فوق هام السحب ( الشعر الشعبي) على متن القوافي

ماقد شغفني هـوى وشعور قلبي وليد
تحت عيوني تمر العالم بدون أسم

إلا أنت واسمك مربع في عيون القصيد
كنك على راحة أحساسي تؤدي القسم

.....

لبيه لبيه ياصوتٍ يناديني
لبيه من بدة اقاصين والداني

لبيه لبيه من قلبي ملاييني
لبيه لبيه ثم لبيه بلساني

ماهوب لبيه ياصوت المزاييني
لبيه ياصوت ابوي يوم ناداني

كفي لك فراش ولحافك هدب عيني
مادمت انا حي تامرني وتنهاني

.....

‏لك وحشة تلفني شوق وعتاب
وإن جيت تسكني حنان وطرابه

علمتني إن الوفا طبع الاحباب
ورسمت عمري وردتين وسحابة

خذني لوجودك ضمني بين الاهداب
عمري بدونك ما اتحمل عذابه

......

المحبة من الله والغلا والقبول
‏لاتكلّف شعورك فوق مايُحتمل

‏لاصفالك زمانك قول اللي تقول
‏ولا تكدر مزاجك حاصره بالامل

.....

‏عينك بعيني يابعد خافقي قل
‏ياللّي هوى العشّاق منّك تعلّم

‏كان إلتزمت الصمت والله ما أمّل
‏مثل القمر نهواه لو ماتكلّم

.....

ياللي شريت البعد ماغاب طاريك
حتى لو أن البعد سوى سواته

كن الطيوف تقول وش حال غاليك
وأقول راح ومابقى إلا غلاته

.....

‏لبيه يامن عطاني صادق احساسه
‏واسقاني البن الاشقر من معاميله

‏اي والله اعشق لماه وطيب انفاسه
‏واعشق مشاريب كيفي من فناجيله

.....

‏مابيننا غير شاشه في تعاملنا
مع بعض لكن نفرض بيننا الاحترام

من طاب طبنا معه وان مال ماملنا
نبقى على الطيب والهقوه ونهج الكرام

.....

‏بعض الجروح تطيب لو هي اليمه
والبعض الاخر طال همه مع دواه

والحب له بين المخاليق قيمه
وقليل من يعرف حقوقه ومعناه

.....

‏لاطاحت دموع عينك واغرقت خدك
لاتحتري الناس ترحمها وتمسحها

ماكل من يسألك يغليك ويودك
اكثرهم يجيك يسأل ويش طيحها

.....