فوق هام السحب ( الشعر الشعبي) على متن القوافي

‏ماهو بكيفك تأخذ القلب وتروح
‏أما تجي وإلا مع القلب خذني

‏في غيبتك كني جسد مابها روح
‏وعن نقص حالي كل واحد نشدني

.....

ياشين طعم الصبر لاصرت مجبور
تصبر ولا تدري وش الايام تعطيك

.....

‏عقب البطا ماني بقايل تاخرتي
‏ياما من الشوق كنت اصنع لك الحروة
‏
‏يامرحبا ياهلا بك عد ماغرتي
‏من غاويات القصيد وطاري النّسوة
‏
‏تتغير الناس وانتي ماتغيرتي
‏للحين وجهك جميل وبسمتك حلوة

.....

مشتاق لك يابو العيون الكحيلات
مشتاق لك والشوق فيني زياده

ياسيدة كل البنات الجميلات
ياراحة احساسي وكل السعاده

فيك الحلا قد فاق كل الاميرات
يادنيت العاشق وغايت مراده

ليتك معي في جانبي كل لحظات
والراس جنب الراس فوق الوساده

واقطف لش الازهار والورد باقات
ياوجبة المغرم وشربه وزاده

.....

بنت الاصول من البنات الاصيلات
وهاجوسها بالشعر يطلق زناده

باشعارها الفـنان ينغم بشيلات
شيلات لضايق تسلي فؤاده

كلمات ع الواقع عتاب وحزينات
للجرح هن مثل الدواء في العياده

.....

بالامس كان الورد بالقلب مزروع
واليوم قد قلبي عبوات والغام

صار الهوى والحب والشـوق ممنوع
واصبح عذابي بين الآلم وارغام

ما أسعد اللي من لضى الشوق موجوع
وما اتعس اللي من جمود الاسى نام

جمر الهوى اللي كنت الاقيه مفزوع
ليته يعاودني ولو عبر الاحلام

اشتقت نار الشوق والقلب مفجوع
تقضي على ليل المخاوف والاوهام

اليوم الاول كانت الساعه اسبوع
واليوم هذا صارت الثانيه عام

أين انت يامن كنت لي عز موضوع
وباختصر عمري معك بعضـه ايام

.....

على البال ياللي كل مامرّني طاريك
‏بدت كل تنهيدة تمارس هوايتها

‏إذا الحب ماكفّاك مدري وش يكفّيك
‏الاحلام ما اخذت من وجودك كفايتها

‏وإذا الذكريات ولهفة الشوق ماتعنيك
‏لاتنسى الجروح اللي تعيش برعايتها

‏عسى الأمنيات اللي توجّد على ماضيك
‏يسخّر لها الله من يقوم بعنايتها

‏عيونٍ غوت من بعد فقدك وش يدرّيك
‏لعلّك تكون انت السبب في هدايتها

‏أنا لو ينسّيك الزمن ماني بناسيك
‏محبتك قصة ما اقدر أكتب نهايتها

لو الوقت يرجع قبل اعرفك وقبل اجيك
‏وقبل الهقاوي تنثني دون غايتها

‏باروح أنتظر فأول مكانٍ جمعني فيك
‏وبآعيد تجربتي معك من بدايتها

.....

أثر الغلا لازاد عن حدّه أنباع
‏مثل الدفى لازاد يصبح حريقه

.....

‏ياطير في عالي سماك ايش الاخبار
هل من خبر ياطير للي عشقته

ذاك الذي له داخل القلب مقدار
بالله هل ناظرت زوله وشفته

لامر لك قله انا حيل منهار
من كثر غيباته ترى العيش عفته

وقله انا عايش بدونه على نار
وخايف اموت بيوم ماقد نظرته

.....

‏ياخِل فيني شوق ماحل بإنسان
ياخِل احس الروح ماهي بروحي

ياخِل حبي في سما حُبك ادمان
ياخِل داويني وداوي جروحي

يشهد عليا من خلق كل الاكوان
الواحد اللي يعلم اسرار روحي

إني احبك حُب ماحبه انسان
حبً من الاعماق ياروح روحي

.....