ديوان الأمير بدر بن عبدالمحسن

ليلة شديد الرمل جتنا ركايب
من الشمال وبركت بين الأيام

طوي التراب وشل فوق النجايب
والجو ثارت به معاصير وعسام

علمي بوجهك فـ اسود العج غايب
والريح تدفعني وانا ما لي اقدام

لولا الشجر شدت غصونه نهايب
جلدي وثوبك قلت انا وانت الاوهام

لا خيمة لا طنب لا صوت شايب
لا صرخة لا طفل لا كحل وزمام

طاح الرواق وطاح حلم الحبايب
لا ناي في روحي غدت روحي حطام

ما غيرها ضلوعي في صدري حطايب
وشم الجروح اللي بكبدي من العام

إن كان ذا قبري فـ ابي له نصايب
قبر الورق خلوا شواهده الاقلام

يامعمر الدنيا عمارك خرايب
ما حدٍ ورث جدرانها غير الأيام

العمر شدة والليالي ركايب
والرمل يمحي الرمل والموت قدام


البدر

يا بنت أنا للشمس في جلدي حروق
وعلى سموم القيظ تزهر حياتي

أطرد سراب اللال في مرتع النوق
ومن الظما يجرح لساني لهاتي

عاري جسد والليل هتّان وبروق
دفاي أنا والبرد سمل العباتي

إن عذربوني بعض خلانك صدوق
يا بنت أنا عشق الخلا من صفاتي

وشمٍ على رمال( المتاييه) مدقوق
لاشك من منهم يسوي سواتي

أنا بدوي ثوبي علىالمتن مشقوق
ومثل الجبال السمر صبري ثباتي

ومثل النخيل خلقت أنا و هامتي فوق
ما عتدت أنا احني قامتي إلا فصلاتي

وإلى إفتخر بأفعال يمناه مخلوق
يا بنت انا فعلي شهوده اعداتي

الله خلقني وكلمة الحق بوفوق
وملكت الأرض وراس مالي عاصاتي


البدر

المشاركة الأصلية كتبت بواسطة حسن بن عبدالله

أخي العزيز الحمدان
شكرا لك على هذه التواجد الفعال
والمشاركات النافعه والمفيده
فبارك الله فيك وجزاك الله خير

أخي الغالي ابو تركي
أشكرك جزيل الشكر لتعقيبك الرائع والمميز
لك مني أجمل تحيه وتقدير لاعدمتك

... المعذره ماشفت رسالتك الا الان
ارجو ان تقبل اعتذاري
والاجواد عذاره

أتعب على المعنى ويسهرني القاف
ويلذ لي تجريح عذب القوافي

وإلى مزج حبر القلم دم الأطراف
يصير لي معنى على الناس خافي

عندي معاني الشعر تلمس وتنشاف
أنما جرحك الشعر ما هو ب كافي

وان ما لمس في القلب .. احساس وشغاف
عدّك كتبته فوق رمل السوافي

لاتحسب ان البحر موج ومجداف
ترى قليل البحر ما كان طافي


البدر

وتِرحَل ..
صَرخَتي تِذبَل

في وادي ..
لا صدى يوصل

ولا باقي أنين
زمان الصمت ..

يا عُمر الحُزن والشكوى
يا خطوة ما غدت تقوى

على الخطوة ... على هم السنين
حبيبي .. كتبت اسمك على صوتي

كتبته .. في جدار الوقت
على لون السما الهادي

على الوادي ..
على موتي ... وميلادي

حبيبي .. لو أيادي الصمت
خذتني ... لو ملتني ليل

أنا عمري .. انتظاري لك
لا تحرمني .. حياتي لك


البدر

قال السراب وقلت ظامي لسرابه
قال الهلاك وقلت لعيون الاحباب

يا لايمي في حب مترف شبابه
الموت حق ولاتبرق بالاسباب

كانه ذبحني صاحبي من عذابه
ماابي لدمي يا هل اللوم طلاب

الجادل اللي فيه زين ومهابه
يفز له قلبٍ .. وتخضع له أرقاب

في حجر عينة لي غدير وسحابه
وفي وسط قلبي له تناهيت وعتاب

إن قلت أحبه يكفي القلب مابه
وان قلت أنا مابيه ..باصير كذاب


البدر

وليله كانت الفرقا
و قالت لي فـ أمان الله

و ليله ذكرها يبقى
على جرحي .. و لا انساه

و جت تاخذ رسايلها
و خصله من جدايلها

و تديني جواباتي
بقايا عمر بسماتي

و قالت لي .. فـ أمان الله
و ليله زي ذي الليله

و هبتك في الأمل عمري
و يا ليت البسمه ما كانت ولا الاحساس

وياليت الدنيا خانتني و كل الناس
و لا خنتي هواي انتي

و لا قلتي .. فـ أمان الله
لا تردين الرسايل ويش اسوي بالورق

لو تركتيني في ليله بسمتك عند الرحيل
دمعة العين الكحيله عذرها الواهي دليل

و ليله كانت الفرقا
و قالت لي فـ امان الله

و ليله كانت الفرقا
و قالت لي فـ امان الله


البدر

لو كان في كفي رميته في كفك
يفداك مافي الحب من صادق الحب

تحبنّي؟..ياعلّني بعض ضعفك
قلبي جرادٍ باد ما حصّل العشب

أنا قديم الهم وأنفع لعطفك
أما الهوى ياسيدي مركبه صعب

يا ليت لي صهوة جوادٍ وأخطفك
للشمس لنجوم المجرات.. للشهب

تحبني..وأقول من زود لطفك
شكراً صدقت .. وألف شكراً على الكذب


البدر

يا الله لا تقطع رجا كل مشتاق
بامرك يا رب الحلم يصبح حقيقه

وأنا أدري أن الوصل تاليه لفراق
ولولا الأمل .. ما تحمل النفس ضيقه

أمس سرى في تالي الليل براق
قلبي يفز لنوضته بتخفيقه

وسمٍ بكور صادق الوبل دفاق
لو شافه الظميان يبتل ريقه

عله على دار الوفا .. دار الأشواق
دار صفت لأهل القلوب الرقيقه

فارقتهم ما ليلةٍ خاطري ضاق
واليوم للسلوان ما أجد طريقه

يا كود حرفٍ لي كتبته بالأوراق
مثل السراب اللي يسلي بريقه

والله لو كل المخاليق عشاق
ما شفت لك نفسٍ تعذب دقيقه


البدر

أول اليوم عانقت الشفق
وآخر اليوم عانقني شفق

وأنا بين التلاقي والفراق
أدفن العمر وأحفر لي نفق

يا حبيبي وأنا مثلك غريب
عن حمى النوم غربني أرق

اقطع الليل لديار النهار
واغسل الدمع من شط العرق

ولا جمعني بك الموعد لمحت
ألف نجمٍ توهج .. واحترق

أجمل العمر طفلٍ من غلاه
قمت أضمه لصدري واختنق

وباقي العمر لو عمره يطول
ما يجي سطر في ذهن الورق

من بقول اللقا غير الوداع
بينهم فرق واجد ما صدق

أول اليوم عانقت الشفق
وآخر اليوم عانقني شفق


البدر