فوق هام السحب ( الشعر الشعبي) على متن القوافي

‏دريت إن المحبه وقفت من يوم جرّ خطاه
‏ودريت إن كبدي بتبطي من الفرقا ولا ارتاحت

‏ياكم مره نويت انساه لكن مستحيل انساه
‏هو اللي وسّم ضلوعي هو الرسام والناحت

‏صحيح إن الجفا طوّل ولكن حشمه لذكراه
‏بقلطها ليا مرّت وأودعها ليا راحت

.....

‏تقوّي ترى الخاطر لهالحين باقي فيه
‏تعابير وجهك قاطعتني وأنا توّي

‏تزبر دموعك في محاجر عيونك ليه
‏أوآسيك والا أجرحك والا وش أسوي

.....

فمان الله ياغلى من خذلني يوم انا شاريه
‏عجز قلبي لاينسى الي يحبه رغم خذلانه

‏بيذكرني لاشاف ان الليالي تحاول تبكيه
‏بيذكرني لاحس انه غريب اشتاق لوطانه

‏انا ذاك المكان الي سكنته واترعرع فيه
‏تشوفه من بعيد وصعب تاصل صوب بيبانه

.....

‏طهارة وجهك الراضي كأنه منخلق من لين
‏سحابٍ يروي احساسي طهر ويلملم شتاتي

‏ذخرتك للشقى صدرٍ يكفيني عن الباقين
‏وذخرتك للمدى هقوه تشتت كل ضيقاتي

‏انا ياضحكة سنين الزمان وكل علمٍ زين
‏تركت الناس متعمد وعليك اسوق هقواتي

.....

‏صاحبي ياناس يا إللي فوق يا الوزن الثقيل
‏لدّ النظر فالعالم إللي ماتبلّ حلوقها

‏وشلون أبرّر موقفي وأجزا كثيرك بالقليل
‏وأنا يديني في فم الحيّه ورجلي فوقها

.....

‏تفاصيل وجهك جعل بعض الوجيه فداه
‏هي اللي ماخلّت للنجاه أحتماليّه

‏أنا أضيع دونك وأسهر الليل من مبداه
‏مثل ضيعة الجاهل الى غاب واليّه

.....

من متى كانت أجابتنا على قد السؤال
‏ومن متى كانت سوالفنا سوالف باردة

‏ومن متى الوعد يتأجل ويتأجل الأتصال
‏ومن متى قلبي فأمانك والهجوس أطارده

‏ومن متى كلمة أحبك يوم كامل ماتقال
‏ومن متى أسولف على عينك وعينك شاردة

.....

‏تجمعنا بعد سطو الفراق وسيفه البتار
‏كأني بليلة عتمه ضواها وجهك بنوره

‏تعالي لي أنا ما أحتاج من بعد الغياب أعذار
‏وزلاتك قبل لا أسمعك معفيه ومغفوره

‏تهادي في كنف صدر على حبك أبد مابار
‏وضمي بسمة بعدك لها عامين مكسوره

.....

ياسبحان من خلاني أدورك والقاك
‏وأشوف أبسط حقوقي معاك أكبر أحلامي

‏لاتستغرب إن بعت الوجيه وشريت رضاك
‏وأنا مرخص ليومٍ معك جملة أيامي

‏تمثنّى فجوج القلب وأسلى وسّج خطاك
‏على عين حاسد ضحكتي لك ولوّامي

.....

‏سامحني انا وقلبي سهرنا الليل وأغتبناك
‏وتسامرنا بحكي واجد لعلّ الدمع كفاره

‏ضحكنا من مواقفنا سكتنا شوي وعاتبناك
‏ياليت ان البداية سجن مانطلع من أسواره

‏تصارحنا انا وياه من اللي ماقدر ينساك
‏وطاح القلب من عيني وانا طايح من أنظاره

.....