ديوان قصائد لشعراء المملكة العربية السعودية (متجدد)☘️☘️

ما يقول الشعر
.
مايقول الشعر .. من باله خلي


ومن نساه الهم لايطري القصيد
ماكتبت الشعر قصدي تزعلي


وان فرحتي فيه ما اقصد اكيد
حس يشعرني .. وضيقة تنجلي


ودار تسكني وانا عنها بعيد
واوصف العله لعاشق مبتلي


لاكساه الليل يلقابي عضيد
لالفوك الغيد عني اسألي


تجري حروفي بهم مجري الوريد
من هوى هذاك وفلان وعلي


الوكاد انه عن اشعاري بعيد
عبد الرحمن بن مساعد

تحضنه


تحضنه لجل تضحك للي وراه

وماهمها لو شافها ..

غايته اسمى كثير من العتاب ومن الغضب

تحضنه وفي بالها .. ذاك اللى اعطاها الرقم

في ليلةٍ كان النهار .. فيها بقايا سكرته

وللأسف انه نسي يكتب لها .. كم غرفته

تحضنه وفي يدها ساعة ذهب

كان اشتراها لها البارحه

لجل تعرف كم مساحه غرفته


عبد الرحمن بن مساعد

قبلوا تراب الوطن


..

قبلوا تراب الوطن ... هذا الزمان أخضر

واشكروا مجزي النعم ... يزيدكم أكثر

كرامة ٍ عز ٍ وجود ... كثّروا لله السجود

وافرحوا بغيض الحسود ... واقهروه أكثر

من غيركم ... لاكبروا للحق

تلقاه قدام الصفوف

ومن غيركم ... خلىَ اللي في قلبه غدر

يسمع في ومض عيونكم ... حكي السيوف

من مثلكم ... قد ساعد الملهوف

من مثلكم ... ربي عطاه

ما مثلكم ... حفظتوا شرع الله

ومسجد رسول الله ...

وخدمتوا البيت العتيق

وما مثلكم ... الفعل يسبق قولكم

واللي معادي جمعكم ...

يعرف علو مقداركم

قبل الصديق ...

وإلهكم ....

وبيده التوفيق

قد زادكم ....

فيما عطاه


عبد الرحمن بن مساعد

العادة جرت


..

العادة جرت

كل طالب مجتهد دمه ثقيل

العادة جرت

كل مخلص في الهوى حظه قليل

العادة جرت

العطوف اللي كريمٍ في الجرايد

في الأزقة والحواري له عوايد .. يصبح القاسي البخيل

العادة جرت

جُل من يصبح ثري .. يكتب شعر

والقصائد تحتري اغلى سعر

الشعر اصبح مجلة .. جلها غث وهزيل

العادة جرت

لمّا نسافر كلنا في الصيف .. نمشي مخشبين

كلنا نحكي بفخامة .. نمشي بفخامة .. والابتسامة لما نسّلم

نبتسم كأن فيه مصورين

ورغم اننا نسافر لجل نلقى بعض .. ونعرف بعض

الا اننا لما انتقابل نلتفت متجهمين

ماهو جنون .. ولا عبط

تظهر أغاني من نمط .. أربع سنين انتطالع بالعيون

وفي المواعيد اللي ماادري منهو كان العبقري اللي عطاها

نجلس في نفس الاماكن .. ننتظر نفس الوجيه

تظهر بكامل بهاها

ويبتدي ذاك الحوار السرمدي:

شف هذاك شلون لابس .. ماهو صاحي

شف هذاك موجود في كل النواحي

شف هذيك شلون تضحك .. ياخزياه ياعيباه يالله

شف هذيك شلون تمشي .. شف هذاك شلون جالس

شف رفيقك .. ليش عابس؟؟ خل نروح ونسأله

لا انتظر هذا ماشي مع هله

وينتهي هذا الحوار السرمدي

فينا نقول: وش هالصخب .. هالديرة مليانه عرب!!

كأننا متفاجئين

ولما نرجع بالسلامة .. العادة جرت .. انا نكون متنكدين

ومافي سبب غير اننا ما كنا حنا

غير اننا لما نسافر .. دايم نكون ممثلين

ولجل نطلع من تقمص دورنا .. لما نرجع

نحتاج نقعد ناطرين أسابيع وأيام .. ونظهر من الانفصام

العادة جرت

انّا نجل الأجنبي .. ونقصي القريب

العادة جرت

انها الايام تمضي ومسجد الاقصى سليب

العادة جرت

كل ما جو الخليج صفي وراق

يبتدي العم سام .. عزف موال العراق

العادة جرت

كل ما اكتب قصيدة .. اوصف الواقع بها

القى جاهل ما اريده .. يعتقد انه لها

العادة جرت

كل ما اكتب يقيني أو ظنوني ..

يكاد المريب أن يقول خذوني


عبد الرحمن بن مساعد

المسمى


..

حسبي اللي انزل التوبة وعمّا كيف نحمل كلنا نفس المُسمّى

سيف قاطع في الوغى يغشى المنايا مثل سيف ظل في غمده ولمّا

حل وقت الغنم خذ مما يريده وسيفنا القاطع بقا له ما يرمّى

حسبي الله كيف كنّا كيف صرنا الأعادي تفوقنا كيفٍ وكمّا

وش يضر اللي كرهنا لو كرهنا وش يفيد اللي نحبه حب جمّا

هو بقابه ضيّ واهي نهتديبه هو بقابه خطب داهي ما ألمّا

يا مدوّر خير والشر متزاحم عزتيلك ابرةٍ هو وسط يمّى

لا تنادي وش تنادي من تنادي؟ كيف يوحي الصوت منهو كان اصمّى

يرحم الله وقت كان الخير شامل ما ترك من ورث يؤكل اكل لمّا

مير من يرجي من الانذال حاجة يستحق الخزي ويسام ويذمّى

ومن سعى بمعروف مع سقط الاراذل خاب في المسعى وزاد الغم غمّى

ايه ياوقت الرزايا والبلايا وقت شح الجود والبخل استعمّى

من يقيسك بالدقايق والثواني العقارب؟! وافق الاسم المُسمّى


عبد الرحمن بن مساعد

نحس


..

يوم الاثنين اغتنى .. وصار بين الاغنيا ترتيبه الثالث

يوم الثلاثاء الفجر .. مات في حادث

فريق كورة .. دائما ً ترتيبه في الدوري الاخير

واذا لعبوا واستبسلوا .. قبل الاخير

وبعد السنين الممحلة .. جاهم رئيس ثروته كثر التراب

عيّن مدير .. عنده من الخبرة كثير

شال الكبار ولعّب شباب

وجاب المدرب اللي له اسم ٍ مهاب

واتقدموا .. وصلوا للدور النهائي

ويوم النهائي .. قبل المباراة بدقايق

في البلد حصل انقلاب

مسكين .. شين وفقير

وفي الدراسة حاول انه يستمر .. ومااستطاع

وضعه صعب ..ابوه مات وهو صغير

وماترك له الا الفقر .. وامه واخته .. والهم من فوقه وتحته

ومالقى لجل الهروب من الضياع .. الا انه يدور وظيفة .. أي وظيفة

ولقى من ضيقته مخرج .. وظيفة دخلها معقول .. يمشّي الحال لو اعرج

ومرت سنة وسنين ..

والمسكين .. صارت كل آماله زواج

واتزاحمت في داخله الاسئلة ..

منهي اللي بتقبله؟ .. وليه؟

وفي يوم مامثله ابد .. شافها .. اجمل من اجمل مارأى

واضحكتله ... مستحيل!! ...اضحكتله

ومشت من اول الحارة .. ولحقها

وادخلت في بيت جاره ..

سأل عنها وعرف ... قنوعة واسمها سارة

تصير اخت لمرة جاره

ارسل لها اخته .. تجس النبض

جت البشاير

راح لمه .. وفرحته كبر السما والأرض

وافقت!! .. ابشرك يمه .. لقيتها يمه

سارة اخت حصة مرت منصور ..

ابيها وهي تبيني .. وابغى منك الشور

خلاص يا يمه خلاص .. بقول لهمومي الوداع .. بقول لهمومي الوداع

قالتله امه:

يا ولدي .. بس هذي اختك في الرضاع


عبد الرحمن بن مساعد

ن

مصر


..

قلت مصر وقالت الدنيا نعم قلت خير وفاض بالنيل الكرم

قلت ارضي من مثل ارضي ثرى مسجد احمد والمناسك والحرم

يامصر لك جيت انقل لك وفا خادمين البيت اصحاب الشيم

من بلاد النور لبلاد الدفا من رياض المجد لشموخ الهرم

يابلاد حبها ساكن بنا من قديم الوقت من قبل القدم

ماهي صدفه كل ما كنا معا حاولوا تثبيطنا وقتل الهِمم

ماهي صدفه إن نصرنا عُرْبنا ألصقوا فينا شنيعات التهم

مصر شمس الكون وبلادي سما هما مصابيح الدُجى نور الظلم

يا ملاذ اللي بعزك احتمى يا منار العلم يا أم الأمم

ان حكوا في الطيب شعبك مكتفي حاز كل الطيب واتعدى القمم

وان حكوا في المجد غيرك يختفي خير جند الأرض من سالم سلم

عزك المولى البديع المصطفي في كتابه أمّنك من كل غم

أدخلوها بالسلام وتأمنوا وان بغير السلم جيتوا للعدم

اشهد انك قاهره يالطاهره واشهد ان عداك في مرتع وخم

قلت ارضي من مثل ارضي ثرى قبر احمد والمناسك والحرم

قلت مصر وقالت الدنيا انا قلت حب وفاض بالشعر القلم


عبد الرحمن بن مساعد

أحبك يا بلادي


..

أكثر من ريبة الفقراء ..

من ثري ٍ يجوب أشد شوارع المدينة فقرا

أكثر من حماقة الطغاة

إن هم صدّقوا كل المديح .. شعرا كان أم نثرا

أكثر من ظلم بعضهم .. عندما يغتال من قوت الحصار

لكي يبني قصرا

أكثر من دعاء بعضهم على بعضهم

فجرا كان ذلك ام عصرا

أكثر من انحناء هاماتهم إذا مر

وشتائمهم إذا أدبر

أكثر من فضول المتسكعين ..

إذا رأوا تجمهرا لاثنين أو أكثر

أكثر من نبل الملوك

وفضاضة العسكر

أكثر من نشوة الانتصار .. وقلق الهروب

وتلفت الخائفين

أكثر من صبر النساء .. وشماتة الأعداء

وهم الأغنياء .. ومن حقد الحاقدين في الأنحاء

والأرجاء

أكثر من استعمالنا لكلمة يقولون .. ومن تكيّف القانون

وممن جعلوا الدين كالثياب

أكثر ممن يبيعون المنابر .. ويشترون ذمم الكتاب

أكثر من كذب الشعراء .. وعظام المقابر

أكثر من تنهد السجناء .. وغموض المشاعر

أكثر من أنبائنا المحلية

وافتراءات منظمة العفن الدولية

أكثر من كل المظلومين صبرا

أكثر من كل المحرومين قهرا

أكثر من كل اللئام .. وسذاجة الإعلام

أحبك يا بلادي .. طوعا كان ذلك أم قصرا


عبد الرحمن بن مساعد

فهد بن سلمان


..

كل حي يحين وقته يمتثل ان حان حينه

ما يقدم مايأخر قالها ربي في كتابه

وكلنا للموت ساير طالت او قصرت سنينه

التراب يعود لأصله ثم يبعث من ترابه

كلنا إمان بالله ماحكم به قابلينه

مهما كان الخطب داهي حكم ربي يرتضابه

مير ماكل المصايب تجعل بلادي حزينة

مير ما كل الفواجع تملى هالدنيا كاءابة

قيل شفتوا الطيب قلنا فهد بن سلمان وينه

قيل نجمٍ طاح قلنا الفضا فادح مصابه

قالوا ان الحزن واحد شي يجثم خابرينه

قلت أنا أحزان فقده مابها شيٍ تشابه

ماهقيت طويق يدمع ماهقيت أسمع أنينه

لين صار الدمع وابل والعيون اضحت سحابه

إيه ندري من فقدنا .. من فقدنا عارفينه

شخص أبد ماكان عادي .. كان دنيا من رحابة

كان فهد يحب أرضه كان متمسك بدينه

كان ماعنده لغيره .. للصخا مفتوح بابه

كان يخفي عن شماله جل ماتنفق يمينه

كان مايرجي مدايح .. بالعطا افنى شبابه

كان يرجى وجه ربه كان مخلص في يقينه

كان ابن سلمان فعلا في السماحة والمهابة

كان متذلل لربه كان مرفوعٍ جبينه

كان مبهج في حضوره كان مفجع في غيابه

مايرد الحزن موته .. هذا أمرٍ مدركينه

مالنا غير الدعا له نسأل الله الإجابة

يا إلهٍ جل شانه به نلوذ ونستعينه

علّه ميمن كتابه .. علّه ميسر حسابه

ياعظيم الباس يالله .. اجبر أهلٍ فاقدينه

واغفر لفهد وتقبّل واجعل الجنة ثوابه


عبد الرحمن بن مساعد

يا محاكمي الصم


..

يا محاكي الصم .. مجهودك سُدى مُنصت ٍ للبكم إنصات ٍ شديد

يا مدور في الظلالات الهُدى منتظر ابليس عن غيه يحيد

منتظر تلقى رفيق ٍ في العِدا عاري ٍ تبغى الدفى وسط الجليد

باحث ٍ عن عز ابطى ما بتدى باحث ٍ في هالمتاحف عن جديد

منتظر منقذ يبادر بالندا يهزم الأعدا وحقك يستعيد

منتظر منهو يعينك بالفدا انتظرت سنين ما جا ماتريد

عالي ٍ صوت العرب أحدث صدى شجب وإستنكار تنديد ووعيد

حطموا هذا العدو اللي اعتدا بالقمم أو بالخطب أو بالقصيد

يا مدور عن مثال ٍ يقتدى لا تدور مسك في وسط الصديد

انفظ غبار الأماني ما غدا للأماني حظ في سوق العبيد

كل وقت له نهايات ومدى ما يجي أبطال في الوقت البليد

ما ينول المجد من يخشى الردى في قريب الوقت والا في البعيد

كل سيف ٍ ما يجرد للصدا كل مجد ٍ ما يجدد مايفيد

الخبر يصبح خبر بالمبتدا والمعالي دانيه للي يريد

وكل يوم يحاك ثوب ويرتدى وكل يوم يكفّن ويقبر فقيد

وكل مافي الكون زايل ماعدا وجه ربك مالك الملك المجيد

يا محاكي الصم صرخاتك سُدى لا تأذن وسط أوثان الحديد


عبد الرحمن بن مساعد