ديوان الأمير بدر بن عبدالمحسن

واطيري اللي زودوا فيه الأثمان
اشعل ظهر والصدر يجهر شعاعه

لو له شبيه في الملى هو غزالان
راجي عل زينه يزود بشجاعه

خذته ولاني يا هل الطير ندمان
من عادتي ما نيب اسوم البضاعه

الى ركز في مجلسي طير حوران
وتجمعوا عندي كثير الجماعه

وشلته على كفي كثير الغثا هان
عندي غدى للهم مثل المناعه

لا صرت فيما تطلب النفس بلشان
اترك طمان القاع وارقا برفاعه

وباكر تصاريفه على عالي الشان
من يضمن الدنيا ولو ربع ساعه


البدر

لو هو غضب بيحت ما ضم جوفي
من الغثا واظهرت عقب االعقل جهل

ولو هو الم ما طال عندك وقوفي
ولا جيت أبا اسمع قصة الذيب والحمل

ولو هو ندم كسرت .. باقي سيوفي
على دروب الوصل ومفارق الشمل

صوت العظام اللي تكسر حروفي
مابه كلامٍ تنطقه شفتي سهل

إن جيت امش الدمع تبكي كفوفي
وإن جيت أقول الشهد يوذيني النحل

الحمل ماهو اللي تشيله كتوفي
الموت لا صارت كتوفي هي الحمل

ومن قال باكر .. قلت باكر حتوفي
والباقي إنشد عنه ضراية الرمل


البدر

ما أقول أنا لبيه .. وما أقول سمّى
ياعيونه اللي ما صفت لي وتكدّرت

يا صاحبي بكفيك مدحي وذمّي
كان الجفا تقصير يا زين قصرت

يا من نثر برماح الأهداب دمي
لو للجروح ضماد وصلٍ تصبّرت

لا شك ما انته يا دعج العين يمّي
لا والذي اطغاك زين وَتكَبّرت

ظامي هوى وشربت من فيض همّي
ويوم ارتوت روحي من الدمع صدرت


البدر

في دربكم يا راحلينٍ ٍ مناكيف
تالي ليالي القيظ وأول خريفه

ردّوا سلام أهل القلوب المواليف
على الوليف اللي نشد عن وليفه

ردّوه لعذوق النخيل المهانيف
وعلى القصور اللي بوادي حنيفه

دارٍٍ لها بالقلب عشق وتكاليف
ياعل عينٍٍ ماهوتها كفيفه

طبنا وشبنا وأتعبتنا المشاريف
والمرقب العالي هبوبه عنيفه

يا واردين العد .. كفّوا المغاريف
اللي بقى دمعٍ هماجٍٍ ذريفه

والله لو دمّي يغيث الملاهيف
قطعت عرقي لين يصفى نزيفه

ويا حظ من لا عرف منهو ولا شيف
إن طاب ..يحمد وإن تردّى .. بكيفه

وحنا ورثنا العز عظم وغضاريف
لا ما ورثنا العز تاج وقطيفة


البدر

أبا اتنفس دام لي بالنفس حق
ياللي قصيدي فيك من حر الأنفاس

والله يالولا عبرة الحبر الأزرق
دمعٍ نثرته من عذابي بقرطاس

لاأقول أحبك .. لين بدموعي اشرق
وقبل الصديق يحس بي نايد الناس

إلى متى .. وصلك من العمر يسرق
دونك ودون الوصل .. بابٍ وحراس

أنا فـ جبيني الشمس تظمى .. وتعرق
وانته بشوب القيظ .. ريٍ ونسناس


البدر

قالت قصيدك ليل .. سودٍ معانيه
رويانةٍ بالدمع ... وامدادها دم

الى متى يا شاعر الهم تخفيه
والى متى .. تحنى ضلوعك على هم

قلت البكا .. صعبٍ عليه وأنا بيه
لا واهني اللي بكى وما تندم

لي عبرةٍ يلعب بها الحزن والتيه
ولي صرخةٍ .. واتعبت ابلقى لها فم

لا ما كتبت الشعر .. لحدٍ بسليه
ولانيب مداحٍ .. ولا باترنم

احساس لابيعه ولانيب شاريه
مرٍ يجي شهدٍ ومرات علقم

الى لمحتي دم جوفي افخليه
على الورق .. لا صار روحك تالم

قلت الشعر يوم إن لي راحةٍ فيه
وحزين أنا إلى متى الله يعلم


البدر

يا عاذلي .. ما تشوف العين مشتاقة
لولا الحيا جاوبتك بدمعها الصافي

عطني جلد .. كان تنخاني على فراقه
ودي الي من تركته ما أشبح خلافي

لاح الجبين .. وجذبني نوض براقه
حيثه ربيعي .. وورد الخد مصيافي

والغصن لولا المطر ما أخضرت أوراقه
يا كيف عشب الوسم يترك وينعافي


البدر

لا شاري عقدِ ولا مهدي سوار
لا تلحقي نفسك هموم وحسايف

تريثيي يا قرة العين مقدار
ما تشرب عروق القصيد الوصايف

لا من قدحت الشعر وشبيت لك نار
نارِ على روس الهضاب النوايف

يطرب لها الساري ويسري بها الطار
وتزهر بها عقب المحول الشفايف

باهديك أنا عمر ولاكل الأعمار
يفنى القلم قبله وتفنى الصحايف

قصيدة تولد ورى باب وجدار
سر الضلوع المرهفات النحايف

وإلى أصبحت طارت على متن الأسفار
وغنت بها قبل النفود الصحايف

غيبي وشيبي وإتركي كل ما صار
يبقى جمالك في قصيدي طرايف

وخلي الكواكب من سنا نورك تغار
ولا تلحقي نفسك هموم وحسايف


البدر

يا صاحبي .. والليالي سود
يا صاحبي .. والزمن صافي

اللي إلى احتجت له موجود
واللي إلى من وعد يافي

ما هو على المرجلة محدود
تقول مكتوف بكتافي

ما جور ياللي رقيت إسنود
عرض الجبل .. وانيٍ حافي

يوم الردى مسكنه فـ .. لحود
مسكنك في راس مشرافي

والله لوفي التحرص زود
كان العمر ما نقص .. وافي

وليت الرخا لا اجتمع والجود
تقاسمه شهم .. وسنافي


البدر

لليل احبك مابقى في السما نور
والى ضواني الليل .. للصبح أحبك

واللحظة اللي كلها عند وغرور
أشوف قبري بين عينك .. وقلبك

في صدري سراجٍٍ حزينٍٍ ومكسور
رغم المطر والريح .. شلته في دربك

والله مابه غير لوعاتي قصور
وخوفي عليك الله ربي وربك

ما بي جهد ابني على صمتك جسور
لا حيرتني أسباب سلمك وحربك

العمر أحبك .. مابقى فيني شعور
والى جفاني العمر .. وشلون أحبك


البدر