اخترنا لكم

‏من مفرق الوادي بعد هب الهوى
‏رفّت طوارف روحي وعيني سهت

‏وين استريح وغصني الاخضر ذوى
‏تجرّد من اوراقه وظلّه بهت

‏مالك دخل ياقلبي ومالك لوى
‏دعاني الشوق وطواريه اشرهت

‏اتركني ما بين الصبابه والجوى
‏لهّيت نفسي فالحياة ولا لهت

‏الذكريات اللي خلقناها سوى
‏حرام اسميها علاقه وانتهت

.....

‏كنت أظنّ العشق موطن يضمّ العاشقين
‏واكتشفت انه مسافات وحشه وأغتراب

‏لا افتحوا باب التواصل وهم متأملين
‏تفتح الدنيا على فراقهم سبعين باب

.....

من يحترم نفسه ويحفظ مباديه
‏ماحدٍ يقلل قيمته واحترامه

‏احدٍ كلامه للمهالك يوديه
‏واحدٍ يفك من المهالك كلامه

.....

فكرت بالدنيا واثر ما بها شي
‏مدري علام الناس تركض وراها

‏تتعاقب الاجيال فيھا وهى هي
‏جيلٍ ﯾودعها وجيلٍ لفاها

‏احدٍ اخذ حقه واخذ فوقه شوي
‏واحدٍ يموت وسكته ما بدأها

.....

لاطالت الخوة تبين العذاريب
‏وتعرف قراح البير وإلا هماجه

‏أبعد عن اللي لازعل ينكر الطيب
‏اللي تقلّب عشرته مع مزاجه

.....

‏حفظت لي بيت عجيبني معانيه
‏بيت عجيب وفيه فكرة عجيبه

‏كبر الخطأ ما كل عذر يغطيه
‏مثل التعازي ما ترد المصيبه

.....

مبطي من السجه ومن فل الحجاج
‏غديت مثل الي يدوّر له غرض

‏ادوّر وجيهٍ مقابلها علاج
‏ما ادوّر وجيهٍ مقابلها مرض

.....

‏ياعشير الروح والله مابدّل بك عشير
‏لو فقد وجهك جماله وعودك سكبته
‏
‏المحبه تدخل القلب مثل المستجير
‏سوّد الله وجه قلبٍ ما يثني ركبته
‏
‏لهفة الخاطر على شوفتك لهفة غرير
‏مستحيل يقاوم الشوق مهما يكبته
‏
‏من عشق مثلك ما فكّر يتوب ويستخير
‏لين يلقى من جراير حبيبه نكبته

.....

ياقلب العنا في كل حاجه تبي مسموح
‏لكن لاتطيع اللي يقولون لك طعنا

‏انت اللي يعاني لوعه الفقد والمجروح
‏وانا وانت عاشرنا وعشنا وودعنا

‏خلقنا بشر فينا مشاعر وصمت وبوح
‏لو ان الحيا في بعض الاحيان يمنعنا

‏من الكبت صارت عاريات الصدور تفوح
‏ومن خوفنا من نظرة المجتمع ضعنا

.....

‏حشمت نفسي عن سواليف الانذال
‏حتى مانزّل قيمتي في رداهم

‏اهل النميمه والحسد وأهل الاقوال
‏ماني مدور من زعلهم رضاهم

.....