واصبِر على ميل الزمن وانعواجه

.....

القلب بيتك والغلا ورد وزهور
‏يفوح عطر الشوق لحظة مرورك

.....

الصمت أجمل أحاسيس الغلا ذوق
‏وأحلى كلام الحب شعر وخواطر

‏وان مارتوينا من غمام المطر شوق
‏لابد من وقت به الشوق ماطر

.....

ماكتبت الشعر من شان الاعجاب
‏احروف شعري كلها نبض واحساس

‏اكتب غزل اكتب حزن اكتب اعتاب
‏واحساس قلبي دوم للشعر مقياس

.....

‏جعلنا اللي كل ماشافو الدنيا تميل
استعانو بالصبر واستعانو بالصلاة

بقلمي

الحياه مغامره والتضحيه مسموحه
حاجةً تخلف طريقك للصعود اخسرها

الفرص ماتترك الابواب لك مفتوحه
كان ماعندك مفاتيح القفول اكسرها

.....

الصبر زين وراعي الصبر ماجور
ولابد لليل الظليم انبلاجه

لولا عزايمنا لها فالزمن دور
ماشفت واحدنا تنهّض حجاجه

اضحك وخلّك دايم الدوم مسرور
محدٍ يبا ياخذ من الـوقت حاجه

ماقِدمك الا بيت فالقاع محفور
ثم عقبها بتواجه اللي تواجه

.....

‏مع الأيام بعض قلوبنا دارت
أنا خوفي على قلبي من سنيني

كثير أشياء كنت أحبّها صارت
تمرّ العين ماتملى نظر عيني

.....

‏نمشي على بيض النوايا والاسباب
لاهمنا المقفي ولا من جفانا

لانسأل الواشي عن العيب لاعاب
ولا ننشد اللي خاننا في قفانا

بعض الصداقه مثلها مثل الاسراب
تغري نظرنا وقت لحظه ظمانا

وإن جيتهم ظميان صارولنا اغراب
حتى قريب الناس ماعاد لفانا

.....

‏ياليت لي قدره على طيّ الأيام
وأقدر أعيد سنين وأقدّم سنين

ودي أنام الحين وأصحى قبل عام
العام كان أجمل بواجد من الحين

.....