فوق هام السحب ( الشعر الشعبي) على متن القوافي

نكابر ونتحمل ونصبر أمام الناس
ومن شافنا نضحك أمامه ونتبسم

يقول والله ان قلوبهم مابها إحساس
وما يدري ان جروحنا مالها بلسم

....

بعيد من التصنع والتكلف والكلام الجاف
‏أقول اللي يجول بخاطري وأترجم شعوري

‏عرفت إن الشعور أعمق وأجل من الوزن والقاف
‏ولقيت إن صوت صدري مايشابه صوت حنجوري

‏تركت اللي يمرّه فالظلام الساري الحوّاف
‏وأخذت من النهار اللي كشف وجه الثرى نوري

‏تبـيّن جرتي بالوادي الموسوم والمشراف
‏معا سرب الطيور العابره ماطارت طيوري

‏ماني بمدوّر اللي يسمع بذكره ولاينشاف
‏ولاني واقفٍ في موقعٍ مايعرف حضوري

‏ورى وجه الكتاب اللي تشوفونه بدون غلاف
‏ربيع الجنة الخضرا عسل سدر وزهر جوري

‏لو بوّصف المشاعر جايز التبذير والأسراف
‏ولا من حقي أكنز جوهرة عمري وبلوري

‏كتبت أطراف صوتي في طريق العاشق الميلاف
‏وقدمت لمجاريح الليال البارده شوري

‏ورى الألقاب والنور الصناعي مارسمت أهداف
‏مع إني قد نحت صخور نجد براس باكوري

‏ولايخذلني اللي لاكتبني يكتب إسمي حاف
‏ولايزعلني اللي في طريقي طوّفوا دوري

‏ماني محتاج للتصفيق والتعليق والإنصاف
‏وأنا أحس الليالي والنجوم البيض جمهوري

.....

من كثر ماعامل الناس بحسن نيہ
مااشك في خيرها ولااتقي شرها

ليت الصدور وضمايرها زجاجيہ
واعرف نوايا البشر من قبل اعاشرها

.....

حبي وحبك نادر في زمانه
‏على الوفاء والصدق جاني هديه

‏عهد الوفا بيني وبينك أمانه
‏وتفداك روحي يوم روحك نديه

.....

من نفسك إصنع لذاتك حشمه وقيمه
‏صنيعة الناس لا ودّت ولا جابت

بقلمي

‏افا وشلون تجفاني وتتركني طريح الشوق
‏افا ماهزتك ذكرى ولا حنيت يالغالي

‏أحبك كثر ماهليت دمعٍ مامسكها الموق
‏أحبك حُب ما عمره لفى في بالك وبالي

.....

على درب التعارف والوفاء والود والصحبه
قوانين الصداقه والصحب والمعرفه نوعين

الاول فسل تبقى صحبته طول الزمن نكبه
والاخر ساعة الشده بيدك سيف ابوحدين

.....

يالله يامعطي العطايا مراديف
‏ياللي ماتلحق مد جودك بمنّه

‏ترزقني الخيره وزين التصاريف
‏ورضاك يوم رضاك مفتاح جنّه

بقلمي

ذكّرتني يا حبيبي مانسيت
ومـا نسيـته ولا ذكّـرتـنـي

لامت فيني ولانابك حييت
ولا جمـعـتك ولا بعثـرتني

ولا تكلّـفت تلقـاني وجيت
ولا لقــيـتـك ولا دوّرتـني

رضيت بالهم وانا مارضيت
لا كنت عبدك ولا حررتني

يجوز ماخُنت لكن ماوفيت
وكم نصحتك ولا عَـبّرتني

ابقـاني الله وانـته لا بقـيت
غرّيت نفسك وما غرّيتني

لقيت مثلك ومثلي لا لقيت
قلّـه عشقـتك ومـا قـدرّتني

.....

يبدو بأن الصباح اليوم بيكون غير
المعطيات تشير الأن إلى ذالك

بداية الخير تبدأ من صباح الخير
ياراعي الخير جعل الخير من فالك

.....