فوق هام السحب ( الشعر الشعبي) على متن القوافي

ما يغش المسلمين الا دموع الظالم
لابسٍ بشت الإمام وفي الذنوب مفلّي

يدّعي بالحق ويصادر حقوق العالم
يعرف شروط الصلاة ولا يعرف يصلّي


خالد بن مدعث

ياللي تنشد عن جديدات الاخبار
الوقت خذ له بالرجاجيل فره

شريم جاله برطم وولع النار
وكليب خلا شبة النار مره


محمد المقحم

اللي يصوّر ضيفته في السنابات
ويقولشوفوني تراني مضيّف

والله ما اعده من اهل الجمالات
والكل يدري انه سخيف وضعيّف

و اللي يحب البهرجه والفلاشات
كلٍ يعرف إنّه (......)مصيّف


ابوسامي

ياصاحبي وش مزعجك من مديحي
يعني ليا ذموني العالم ارتحت

تقلط على هيلي وهبات ريحي
وعلى ارحب لياجيت وابقه ليا رحت

مالك شبيه الا قرون الوضيحي
الله خلقها فوق وفعولها تحت

ياماكثر اللي ودهم في مطيحي
لكن لاطاحت عزومي ولاطحت


سالم جخير

مسا الخير ياجمل ذكريات ولقا وايام
معى كل نفحة عطر تطري ملامحها

عـرضها شريط الذاكره عرضة الافلام
على بـالي اللي صار جمهور مسرحها

دخل جوها اللي عاشبه رحلة استجمام
عسى الله يسامحها عسى الله يسامحها

لها دمعة ًبالعين تصعب على السوام
ولها زفرتن باقصى المعاليق تشرحها

.....

يبى يمر الفقر من بيت الغناه
ويبى يمر الجرم من باب العفو

أمّا لقيت الحظ يكسر لك حصاه
ولّا لقيت اللي حكوا لك ما وفوا

.....

لاتقرب الغيبه تراها نشايب
تنشبك في العالم وتلقى العقوبه

وش تستفيد اذا تقفيت غايب
ياخذ حسناتك وتاخذ ذنوبه


ناصر ثويني

يا دار الاحباب كلن له من اسمه نصيب
وانا نصيبي من البيبان مقفولها

غربت نفسي بنفسي لين صرت الغريب
الي عجز ياصل الديره وهو حولها

احتاج لاطيب خوي واحتاج لافضل حبيب
لين الغلا والهموم يقل مفعولها

ياصاحب الخاطر المكسور خلك قريب
عندي قصيده حزينه يمكن اقولها


خالد مبارك

اكثر اللي ضيّق اخلاقي وفوّر دمّي
موقفٍ يوم القيامة ماحسبت حسابه

مقدر اعطي حسنةٍ وحدة لبويه وامّي
واعطي اللي كنت ماحبّه وكنت اغتابه


مسلط الحميدي

عن ضيقة الخاطر وعن شين الاخلاق
كم موجعه توجع لكنها تعدّا

وقّف ولو ماتوقف الا على ساق
ولا ترجي رخوم العــرب واتفدّا

المشكله ماهيب في ضيق الارزاق
وماهيب في مـن طاب والا تردّا

المشكله لا اشتقت للي مايشتاق
هذي هي اللي توجع القلب جدّا


مهدي سميطان