فوق هام السحب ( الشعر الشعبي) على متن القوافي

دقت الساعه على مَوعد لقاك
والعيون من الفرح يرثى لها

من كثر ما خَافقي عَاشر غلاك
ضَم كل طيوفك وغنى لها

.....

كبدي اللي من الايام فيها وفيها
كنها حدر جمر وكنها فوق مله

البشر ماهي بتنباع لجل اشتريها
وانا ماعفت احد من رخص ولا ممْله

عزة النفس تمنع من تربى عليها
وانا قلبي ماقلت اخذه ولا قلت خله

الحقيقه بتسمعها ولو ماتبيها
انتهى كل شي وربي وربك الله

.....

أنتي اللي تستحقين مالا تملكين
‏من كنوز الارض ومن الحفاوه والرحاب

‏والله إنك يوم تمشين بين العابرين
‏ودي إن الارض تحتك ذهب ماهي تراب

.....

‏ألا ياقلب لا تشره عليه ولي متى غيره
‏يغيب براحته خلّه يروح بعالم النسيان

‏كفاك تدوّر أعذار لغيابه فضّها سيره
‏تماديت بغلاه ومن تمادى بالغلا خسران

‏يقولون القمر لاغاب يضوي له على ديره
‏وانا أقول الحبيب ان غاب يضوي له على خلّان

.....

‏لا يهمّك طالع الذكريات بنص عين
‏واحرق صورّي ليا مرّك البرد وتدفّ

‏سهله تعيش الليالي وفي صدرك حنين
‏بس صعب تعيشها وانت ماعندك هدف

‏ما نويت اطاوع العقل لو انّه رزين
‏انت غالي بسّ الايام ملعونة جدف

‏رغم حوم الشك حولي بقى عندي يقين
‏لو تفرّقنا الليالي بتجمعنا الصدف

.....

عن البال ما راحت طواريك لجل تعود
مثل كل ليلة طيش مرَّت على تايب

طبيعي بان الناس تستشعر الموجود
وأنا أستشعرك موجود وأستشعرك غايب

.....

اعذارك الواجد كنها فلوس الحرام
مهما بلغ كثرها والله مافيها بركه

.....

مما قيّل في بيت المحبُوب :

- فهد الشهراني يقول :
أمرّ بيتك وأقبّل بابه وسوره
وأتعجّب انك سكنتيه وسكنتيني

- ابن مشيط يقول :
والقلب بيتك وحدك وأنت في حدّك
مايسكنه غيرك ولا رخصته إلا لك

- ابن فطيس يقول :
وأمر بيتك من بعيد ولا أجيه
وأنا لو أنه في يدي ما تعداه

- محمد السلطان يقول :
كيف أمرّك وأنت خابرني تحت شجْرَتك باقي
أنت بيتك ياحبيبي ماتَركْتِه لأجل أمرَّه

‏حمرة شفاياها مناقع زعفران
‏أبطت مراويح السحاب تكدها

‏عينٍ رهاويه وعنقٍ صولجان
‏وزينٍ يخلي كل عين تودها

‏عجايب الدنيا لا سبع ولا ثمان
‏ثنتين في يمنى ويسرى خدها

.....

ياصاحبي والضيق متولج الجاش
باين على وجهي من الضيق أدله

ماكني الا ضايع الفكر منداش
ودرب السنع عيت عيوني تدله

.....