اخترنا لكم

‏العز هيبة والشرف يرفع الراس
والكذب سلعة مالها أي قيمة

والبيت مايبنى على غير مقياس
لابد توضع له قواعد سليمة

خذلك من الدنيا تجارب مع الناس
واسلك دروب أهل العقول الحكيمة

واعلم بأن الناس آلاف الاجناس
والعيب يجلب لك عواقب وخيمة‎

.....

‏ياسعود قل للي نسـوني وانا حيّ
ماني بحاجة دمعهم بعد ماموت

ماتـشعر الجثـه ولا تـدري بشـيّ
واهل المقابر مايحسون بالصوت

متـع عيـونك دامها تبصر الضـيّ
مايـنـفع النـدمان لافـاتـه الـفوت

ماصفحه الا ّوتـالـيـتها هو الطـيّ
والغانمه تبقى بعد سـاعة الموت

.....

النفوس الوافيه رغم المصاعب ماتميل
والسما كثر السحب مايغطي نورها

الوافي لأجل الوفا مايذله مستحيل
والثقه بالنفس حصن القلوب وسورها

.....

النار والعود والفنجال والدلة
‏يطري على جالها ⁧هاجوسي الطاري

‏ذكرتك بخير وأنت الخير كفو له
‏يامقدم الأولة من طبعك الضـــاري

.....

ياللي توصيني على الصبر وينه
وتقول حد الصبر لو يلحق أقصاه

الصبر مفتاح الفرج خابرينه
لكن مفتاح الصبر وين نلقاه

.....

ماني من اللي يطرد انسان ناسيه
ولاني من اللي لاجفيته تجيبه

انا من الي لا حشمته وتغليه
يرخص لك الغالي وتصبح حبيبه

انا عزيز النفس ياهيه ياهيه
ضاري على الفرقا ولاهي غريبه

من باعني بعته ولاني بشاريه
وترى المحبه ماتجي بالغصبيه

.....

التماس العذر للطيّب كرامه
اتركو لاصحابكم مخرج طواري

.....

خل البشر تذكرك بالخير والطيب
‏السمعه الزينه رصيد وغنيمة

‏ان جيت تلقى المسهلا والتراحيب
‏وان غبت تمدحك النفوس الكريمة

.....

‏ِ
‏هنا يا وسيع العــرف مال الأمور قياس
‏نبــــي نرضــــي الاذواق لكـن تحملنا

‏ترى احيان نكتب مايحسون فيه الناس
‏ولا كــــل ما نكـتبــــه دايــــم يمثلنا

.....

اعذرنـــي اليا قلت ماني بموجود
‏في ســاعة فيهـــا الموالي محايد

‏وقت السعه مافيه شرهه ومنقود
‏اشــره عليّ لا غبت وقت الشدايد

.....