اخترنا لكم

‏يغويني الليل لا خيم عليه السكون
ويصير للحزن صوت وللفكر دندنه

البارحه وين ودتني عليك الظنون
وانا احسب اني تجاوزت الهوى من سنه

يغلبني الشوق وتفضفض عليه العيون
وانا بشر والاوادم ما هي بمحصنه

الذاكره عيت تخونك انا كيف اخون
فالعمر حاجات واجد ماهي بممكنه

.....

ياقاطعين الغلا والوصل والاهتمام
ماظن بقلوبكم شيًّ يسمى وفاء

الناس لولا الوفاء والود الاحترام
ماحد عرف قيمة الوافي وراع الجفاء

.....

تصدّ القلوب من الغلا والنفوس تملّ
يهون الجفا لا شافت النفس ما تكره

تغلّى بكيفك لو تصير المحبه غِلّ
لكن لا تساوم من يحبك على قدره

.....

من عقب ما كانت الأيام تجمعنا
ما كنت متصور أنك تبتعدي عني

شكراً على كل حاجه ما لها معنى
وآسف على الأهتمام اللي بدر مني

.....

ياللي تبون الجديد وتجهلون الظروف
الوقت ماله مدا والشغل ماله مدا

الساحه تشوف بعيون القناعه واشوف
المبدع اليا ابهر الساحه واهلها هدا

ولا القصايد كثيره والفرص ما تطوف
ما دام للطير حوم وللسباع امعدا

نقدر نقول البيوت اللي ترد العيوف
ونقدر نفول البيوت اللي ترد العدا

.....

ياشعور البرد ياذكرى الحبايب
كان عندك حل للعشاق هـاته

مكتفي بجروح صده واللهايب
في خفوقاً مانسى لذة غلاته

.....

طواري غرامه لو يموت الغلا تحييه
تحرك شعور القلب وتجدد احزانه

مع انه جرحني والله اني مازلت اغليه
واحبه ولا ادري ويش احبه على شانه

.....

‏ماتساوى الروس في عز النفوس
‏فرق شاسع بالمكانه والقدر
‏
‏فيه روس تنحني قدام روس
‏وفيه روس شامخه عز وفخر

.....

‏الصمت صوت الصبور اللي بلاه الكلام
‏والصد عين الحليم اللي يقود العما

‏من يبغى يعيش بالدنيا رفيع المقام
‏لا شاف بالارض غبنه يرتفع للسما

.....

لو تموت المحبه ماتموت الطيوف
دآم طبع الطيوف أوفى من اصحابهـا

.....