فوق هام السحب ( الشعر الشعبي) على متن القوافي

أتحضّن القاف كل ماهاجسي هبّك
ضرير قلب وهواك مْبعثر أوراقي

تمر غيمة حنين ولا وقف صبّك
وتعكر الجو قبل تعكر أخلاقي

فرقاك حتّم علي أعيش متلبّك
بيديك طوق النجاة وسبة إغراقي

أن مايهمك ضياعي خاف من ربك
ثملٍ بليّاك ماني بحاجة الساقي

دفعت سبعة سنين بطاولة حبك
وبخششت نادل غلاك بعمري الباقي

.....

تدور الخرايط كلها والأراضي السبع
‏يمرونك اغلبهم وشرواي مامَرك

‏من اللي يشوف بوحدته فيك عزوه ربع
‏و من يزهد بخير البشر في رجا شرك

‏تدابير بقعا تفرز الناس سبع وضبع
‏أذا ابكاك حظكَ عندي تشوف ماسرك

‏يموتون ما لاثوا صفا طيبين النبع
‏انا اللي ولو يقدر على الضّر ماضرك

‏مابين الاوادم مايعوض طبوعي طبع
‏لو ان الشكل تلقى بقاياه في صورك

.....

ماتربينا على ترك الرفيق
وما تعودنا على سب الخوي

بالجبال السود نفتح له طريق
ونلوي ذراع الليالي له لوي

.....

كرامة النفس أعظم من مشاعرها
من عز نفسه لقي فالناس مقداره

بقلمي

يالخاطر اللي تجي وتروح حسب المزاج
إن رحت في داعة الله وارحب ان كنت جيت

إن رحت قلبي عليك يحس بالإنزعاج
ماكني إلا على جمرٍ توّقد وطيت

.....

مسائك سعاده غامره ياحبيب الروح
مسائك زهور وعطور وبخور ووناسه

معاك المساء يحلا عليك العطور تفوح
بقربك يذوب احساس شاعر بإحساسه

.....

‏تعيش وتموت ماشفت الخطا مني
أرقى عن الهون وأخلاقي بعد ترقى

لاعاد ترسل مراسيلك وتحزنّي
من يبغي القرب مايلمّح على الفرقى

.....

‏العاشق أحيان ضيقة خاطره ماتطاق
وجوارحه عن تفاصيل الحزن ماحكت

يسهب حديثه ليا من سولفوا ع الفراق
وان سولفوا عن مواصيل الحبايب سكت

.....

كان القمر مسؤول عن خطف الأنظار
انته ترى المسؤول عن خطف روحي

أن زان لي وصلك تحديت الاخطار
وإن شح بي وصلك تهدم صروحي

.....

سقف الطموحات في الأحباب لاترفعه
عشان ماتنصدم في شخص يتجاهلك

خلّك لنفسك وقلبك إحذر تْضيّعه
والله مافيه أحد هالوقت يستاهلك

.....