فوق هام السحب ( الشعر الشعبي) على متن القوافي

‏جيتك من الحب شاعر وأنت جمهوره
‏ماتقبل الفكره إلا من مخيلته

‏يرسم جمالك قصيد وتصعب الصوره
‏ومن لاتخيّل جمالك عاد مشكلته

.....

‏ياللي تقول ان الغلا ياسع اثنين
‏مخطي سواءً جاهل او كنت جاحد

‏مايجتمع في جوف الانسان قلبين
‏هو قلب واحد ياخذه بس واحد

.....

تعلمت السهر بعدك وانا قبلك رفيق النوم
‏ولا جاب السهر طيفك ولا عوّد علي نومي

.....

‏حتى ولو دونك مسافه لاتشك إنك بعيد
‏مافيه روحٍ جسمها ماهو يباري ظلها

.....

‏عطني يدينك وانثر الليل مجدول
‏خلّه يطير أسراب ويعوّد أسراب

‏واضحك وفرّق جمرتينك عن اللول
‏بفتح لك سموعي قبل ما أفتح الباب

.....

‏ياما وقفت بوجه الأيام ماطحت
‏وياما وثقت بناس والناس طاحو

‏مشيت يالدنيا وتعلمت وارتحت
‏اهل المصالح لاخذوا شي راحو

.....

خلّ عندك فالاوادم نظرة واحتياط
‏لاتكبّر هقوتك بالضعوف وتنصدم

.....

‏حنا الوفي من صافي الود نسقيه
‏ومن زادنا بالطيب حنا نزيده

‏واللي طرانا ساعة الضيق نطريه
‏ونكون عونه بالظروف الشديده

‏نغليه والله راعي الجود نغليه
‏ونصون قدره لو دياره بعيده

.....

‏لك مساء مني وناداك الخفوق
‏بالمحبه قلب يهديك السلام

‏وانت ذوقك غير فايق كل ذوق
‏لك محبه وسط قلبي واحترام

.....

‏المال في جيب الكفو عابر سبيل
‏إليا جلس يومين في جيبه رحل
‏
‏لكن لامن طاح في جيب البخيل
‏يقضي حياته كلها راعي محل

.....