فوق هام السحب ( الشعر الشعبي) على متن القوافي

الردي لامن خدمته وموضوعه كبير
لا هو بذاكر جميلك ويمكن يجحده

والسنافي لو خدمته وموضوعه صغير
شفت معروفك يبّين على ولد ولده


عبدالله دليهي

انا ادري ان العمر ماراح يجمعنا
غضّي النظر عن علاقتنا وطاريها

بضحك على كل باكر مالها معنى
وابكي على كل أحبك ما نطقتيها


.....

أخس نوع من الخلايق ثلاثه
يالله عساهم للفناء لايزيدون

أولهم اللي فيه ثقل وغثاثه
ومسويٍ حاله على العالم يمون

والثاني اللي ما يخلي الخباثه
ويمثل إنه بالشرف خيرة الكون

والثالث اللي فيه مثل الغلاثه
على خفايا الناس واللي يسوون


يوسف العضياني

سولف وحاول ما تكثّر سوالفك
الهرج مفتاح الصدور المقافيل

اما يحطك في مكانٍ يشرفك
والا يحطك مضحكة للرياجيل


وصل العطياني

ماني مغني كل ماغنوا الناس
بعض القصايد بنت عم الفضيحة

أما تجيني فكرةٍ تقعد الراس
والا أستريح وتستريح القريحة


وصل العطياني

أنا رجل يعرف وش له وش عليه
والا ماعندي بشنب أطلق شنب

ماتحركني حركات السّفيه
لابهت والا ظلم والا كذب

الذكي يسمع هل الرأي الوجيه
والغبي مع قل عرفه قل أدب

فيه نقص اللي يشوف الزود فيه
والعرب ماهم سوا وعلى حسب


عبدالله علوش

‏عسى لنا مع مقاديم العرب خانه
ومن حظوة اهل التردّي مالنا حظوه

احد ٍ نخلي مشاغلنا على شانه
واحد مانجلس معه حتى على الفضوه


سلطان بن بتلاء

ماهو دليل الاسم بفعول الاجواد
احذر تقارن بالاسامي شريحه

احيان شخص اسمه يخلّد للاحفاد
واحيان للمترديه والنطيحه


احمد السليس

دون الخوي والله إني ماني بناطر
الضيقه اللي بصدره ما يدرجها

عمز وتاقى رفيقن يبهج الخاطر
يصادم الروس لين الله يفرجها


محمد بن شافي

يا أهل المصالح مالكم عندنا شي
نعرف خوافيكم ونعرف خطاكم

لو نكشف الاوراق ونزيد بالكي
نلقى العجاج اللي يلوث سماكم


محمد بن شافي