فوق هام السحب ( الشعر الشعبي) على متن القوافي

صبرنا على قل الدراهم وكثر الدين
وحفظنا كرامتنا من اللاش وازعاجه

نسلف وحنا متسلّفين ومحتاجين
ونفزع لراعي الحاجه وحنا على حاجه

.....

‏دام ان رزقـي عـند رب المـخـاليـق
‏مالي ومـال النـاس واللـي وراها

‏يا رب تجـعـل كل عـمري توافـيق
‏ونفسي من الزلات تـغفر خـطاها

.....

‏تسوق ألطف أنسام الغلا ضحكة محياك
‏على روح من طالت عقوده وهو ضامي

‏ياسبحان من خلاني أدورك .. وألقاك
‏وأشوف أبسط حقوقي معاك أكبر أحلامي

‏لا تستغرب إن بعت الوجيه وشريت رضاك
‏وأنا مرخص ليومٍ معك .. جملة أيامي

‏تمثنى فجوج القلب ، وأسلى وسجّ خطاك
‏على عين حاسد ضحكتي لك .. ولوّامي

.....

‏يا غريبه يُخلق المَرء فالدنيا جَنين
‏ما يعرف ظروفها الصافيه والغابره

‏يطرد أيّامه وتطرده وتمرّ السنين
‏لين تلحقه المنيّه وتقطع دابره

‏إلحقيني قبل لا أسلك طريق الراحلين
‏العُمر ساعاته قصار ، وأنتي خابره

‏كل أبونا بين ساعه وساعه عابرين
‏وش يضر العابر ليا ضحكت له عابره

.....

‏إي والله إني بخير وكل أموري بخير
‏لو كان دمعة عيوني ما تشوفونها

‏أنا أكثر إنسان في صمته كلامٍ كثيير
‏ويخبي أشياء كان الله في عونها

‏الحظ ماله خَوي والحزن ماله ضمير
‏وإن قلت يا هونها ما هوب يا هونها

.....

‏أقسـى من الدمـع صوتٍ تقتله ونّـه
‏والونّــه اللي تجي من شـوق غلّابـه

‏لإنســان من كـثر ما تغليه وتحــنّه
‏تختار فرقـاه وانت تضيع في غـيابه

.....

‏طوتك السنين الجرد يالشارع المهجور
‏حتيت الشجر ماحط لك بالخطى معبر

‏يعلمك عن طول إنتظاري ظلال السور
‏لامر الحنين بشارعك والضجيج أدبر

‏الأكبر من غيابك حضورك بدون شعور
‏تخيل يكون حضورك من الغياب أكبر

‏معك هقوتي مثل الصور في رفوف الدور
‏تمّر السنين بعمرها بس ما تكبر

.....

‏الوجيه اللي تمر تمر ما تغريني
‏ماتحرك غافية صدري ولا سمّاره

‏غير وجهٍ ضحكته تلزمني وتعنيني
‏فاقده ومعلّق الضحكه على مسياره

‏يبتدي فيه الشعور وينتهي به فيني
‏كنه يمر الشعور فقلبي ويختاره

.....

‏غفلت فالدنيا وسجيت فيها
‏وخذتك الايام التعيسه على جنب

‏ماتدري ان الراحه اللي تبيها
‏سجده بعد غفله وتوبه بعد ذنب

.....

يا قوافي الشـعر غني من جـديـد
‏واطربيني اكســري صمت الزمن

‏وارسمي الاحلام في بيت القصيد
‏وابعــدي عن عــين خفاقي وسن

.....