فوق هام السحب ( الشعر الشعبي) على متن القوافي

ياصاحبي اللي مغير لي حياتي
‏انت في عمري مثل نقطة تحول
‏
‏فيك احس الصبح له تأثير ذاتي
‏وكل صبح يمرني احلى من اول

.....

الرزق بيبانه تشرعها ملايكة الصباح
‏لو يدري النايم برزقه نومته ماعادها

‏الادمي لو يعتبر بالطير خفاق الجناح
‏ماشال هم مصارع الدنيا وهم جهادها

.....

الكنز كنز القناعة والغنى في القلوب
‏ماني بغابط هل الدنيا وعشاقها

‏الفقر ياصاحبي ماهوب فقر الجيوب
‏الفقر فقر العقول وقلة اخلاقها

.....

لاتحسب ان الوقت لاشان مازان
‏ولا تحسب انك بتعدى نصيبك

‏الارزاق مكتوبه وللدّهر عوان
‏واللي كتبه الله عليك بيصيبك

.....

رزق البشر لاتعلق فيه تفكيرك
‏لو تقنع براس مال العافيه ترضى

‏ان كان ربك منعك اللي عطى غيرك
‏اكرمك بالنعمه اللي تنقص المرضى

.....

‏أنت وحدك تستفزّ الصمّت وتردّ الطواري
‏ماقدرت ألدّ لك تقدير وإلا أصدّ شيمة

‏ماعليّ من الجفاف إن طالت يدينه دياري
‏وين مالدّيت أشوفك نوض بَرق ووبل غيمة

.....

‏عداك الملام وشرهة الولف يانزّاح
‏عن دياري اللي منت بأول خسايرها

‏تبعت السراب الين سلّمك للمرواح
‏ولدّيت وعيونك تزوّر عبايرها

‏قنعت وتركتك للزمن والزمن فضاح
‏على مهله اسرار المخاليق يظهرها

‏بقى لك معي ذكرى ليا غمّض المرتاح
‏تمشّط بقايا كبدي بروس اظافرها

.....

‏لاستانس الخافق ذكر من يحبه
‏ورجع يراجع فى الوناسات مافات
‏
‏يامرتع القلب الحزين ومربّه
‏يزين بك مثل الذهب صدر الابيات
‏
‏هيهات ينسى القلب شخصٍ يحبه
‏وهيهات يدله خاطري منك هيهات
‏
‏ونبع الغلا عندك وعندي مصبه
‏ومن الوله في خافقي لك ولايات

.....

‏ان رفضت العذر مالي سوى الاربع حروف
‏وان قبلته قلت ماخاب حسن الظن فيك

‏ياكثر ما اجمّر الحلم واحطب الشفوف
‏يوم احاتي رجفة البرد لاتسكن يديك

‏قبل تغريك الليالي وتاخذك الظروف
‏كنت ابيك ويمضي العمر ولَا زلت ابيك

‏انت عيش اللي بقى لك من الدنيا عيوف
‏ولا انا ياميتٍ منْك ياميت عليك

.....

تنفس الصبح جعل الخير يقبل به
‏بامر العزيز الكريم المعطي المانع

‏الي لقيت السعد والخير في قربه
‏وانا بما يكتبه ربي علي قانع

.....