ديوان قصائد لشعراء المملكة العربية السعودية (متجدد)☘️☘️

لا تردين الزيارة
لاتردين الزياره ..
لاتجيني ..
ما بقى بي قلب يستاهل حنينك ..
لاتجيني ..
لو تشوفيني على أرصفة الشوارع ..
إتركيني ..
أتسكّع في ممرات المدينة .. قلب ضايع ..
وتلّقفني عيون الناس وتفتش ملامح وجهي وتقفي حزينه ..
كثّر الله خير قلبك ..
لاتجيني ..
مو رخيصه ..
لا وربي..
كنتي أصدق من عرف قلبي وحبّه ..
كنتي أوفى العابرين من الأحبه ..
آه يا أنتي ..
صار أسمك في حديث القلب كنتي ..
وآنا مليت أتعلّق في ضمير الغايبين ..
وإتعداني السنين ..
غيبي أكثر ..
غيبي أكثر..
لإنك أقرب من قلوب الناس وأبعدهم مسافه ..
ياحسافه ..
مثل طعم الآه كنتي ..
لاتردين الزياره ..
ردّي لنفس الطريق اللي بديتي به غيابك ..
آنا مو محتاج عطفك ..
كثّر الله خير قلبك ..
كان من ذوقك ولطفك ..
بس أنا محتاج أكثر ..
من مجرد جبر خاطر ..
لو تردين الزياره ..
آنا محتاج لعمر ثاني أعيشه ..
شي أكثر من زياره ..
آنا محتاج لكثير ..
حتى لو قلبك كبير ..
آنا يا جرحي الجميل ..
باقي بعمري قليل ..
صدقيني ..
كنت أغرّد خارج أسراب الطيور ..
كانت الأيام بور ..
وكنت أكابر..
وآتقاوا ..
وآتهاوا ..
وآتهاوا ..
وآتهاوا ..
لين طحت ومالقيتك ..
كنت والله ..
أيه وربي ..
كنت محتاجك كثير ..
ما ذكرتي ..
وش كثر مني زعلتي ..
وش كثر رحتي وجيتك ..
ما ذكرتي!!
كنت محتاجك صحيح ..
كنت انادي لك وأطيح ..
كثّر الله خير قلبك ..
أنا مومحتاج عطفك ..
لا تجين ..
لا تردين الزياره ..
نواف التركي

محطّات ..!!


العمر رحلة والسنين المسافة

وقلوب خلق الله محطّات لل آه

والشعر مرقاب الندم والحسافه

أحنّ له وأعنّ وأضيق وأرقاه

وأكرهه وأبيه وأحبّه وأعافه

وأكتبه وآشطّبه وأذكره وأنساه

مرّات أحسّ إنه مجرد سخافه

ومرّات إحس إني ولا شي لولاه

وأحبّ منه اللي بليّا كلافه

اللي تحسّ بشاعره وأنت تقراه

وأكره به اللي قبل موعد قطافه

الخالي اللي بس صوت المباباه

اللي ملوا فيه الفضا والصحافه

اللي ما تدري وين جابه ووداه

وأنا ولا فكّرت يوم إحترافه

ما غير أهيجن به ولله ف الله

إختار يلقى في جروحي ضفافه

واللي هقابي طيب يبشر ويلقاه

تدري وش اللي في حضوره أخافه

إنّه يخلّي صدق لجروحي أفواه

ولا أصعب من الذنب غير إعترافه

والشعر صادق بس لاتبحث أقصاه

يبي يجي له يوم يعلن جفافه

قبلي كثير اللي تعب لين خلاّه

يا صاحبي نسيان الأحباب أفه

وأنت أخر السمّار والليل مسراه

يبي خويٍ ما يناظر خلافه

ولا يذكّر صاحبه وجدٍ أغواه

والشاعر اللي بين وزنه وقافه

خلّه على حطّت يدك لا تبلاّه

يكفيه يقطع ما بقى من مسافه

وكلٍ يغنّي لا تذكّر ل ليلاه

كل الحكايات القديمه خرافه

بكره بتسمع شي ما يوم قلناه


نواف التركي

السماء لا تطيحَ


كل ما طاح نجم من السما قلت خير

يستر الله بس إن السما ما تطيح

درّج الركب ياحاديه خلّه يسير

موحش الدرب وأصوات العوى والنبيح

غنّ خلّ الهواء يسري بروحك عبير

صوتك المثخن بحزن المداين جريح

يستثير البكى بعيون خلقٍ كثير

مثل ما يستثير الغانيات المديح

يجذب المومس الطبلة ونايك فقير

ماجذب غير عشّاق الطلل بالفصيح

غنّ لو كان ما يسمعك غيري وأصير

لك جماهير وأطرب لك وأصفّق وأصيح

غنّ أحسّ إن صوتك ريش وأقدر أطير

غنّ أحسّ المدى مثل إنتظاري فسيح

كل ما كبر جرحك صرت مثله كبير

كل ماطال بعدك صار دمعك شحيح

خذ يدي وإسرِ كن الليل هذا ضرير

قدّني عن ظلام قلوبهم للصحيح

كان ودّك نغيب .. نغيب والصدر بير

في غياهبه سرّك مثل ميت بضريح

لبّسوا حلمك المغري ثياب الحرير

وأتركوا كل ذرّة من عنى تستبيح

روحك اللي مع كل القوافل تسير

متعبٍ لو تلبّس وجهك المستريح

لو تطيح النجوم من السما قول خير

بس أهمّ شي تبقى هالسما ما تطيح


نواف التركي

أصدق الكاذبين ..!!


آه والصدر مزمار الكلام الحزين

كل ما أشتد كربه ينفث الذكريات

ليت قلب المسافر ما يعرف الحنين

ليت الأيام ماتعزف به الأغنيات

لا تنبّش ورا الحدب الرهاف الدفين

إنكسر غصن روح وطارت الأمنيات

خلّنا من حديث السادة المنهكين

ما عبرنا حدود الغيّ نشرب سكات

قول للي يصب الصبر صبّ إثنتين

وأردف الكاستين بمثلهن مترفات

يتهادن على صوت المغنّي لحين

ياخذ العقل نظرة ثانية للحياة

لحظةٍ فاصلة ما بين صحوي وبين

إنعدام إتزاني والحكي والثبات

فإن ترائى بعيني دمع للحاضرين

قلّهم سادة الحفلة ويا سيدات

ماهو بيوم ننسى اللي تراكم سنين

لو جمعنا من عيون الشتات الشتات

أدري الشعر كذبة وأصدق الكاذبين

صاحبك كل ما بكّى عيون الدوات

آه يا صاحبي يا سيّد العارفين

ما بهذا الضجيج الممتلي بالعرات

روح تقدر تحسّ برغبة العابرين

نفس تفهم بإنّ قلوبهم أُحجيات

صاحبي رحت مدري بالحكايات وين

والحكي ذو شجون وهات يا قلب هات

هاتها هاتها والله عليها يعين

حنظلة لو قروها الناس سكّر نبات

وين أبهرب وهي مثل النهار المبين

وين أصدّ وهي المتعلقّة بالجهات

ف المدن ف القرى ف الورد ف الياسمين

ف الطرق ف الأغاني في عيون البنات

وين يا مي حتى في غيابي تجين

كنّ الأيام صارت لك بعيني مرات

يا آخر الحاضرين وأول الغايبين

ياأجمل اللي بقى بالروح من ذكريات

أتسلّف لك الضحكة من الوقت دين

وأتجمّل عشان عيونك الغاليات

العمر حبْ والدنيا رحى والسنين

تنطحن لك وباقي من فتاتي فتات


نواف التركي

صف كلام ..!!
البداية ..
عادةً تأتي بلا أيّة بداية ..
تنخلق من رغبة الهاوي مراودة الخلود
تشبه إحساس ال تحرر م القيود
تبتديك بلا سبب
تدمنك تاخذك لأبعد من توقّعك الوصول
تاخذك منّك إليك
لين تتوغل بذاتك
في سكاتك
ف التفاصيل الصغيرة من حياتك
لين تتوحد مع الأشياء حولك
لين تنسى من تكون بزحمة التكوين والبعث الجديد
كثر ما تتوغل بروحك بتبعد
وكل ما تتوغل أكثر تبعد أكثر
لين تجهل من تكون وكل ما كنت يتلاشى
وتبدا ترجع من جديد
تكتشف إنّك بعيد
وأنّ قلب أمّك بسيط
وإن حلم أبوك أبسط
وأنّك الجامح لحلمٍ ماله حدود وملامح ..
لو قدرت بأمنية ترجع بعمرك
إرجع لمولدك الأوّل
عيش ثاني كل ذرّات الثواني
من يشقّ النور نوّر
من يطيح الليل ليّل
مثل كل الناس خلّك
لا تروح أبعد من اللازم كثير
لو منحك الحلم ريشه لا تطير
لا تغادر
لا يغرّك ملمس الحلم الحرير ..
تدري إنت إن الزكاة تحلّ في إبن السبيل
وأنت أرضك من ذهب
لا تكون اللي ذهب
كن مثل أرضك عريق ..
الكلام يغصّ في فمْه الكلام
وأتعثّر بالوجيه الفارغه من كل معنى غير من صف الكلام
كانت الرحلة تعيسه للأسف
البداية خطوة ل لأي إتجاه
بس الأصعب .
كيف تكتب في نهايتك النهاية
كيف تقنع كل من حولك
ذبولك
كيف ترمي الورد
تطفي الشمع
يغرق في عيونك دمع
تنسى نفسك بلحظة وتكتب
عذراً لكل القلوب اللي مشت وياي واللي ما تقاطعنا أبد
ما أظن أن الكتابة بالنهاية
تعني إنك قادر تصيغ النهاية
بس أكتب
مغلق لأشعار أخر
وأقفلك بالشمع الأحمر
وأنتهينا بالسلامة
نواف التركي

دموع التماسيح ..!!


الليل محراب الوجع والتباريح

وأنا بسكين الحكي .. بذبح الصمت

ما عاد يغريني حديث المراجيح

ولا الهوى اللي عقب عرفه تندّمت

ولا عاد تخدعني دموع التماسيح

من كثر خذلان الخلايق تعلّمت

أكون بارد دمّ لو قلبي يصيح

وأضحك بوجه جروحهم لا تألمت

واللي تغانم طعنتي ربّي يبيح

منّه ويجبر زلّتي يوم عشّمت

محدٍ معاه لضيق صدري مفاتيح

حتى الذي في صدق قلبه توسّمت

هذي ذنوبي بين دعوة وتسبيح

علّقتها في رحمة الله وسلّمت

ما عادت حروف القصايد مصابيح

ضويت لين إستنفذ الشعر وأظلمت

تجري بما لا تشتهي سفني الريح

حتى معاها وين هبّت تيممت

ما كان ودّي يبلغ السيل وأزيح

وجه الرضى عن طلّتي لا تكلمت

ليته يكفّي عن غثى الحكي تلميح

أو ليت بعض الناس تستوعب الصمت


نواف التركي

الصمت والمينا ..!!


تعال أفتح لك أزرار الحديث وغنني يامال


تراني مركبٍ ملّ السفر وأشتاق للمينا
كنْ النهّام وأصدح بالحنين لضايقين البال


عسى تقدر تعبّرنا المدى في حزن أغانينا
كتبنا لين ملّتنا القلوب وطوّل الترحال


كذبنا لين صدّقنا الكلام وصار امانينا
خذ الأقلام والأحلام ما عادت تسرّ الحال


ولا تنفع ولا تشفع ولا تسمن وتغنينا
يا نهّام الفجر نوره يفجّ الليل للغربال


وبكره مدري لوين القدر يبغى يمشينا
تطلّ الشمس فعيون السهارى تذبح الأمال


ويبعثنا المسا من قبرنا ونعيشنا فينا
كذا والفارغين أضحوا هل الأراء والأقوال


كذا صارت مصيبتنا العظيمة في مبادينا
تركنا الأرض للسخف الكبير وضحكة الجهّال


زهدناها بعد ملّت من التربة خطاوينا
يا نهّام الحديث يقلّب الأوجاع لا من طال


وحنّا حائط المبكى غدت مثله حكاوينا
فهل نستجدي الغيم الغثيث يبرّ بالهمّال؟


أو نطاوع صلابة روسنا اللي ما تخلينا؟
على طرق الحنين وطاري الغالين واليا مال


دخيلك شوف لي عن هالحديث الصمت والمينا

نواف التركي

عمر ومسافة ..!!


من بدايات العمر لأوّل خريفه

من مراهيش الحنين إليا عجافه

كل ما سلّ العتب ف الصدر سيفه

قام يحصد ما بلغ منّي قطافه

خلّها تقنب ورى العوج الرهيفة

الشعور أحيان موته في ضفافه

صاحبي شاعرك ما همّه رغيفه

الزمان المرّ علّمه الصلافة

كنت الأجمل للطواريق العفيفة

آه يا ذنبٍ تعمّدت إقترافه

غيمك اللي مرّ عدّاني رفيفه

ماسقى جرد الضلوع ولا جفافه

والهقاوي عوّدت منّك معيفة

شاعرك ضيقتْه من قافه لقافه

صدّة المقفي عن المقبل كليفة

وأنت ما قصّرت في مدّ الكلافه

هاجسي وعيون هالليلة كفيفه

لا تلوم القلب وإن ناظر خلافه

ضاع في هالعالم الممتد زيفه

وأنت تدري قيمة الشعر إختلافه

غنّ ما لل آه في صدرك طريفة

المقفّي ما ترجعه الحسافة

لا توجّس من حنين القلب خيفة

ما بقى شيٍ من الدنيا نخافه

عقب شفت الظنّ مايِشبع رغيفة

والقلوب أحيان تغريها اللطافة

قلت أدرّجها على راس المنيفة

وأرجع أزرع للجفا عمر ومسافة


نواف التركي

نهايات ( 3 )
لي ف الغياب أحباب
دام الحضور قبور
لا تقرّب الأغراب
دوم الغريب يبور
ويغفى النور ..
ولا أحسّ الحضور حضور ..
وأحسّ إنّ الغياب أجمل ..
تعال نغيب ..
تعال نروح للأخر ..
تعال أكثر من اللازم ..
تعال وبس ..
تعب ياصاحب الأقلام ..
تعب وأحلامنا ما عادت الأحلام ..
تعب وأكثر مساحات الكلام قبور ..
تعبت أحضر شعر وشعور ..
تفتّش بي قلوب الناس ..
عن الإحساس ..
عن اللي ما وراء الصمت ..
عن الخافي ..
عن ال ... ولاّ بلاش أحكي ..
تعبت أحكي ..
تعبت أكتب ..
تعبت أكذب ..
تعبت أحضر شعر وشعور ..
نواف التركي

نهايات ( 4 )
هذا أنا يا أسماء
تعيشني جروحي
هارب من الأشياء
متوحّد بروحي
أتعمّد الأقصاء
وأستفرد ب بوحي
هذا أنا ..
أحيان يخذلني الحكي
أحيان يأخذني الحكي
أحيان أحسّ أني طفل وأشاغبك
وألاعبك ..
وأزعل على اتفه سبب
وأحيان أحسّ انّي كبرت ب هالعمر
وأنّي كذا ملّيتني
وأنّ السنين اللي تمر
ماخلّت بعمري عمر
وأشتاق ل الأوّل وأحن
وأحسّني مثل السفن
تبحر بعيد مسافرة
وتغيب ضحكتها على كل المواني العابرة
ومكابرة ومكابرة
تخاف لا هبّ الحنين شراعها
تشتاق لأحضان الوطن
لا تعبثين بشاعر أضحى خالي إحساسه من الأحساس
خليه مثل الناس
ينام خالي هم
يصحى ولا يهتم
خليه يا أسماء
هارب من الأشياء
هارب من جروحه
هارب إلى روحه
والسلام
يرفرف بصدره حمام
والسلام يرفرف بصدره حمام
نواف التركي