فوق هام السحب ( الشعر الشعبي) على متن القوافي

انا الكبير بعين من يعرف الناس
وانا الصغير بعين من يحتقرهم

تدري وش الافلاس لا قِيل الافلاس
اللي عرف له طيبين وخسرهم

الأمير خالدالفيصل

والنوم لي وقت لاجيته ولاجاني
يرسل علي والسهر يذبح مراسيله

ماعندي الا القصيد يترجم احزاني
اصرف شعر واعتصم بالله واشكي له

سفر الدغيلبي

‏يالعفاف المهذّب والحيا والحشيمة
‏والجمال الحقيقي والوقار المهيّب

‏كل عينٍ ماتشبع من عيونك كريمة
‏ما لحسنك شبيه ولا لزينك معيّب

‏ماتهون المصايب والجروح الأليمة
‏لين شعرك من العود المعتّق يطيّب

‏وكل فكرة تغنّى فيك فكرة عظيمة
‏لين راسي يشيب ولين قافي يشيّب

.....

‏عزي لحال اللي من الفقد مفجوع
‏مــن كثـر مامر بحيــاته وواجه

‏صار الحزن في داخله نبت مزروع
‏تسقيه ذكرى وسمها في حجاجه

‏لاحول لا قوه ولا صوت مسموع
‏ من كل حاجه ناقصه الف حاجه

.....

‏يـالله ياللي نطلبـك حزة الضيـق
‏وللضيـق عنـدك ياكريم انفراجه

‏تفرج لمن همه عن الضحكه يعيق
‏فاقد شعاع الشمس طافي سراجه

‏همه ثقيل ٍ وان حكى ييبس الريق
‏بعض المواقف زودت بانـحراجه

‏عليك يشكي الحمل ما يقدر يطيق
‏فيك التجى وحدك وعندك عـلاجه

.....

‏ياصفحة الخذلان ماعاد نبغيك
‏قصة حياتي ماتحمل هزيمه

‏وان كانها لابد شوفي مراميك
‏في داخلي باقي علامه قديمه

.....

‏أحبّك و أنا اللي لو جميلك علي شوي
‏قدرت أتناسى ليلةٍ ما أنت ناسيها

....

‏ملامح عفيف النفس ما تقبل التاويل
‏عن اللي حياه العفٌ يمنعني أقوله

‏ما بين أرتكازة معتدل وأنحدارة ميل
‏وخصرً هذا ضيقه وعنقً هذا طوله

‏سحاويً يروح الشفق لا انولج فالليل
‏مثل وجنته لا دسهّاا تحت مجدوله

‏نحيل القوام اللي قطاته قطاة الخيل
‏يا حظ اشقرً يقتضّ ويلف من حوله

.....

‏ودّي أسلي شوقي إللي كل ما تركد غصونه
‏هبّت الذكرى من الماضي القديم وحركتها

‏وإنْ بغيت أنسى غرامك وقّفت ذكراك دونه
‏وردت أركاب المحَبه فالخفوق وبرّكتها

.....

‏لولا الحياء والملام وهرج عذّالي
‏لاقول بيتٍ يراودني وخبّيته
‏
‏فلان كل الوجيه اللي على بالي
‏وفلان كل القصيد اللي تغنّيته

.....