ديوان قصائد لشعراء المملكة العربية السعودية (متجدد)☘️☘️

قصيدة قلبي نهبته
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
1,557 مشاهدة

يا قاتلي من غير ذنب جنيته

الله يبيحك لو توطيت بدماي

والله لمشي لك على ما بغيته

يللي من أجل ارضاك ترخص مناياي

لو انت تطلبني فؤادي عطيته

بلا ثمن يا مورد الخد برضاي

شرفك عن عيب ينوشه حميته

وذنبك بقتلي والرضا منك مداي

القلب من بين الضماير خذيته

واصبح مقره خالياً من حناياي

قلبي نهبته عنوة ما شريته

وصفقت باليمنى على كف يسراي

ان جيت ارده بالحشا ما قويته

يبي حماك وفر من داخل حماي

واللي عذلني عن غرامك عصيته

على طريقك تسرع الرجل بخطاي

إلى عذل صديت عنه ونهيته

لو هو قري بوغالياً من دناياي

ومعرفوك اللي نالني ما نسيته

وانت الوحيد وغاية القلب ومناي

وانت الذي خافي ضميري كويته

وانت الذي تعلم بسري ومنهاي

وانت الذي زرع بقلبي سقيته

ونور بشكات الزهر عقب الذواي

وكتب على قلبي كتبته قريته

اسمك وترجمته على القلب بسماي

ووعدك لو انه بليل نصيته

نورك بحندس مظلم الليل قمراي

الى ذكرته شاح قلبي وجيته

لو هو يسيل الدم من سبت ماطاي

ارضاك في غالي حياتي فديته

وارخصت غال الروح برضاي وهداي

اتبع رضاك وكل حي جفيته

وامشي بشفك لو عتب كل حكاي

إلى طرا لي عنقك اللي لويته

اغيب باحلام السعاده بدنياي

على رحيق اشفاك قلبي غذيته

وقطفت ورد من شفاياك بشفاي

ورد على خدك برمشك حميته

بهداب عكش ضللن عقب الغضاي

لولاك مرقاب العنا ما رقيته

وجاوبت مفجوع الحمايم بنجواي

رجم على راس الطويله بنيته

اجيه واعلى طية منه مركاي

اهيض اللي في ضميري كميته

وطلال لو ناديت ما يسمع انداي

لو انه ابو بندر قريب نخيته

ان كان يفزع لي على كود بلواي

هو الذي من بد ربعه رجيته

وعز الله انه عارف غيب شكواي

قصيدة لولا الهرم والفقر والثالث الموت
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
1,234 مشاهدة

لولا الهرم والفقر والثالث الموت

يالا دمي بالكون ياعظم شانك

سخرت ذرات الهوى تنقل الصوت

وخليتها اطوع من تحرك بنانك

جماد تكلمها وهي وسط تابوت

تاخذ وتعطي ماصدر من بيانك

وعزمت من فوق القمر تبني بيوت

من يقهرك لو هو طويل زمانك

لولا الثلاث وشان من قدر القوت

نفذت كل اللي يقوله لسانك

قصيدة سلمى تقول ان الموده غرابيل
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
1,035 مشاهدة

سلمى تقول ان الموده غرابيل

وانا على سلمى عليل الضماير

سلمى تقول الحب ويلٍ بثر ويل

وانا حشاي بجاير الحب فاير

وسلمى لها بقصى الضماير مداهيل

وعندي لسلمى بالموده سراير

اسأل عليها كل ما يقبل الليل

والصبح اوصي يمها كل طاير

الحب في قلبي صبغ صبغة النيل

بين المحاني صايب الحب جاير

وياما توجَّد والضماير مغاليل

وياما على سلمى عطيت البشاير

طفلٍ سلب عقلي بسودٍ مضاليل

منها قلوب اهل الموده عثاير

ورموش سودٍ ما تكحل من الميل

سواه خلاق البحر والجزاير

دارٍ لسلمى ما تجيها المراسيل

دارٍ لقلبي في حماها ذخاير

ارسل لها من ناحلات المراميل

ما يصلنه ناقلات المجاير

اطلب لها من رايح المزن بالسيل

منه الزبيدي نابتٍ بالمحاير

قصيدة سود الليالي
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
952 مشاهدة

الله على وقت مضى فات يا حسين

وعزى لمن بيض العذارى كونه

يا حسين وين اللي بشوفه يسلين

اللي جعلته للضماير مضنه

عليه من بعد النيا تذرف العين

والقلب ونات الحشا يوجعنه

سود الليالي تلحق البين بالبين

وما بيضنه بالموده محنه

العام عام الود عام المحبين

لو فيه نيران على القلب جنه

واليوم اهل مضنون عيني بعيدين

وسود الليالي عن دياري حدنه

الله لحد ما فيه حي يعزين

وعلى زمان فات جريت ونه

والحقتها تسعين ونه وتسعين

من عقب ما هي بالحشا مستكنه

ونات من هو طاح بين المثارين

خيل تعدنه وخيل وطنه

فرسان ربع عن مطيحه مقفين

وفرسان ضده شاهرين الاسنه

من فوق قب كنهن الشياهين

في حومة الميدان تشاوحنه

بغا المنير وجوهل الخيل عجلين

والخيل اعاقن نيته واعجلنه

وطبو عليه وسدو الدين بالدين

والخيل فوقه كظمن بالاعنه

قصيدة انا من نجد يكفيني هواها
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
893 مشاهدة

أنا من نجد يكفيني هواها

ويبري لوعتي شربي لماها

وشوفي من نبيه ومن نوده

غزال تابع قلبي هواها

غزال ضيعت عقلي وروحي

رمت قلبي وقلبي مارماها

لها بالروح وفؤادي مودة

ولاشىء من احوالي خفاها

تعرف أني لها مملوك طايع

أبيع الروح في دورة رضاها

أهيم بحبها واخفي جروحي

وقلبي ماعشق زول سواها

توقد حبها باقصى فؤادي

ونار الحب يحرقني لظاها

ملكني بالهوا عذب السجايا

ولااذكر ساعة قلبي نساها

نحيل الخصر وضاح الثنايا

نظيم الدر منظوم بفاها

فجعني بالهوا ورقا حمامة

وعيني منه جاها ماكفاها

ورا دنياي عقبه لوعتني

من الفرقا تكر لي صفاها

قصيدة يا فزعة المظيوم
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
874 مشاهدة

يا مرحبا حييت يا عز الاقراب

واهلا بشوفك يا بعد كل غايب

اهلا عدد ما بان نجم وما غاب

وعداد ما تذرى نسيم الهبايب

يالليث يا بن الليث يا زاكي الانساب

حلال عسرات الامور الصعايب

يا فزعة لمظيوم ان كلح الناب

يالظاري الصاطي عطيب الضرايب

يا بن العديم اللي غلب كل غلاب

يا خو الشجاع اللي يحل النشايب

يالنادر اللي من قنص فيك ما خاب

خطك طويل الياهبا كل هايب

يالوايلي يالتغلبي عز الاصحاب

ما ذكر فيكم ها في الاصل عايب

يالفيصلي يا ستر غضات الاشناب

ان نابهن في بعض الأيام نايب

ياللي لهن في ساعة الضيق جلباب

ستر لهن عن حاميات اللهايب

ياللي معاديكم على دار الاجناب

تشهد لكم قب الرمك والنجايب

ياللي لكم في منبر المجد محراب

نلتوه من عقب الكدر والمصايب

نلتو رفيع المجد بسيوف وحراب

وعدو انكم شافوا كثيرا الغلايب

بحزم ولطم فيه تقطيع الارقاب

وعزم جلاميد الصخر منه ذايب

وحرب مرير فيه تفتيل الاشناب

يقلب شعر راس الولد منه شايب

بعج ودخان تقاذفه الاطواب

مثل الرعد من مرزمات السحايب

والخيل تشكي صابها ذعر وهياب

وقلوب اهلها ما تمل الحرايب

يحدونها للموت لكد بالاعقاب

والخيل من ضرب المشوك حطايب

تقلى ضاديد المطاليق هراب

من لابة بالفعل سوو عجايب

بارماح بظهور المناعير نشاب

شلف مضاربها تفج الترايب

يشهد لهم بالطيب من وسط الاصلاب

والحي واللي حدر عوج النصايب

صفوة هل العوجا مهدين الاصعاب

تارد حياض الموت ورد الجلايب

يقودها فيصل وللخصم ضراب

بكف مضريها لجدع الضرايب

مفراص ماص للصعيبات عضاب

خلا خصيمه ضانع الفكر خايب

خلاه يشكي لدغة الناب بالداب

سم زعاف ماضي الفعل صايب

ناب صوابه ما تداويه الاطباب

من ناش ما قالو من السم طايب

اركي على كبده من الغبن مشهاب

وخلاه يجرع علقم الشرى رايب

فيصل لدين الله غدا ستر وحجاب

ولولاه راحو بالجزيرة نهايب

ناس تطيع ابليس في كل ما جاب

وعلى الشريعه من كبار العقايب

دجالة بالمكر والكذب نصاب

على الردي تمشي لعوج الطلايب

للملحدين كلاب واصحاب واذناب

عدوان من جاوب على ايوب تايب

تمت وصلى الله على سيد الاحباب

واهلا بشوفك يا بعد كل غايب

قصيدة اللي سباني بالهوى فارع الطول
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
872 مشاهدة

البارحه لكن بالعين سملول

والا الحماط مداخله شوك حاذي

اسهور وقلبي بالهواجيس مدهول

ويدق به من جاير الحب هاذي

يدك به حب تعظم لمجمول

اللي قسم مكنون عقلي فلاذي

ان قلت وان ما قلت وان كان أبقول

مالي سوى مضنون عيني ملاذي

افديه بالروح العزيزه وما نول

وعيوني الثنتين هاذي وهاذي

اشفق عليه وخاطري فيه مشغول

شوفه مرام النفس للروح عاذي

الللي سباني بالهوى فارع الطول

حي لنون العين دايم محاذي

ان غاب عني يصبح القلب مذهول

وعنده سبب موتي وعنده نقاذي

ان مت باسبابه فانا عز مقتول

ان رشي من فيض دمعه رذاذي

راع الهوى قلبه من الحب مشلول

يحس من جور الموده مواذي

لو حال من دونه صناديد وفحول

ما نيب عن مجمول الاوصاف جاذي

اجيه ما أسمع قول عاذل لمعذول

ما صن سمعي للعذول المهاذي

قصيدة اخترت بعد الدار عن قرب الانجاس
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
844 مشاهدة

قالوا وحيد وقلت ماعندي اوناس

وقالوا غريب وقلت بأرض بعيدة

ابعدت مابي شوف ناس من الناس

بعدت عن بعض الملا وتعديده

مطاوع قلبي على كل الأجناس

والبعد عن شوف المكاره يفيده

اخترت بعد الدار عن قرب الانجاس

عن دارهم نلقى ديار جديدة

في وسط نجد اتبع هوا كل نسناس

واطرب لشوف طيورها وتغريده

اعشق ليالي نجد لو انها ادماس

وايامها عندي جنان سعيدة

شمى لعشب رياضها يقعد الراس

ومافات من ساعات عمري بعيدة

شوف الزهر يبعد عنا كل هوجاس

ويريح عن قلب الشقا مايكيده

وحس الرعد في رايح المزن رجاس

دقات عود عند سمعي فريدة

وان قال لي بعض المخاليق لاباس

قلت الهضايم بالضماير مجيدة

الله من هم بالاضلاع غطاس

اقام وسط القلب وابطى شديدة

فكرت بالدنيا بتقدير واحساس

ولا جات لي الدنيا على مانريده

اللي نبى تقطعت عنه الارماس

وعنه اختفت كل العلوم الوكيدة

القلب يبغض كل غادر وبلاس

اللي يلطخ دم الاجواد بيده

واحب من يتعب على كل نوماس

ومن فيض جوده مايمد الزهيده

اللي ليا كادت والارياق يباس

يصبر على كود الامور الشديدة

وللنفس عن طرق المثاليم حباس

يتعب على كل العلوم الحميدة

واحب نجد وكل حبي على ساس

حب بقلبي له قصور مشيدة

عندي وعرها مع سهلها والاطعاس

غابات ورد في زهور نضيدة

برياضها محلا هدد كل قرناس

ان شاف حفان الحبارى يصيده

عدل المناكب لابرق الريش دواس

ماناش في مخلاب كفه يجيده

ياحلو هداته على الجول غلاس

ينحر كثيره ويتعدى الفريدة

اجرد عديم لهايش الخرب فراس

والطايرة لو ترتفع ما تكيده

ايام عجات الهدد كلها اوناس

ياحلو بالخد البياح تهديده

قصيدة مصايب الدنيا
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
825 مشاهدة

ليا صار جرحي بالفواد مصيب

ولا ادري متى جرح الفواد يطيب

على أي حال وين ابالقا طبيبه

وهو وسط خفاق الفواد عطيب

هني من لا شاف هم يظيمه

وعن الهموم القاسيات غريب

بعيد عن اللوعات ما ذاق كودها

مصايب وسط الفواد تصيب

مصايب الدنيا كفى الله شرها

الرأس منها يالفهيم يشيب

اليا عتت حمر الهموم وقادها

هاجوس فكري والضمير يجيب

تلقيتها بالعزم والعزم غايتي

وفتى بلا عزم تراه يخيب

فتى بلا عزم حياته مذله

والعزم لقلوب الرجال طبيب

ومن لا صبر ابلعسر ما ذاق يسرها

وباب الفرج للصابرين قريب

تذكرت خلان على الشاطئ الذي

على البحر الأحمر والخضم غضيب

يزيد بموجات تناثر له الحجر

اليا شافها قلب الشجاع يريب

تلاطم على الشاطي هواها يقودها

هذي مقابيل وذيك تغيب

تجيبها زفرات قلبي إلى أوجهت

كما اطواب حراب لقاه حريب

تذكرت يوم افكرت حي نوده

حبيب على قلب المريض حبيب

شجاع تعرض للعظايم بعزمه

مفراص ماص للحريب طليب

كبار العظايم بالعزايم يفلها

نجيب تسلسل من عروق نجيب

عديم تسلسل من مواريث

نادر عريب يورث من نماه عريب

سلطان حلال المشاكل بباسه

مصباح ظلما لمن دعاه يجيب

العزم يقصد من عزومه اليا هبت

رجال بحزات اللزوم تخيب

والطيب يوخذ من فعوله اليا جذت

عن الطيب شبان الرجال وشيب

الطيب يوخذ من مقره ومعدنه

ومرقى سنام الطايلات صعيب

ما يدرك الطولات من لا يرومها

بعزم وشوفات الجبان قريب

من عاش بالحقران ما نال مكرمه

وقصر بلا ساس تراه يعيب

ومن نام عن طلب المكارم وفعلها

ماله بكسب الطايلات نصيب

ومن قصرت يمناه عن كسب طايل

عديم الثنا للخاملات ربيب

ومن لا سقى ضده قراطيع مرها

زير النسا للغانيات لعيب

تشره على الطولات كسابة الثنا

ويقصر عن الطولات كل هليب

لقيت يا عوق العديم بن وايل

الطيب بين العالمين غريب

ولقيت يا عوق العديم بن مقرن

الحسد بين الاقربين جنيب

ولقيت يا عوق العديم ابن فيصل

رفيقك الأدنى عليك رقيب

ينقل خطياتك ويخفى فضايلك

وعلى فضح عوراتك يصير حسيب

عفا الله عن عين حريب لها الكرى

غدا دمعها الصافي يصيب صبيب

لاكن دموع العين من حجر موقها

سيل تحدر من فروع شعيب

على غالي عنا حجب دونه الثرى

وفرقاه ترث بالفواد لهيب

تجرعت من فرقاه ما يجرح الحشا

ولا أدري متى جرح الفواد يطيب

قصيدة انادم اللي رفقته ترفع الراس
الشاعر: محمد الأحمد السديري محمد الأحمد السديري
#العصر الحديث
#المملكة العربية السعودية
0
805 مشاهدة

ان جا ينادمني وضيع من الناس

صديت عنه وقلت منتب نديمي

ماهوب كبر وكل ناس لها اجناس

وعندي عزيز النفس دايم حشيمي

للكبر والله ما توشحت بلباس

بكتب التواضع ناجح بتعليمي

انادم اللي رفقته ترفع الرأس

وياقف معي دايم بوجه الخصيمي

ان كبرت القاله والارياق يباس

يظيم عدوانه ولا يستظيمي

وعندي ليا شفت المناعير جلاس

انا لهم بايات فكري كليمي

ولا قارب الخايب ولا كل بلاس

اللي على نقل النمايم فهيمي

نشدتني تقول بالقلب هوجاس

قلت أي نعم ما فيه حي سليمي

يابو محمد كن ما عندي اوناس

اليا خفق فكري بشيء عظيمي

اغيب كني وسط ظلمات الادماس

واناجي الرب العظيم الكريمي

اناجي الخلاق قطاف الانفاس

الواحد اللي فوق عرشه مقيمي

عز الله اني بالهواجيس غطاس

وعزي لمن هو في بحرهن يهيمي

يا بندر الجبرين يا معرب الساس

اخلصت لك حيثك نديم حليمي

العالم الله ما هرجنا بالادناس

والله بما يخفي فهيم حكيمي

ولادن في جلساتنا حافة الكاس

ولا نخوض بكل هرج ذميمي

واللي نوده قطعت عنه الارماس

ذكراه مثل احلام ليل بهيمي

وقت النضا قفا وقفن الافراس

وحتى زهور الورد صارت هشيمي

والنمر مخلد عقب ما هوب فراس

والبوم عقب الذل صبح عديمي

وديك الدجاج معلق فيه الاجراس

والصقر في صكات وقته سقيمي

وابو حقب حصل بالايام موماس

الحر غاب وصار عقبه زعيمي

وين الرجال مروية كل عباس

اهل المهار اللي تعط الرهيمي

اقفوا كما غيم تقفاه نسناس

ولا حدن بها الدنيا مقيم مديمي

كم اوحد في لجة العيب غطاس

يفوت عمره في ظلاله بهيمي

من الذهب لو هو خزن طرم الاكياس

جن من كريم وحرم منها اليتيمي