فوق هام السحب ( الشعر الشعبي) على متن القوافي

‏ماتبيني وإن هدى بالك تبيني
‏بين قسوة بردك وسطوة عجاجك

‏يوم تكرهني ويوم تموت فيني
‏لامتى وأنا تحت رحمة مزاجك

.....

تبسمي واخذي من احساسي يقين
‏الحزن مايصلح على وجهك ابد

‏الله خلق وجهك يسرّ الناظرين
‏حتى لو ان الله خلقنا في كبد

.....

‏اشرب قبل تقفي عليك المشارب
‏ما للحسايف فالمقابيل راحه

‏السم دايم في ذيول العقارب
‏والحر دايم رفعته من جناحه

‏لاتعطي الدنيا استراحة محارب
‏حارب ترى الدنيا ما فيها استراحه

.....

‏خذتك الهبايب ثم بك جاتني تختال
‏يابو ضحكةٍ كنها من البرق مخطوفه

‏عطاك الله المعطي سوالف وحلو قبال
‏وزين وجناب وخاطرٍ سمح ومروفه

‏وصوتٍ ليا سولفت كنّه مافيه حبال
‏تحلف انه اوتار وتقاسيم معزوفه

.....

‏على وجهي تباريح السهر تاخذ لها مقعاد
‏تربّع في حنايا ضحكتي وتجدد الآمي

.....

الحقوق اللي على الرجْل مافيها عَفو
‏مايكفّر في خطاها صيام ولا فدي

‏لايغرّك ضحكة أهل السنون ليا صفو
‏ماهي بدايم سلامات وبِساط أحمدي

‏والله إن اللي يعاديك ويشوفك كفو
‏أبرك من اللي يجاملْك ويشوفك ردي

.....

خاو الرجال اللي مراجلها تزود
‏وكبْ الرجال اللي مراجلها سلف

‏بعض البشر ودك تعشيها قعود
‏وبعض البشر ودك تعشيها علف

.....

يملكني المعروف بالذات لا صار
‏ماهوب لعيون الرياجيل مكشوف

‏ياحّبني للي معاريفه اسرار
‏مهما بذل معروف ماهوب معروف

.....

دورة الايام مافيها جميل ولا مجامل
‏كان ماقويت عزمك جاتك بعزم ورهاوه

‏الحياة الصامله ماتبغي الا قلب صامل
‏والظروف القاسيه ماتمشي الا بالقساوه

......

‏وجهك صباح الحلم شمسٍ على بحر
‏وفي طلتك كل يوم خايف توارى

‏تشبه عبير الحب لاهب من نحر
‏لفحت غنج مغروره بين العذارى

.....