فوق هام السحب ( الشعر الشعبي) على متن القوافي

ليا نصاك اللي يبي منك مطلوب
‏تراه قبل يجيك بالطيب هاقي

‏خلك على الهقوة ولا تقلب الثوب
‏اثبت له ان الطيب لازال باقي

.....

‏ماعلى الدنيا مقيم ولا على الدنيا مخلّد
‏اغتنم فرصة حياتك بالصلاه وبالعباده

.....

الفقر ماهو عيب يامدور العيب
العيب زود النفس ولا الظليمه

كم واحـد فقير راعي مواجيب
وافي ولـه عنـد المطاليق قيمه

.....

من رافق قوم الرجاجيل كسبان
ومن رافق الهبلان يحيف حيفه

الحر ما يرضى مهونه وحقران
والذيب مايسري على عشان جيفه

.....

متسّيده وسط القلوبُ النظيفات
شيخه وبنت شيوخ عفا حشيمة

مانيّ من اللي يلتفت للتفاهات
أنا على روس العذارى عظيمة

.....

احنا طبايعنا في السلم عقال
لكن ترونا في الوازم مجانين

رجال مافينا سوى كل رجال
يسوى من العربان وحده ثمانين

بالعز قهويني من الموت فنجال
عليه ربوني نشامى ميامين

.....

عزيز النفس مايرضى المهونه
ولو نفسه على الحاجه تلزّه

تشوف العز يقدح من عيونه
وميلات الليالي ماتهزّه

.....

خل في صـدرك على الدنيا قبول
واعرف ان الشمس تشرق لو تغيب

وعوّد لسانك ليا ضاقت يقول
الأماني في رجى الله ماتخيب

.....

يالله ياللي فزعتك تكشف الضيق
في بحر عفوك ماتضيق المراسي

انا فوجهك من قليل التوافيق
ومن موقفٍ مايرتفع فيه راسي

.....

‏لاتشيل همك لين بكــره وبعـدين
عـين الله بكــل الخــــلايق بصــيره

واعـرف مصـير الوقت لاشــان بيزين
ومصيـر ضيقـات الخـواطـر قصيـره

ماتــدري الله كاتـب الخيــر لك ويـن
احيـان تكـره شـي ويصـير خيـره

.....