اخترنا لكم

‏المحبه فالصدور اللي تحب ولا تغيّر
‏فطرة ما يعرفون اسرارها جيل الاضافه⁩

.....

جيتك آسمّعك الكلام اللي تبيه
جيت أودِع الذكرى القديمة فاللحد

خل الكلام الحاد والراي الوجيه
يمكن يكون الاعتراف أقسى واحد

ما كنت وجه وبس من ضمن الوجيه
إنسان عاهدني على شي وجحد

أنت الشعور اللي ما قد حسيت فيه
وأنت الكلام اللي ما قد قلته لاحد

.....

شبيه الورد لاشفتك أحس أني أصير بخير
‏معاك أحس بان الحب له شكل وطعم ثاني

‏انا مدري وش أعبر ليامن خون التعبير
‏يفوق الوصف تعبيري ليا تأتأت بلساني

‏أشوفك غير بعيوني وباقي هالأوادم غير
‏كأنك شي بلحالك خلقهه الله على شاني

.....

‏حب نفسك لا ترقّب رجعة الماضي القريب
‏انت فيك النور ما ينضب لو انك ما تراه

‏شمسك اللي تحتريها تجلي الليل الكئيب
‏اشرقت في قلب ثاني واستقرت في سماه

.....

‏على حر انتظاراتك قتلني جداً التهميش
‏وأنا أدري لو يزيد البعد قربك ماني بحوله

‏عجزت أعيش رغم إنك على بعدي قدرت تعيش
‏رحلت وكانت الاحزان بعدك شبه مسؤوله

‏ويروح الليل مابين السؤال اللي يردد ليش
‏علام الورد ما ينبت مدام الارض مبلوله

.....

‏فقدتك وأدور لك من ايّام واحاتيك
وغربت غيابك زودّت غربتي غربه

امر الدروب اللي تمرك وأفكر فيك
مثل ما يفكر ضايع الدرب في دربه

.....

فقدتك وقلبي من الفرقا يقول
‏ما عاد للدنيا بعد فقدك حلا

‏ياليتها شده مع الوقت وتزول
‏واقول همٍ فالمحاني وانجلا

‏ولكنها صارت في ذاكرتي تجول
‏والبال من كثر الطواري ماسلا

‏فقدت صوتك والرحابه والقبول
‏والإبتسامه والرضا والمسهلا

.....

‏وش يفيد الشوق لو مايكسي قلوب العرايا
‏وش يفيد النور لو ينقاد للعين الضريره

‏انتي اسمى من هوى النزوه واعزّ من الحمايا
‏في عيون الفارس اللي سلّ سيفه من جفيرة

‏وان ظفرت بقبلةٍ من ثغر معسول الشفايا
‏ليه لا وانا الكبير اللي طموحاته كبيره

.....

‏حتى ايش لو تجحد طموحاتي وتجحد قيمتي
‏انا وريث اللي سروا من الارض وامسوا فالسما

‏لا شحّ قاعي من نبات الارض هلّت ديمتي
‏واخضوضرت جدب الاراض وكل متهالك نما

‏إن عشت عشت بشيمتي وإن مت مت بشيمتي
‏مانيب شارب ماء وجهي لو اموت من الضما

.....

يصبرني على ثقل الليال إن الأمل ما زال
‏ينسيني شقى النفس ويضوي لي متاهاتي

‏أغيب بلا سبب وبلا سبب يربكني الترحال
‏واعود للمكان إللي يضم أربع تجاهاتي

‏مع إني هادي وجه وحكي لو ضاقت الاحوال
‏يجي هذا الحزن صخب ويلازم فكرة أبياتي

.....