ديوان قصائد لشعراء المملكة العربية السعودية (متجدد)☘️☘️

ياكل من يستمع خد علمنا ..والنصوح
للشاعر هزاع عبد الله الشمراني

عسى الناوي اللي يبهج الخاطر الملتاع
للشاعر هزاع الشمراني

احب فصل الشتاء لاحل وارتاح له
بدع هزاع الشمراني

واالرد للشاعرين
ابو يوسف الشمراني وعبد الله الحوالي

واقع ملموس / الشاعر هزاع بن عبد الله الشمراني

قصائد الشاعر محمد بن أحمد الحوالي الشمراني


يهل الشعر وين القصايد موازين - مسحوب

يهل الشعر وين القصايد موازين
تعبت في تدويرها وين اهلها

يامكثر اللي يبني الوزن بيتين
محدن فهم وش علته ما شملها

كم واحدن سموه شاعر دواوين
وكلمته لاقالها منه تلهى

يفرح بتقدير الرجال المجانين
يكذب ويصدق كذبته وانت شلها

لاجيت تقرا من قواله عناوين
كنك من اللي يشرب الما سملها

يدخل ويخرج في المحافل بتدشين
و معتلي منبر وهو ما وصلها

الناس تمدح كلمته واسوتى زين
ورايته بيضا وهو ما حملها

شاعر وله مغنى ويعطي قوانين
كلمته فخرية وليته خملها

يجيب له طاري بمدحة وتليين
وهو كبار الشعر ما جا سألها

خذها وانا ناوي بطرد اكثر القين
واللي يرتب كلمته ماشملها

وانا تراني في الشعر ماني الشين
لكن لي كلمة و جات بمحلها

ماني بشاعر مثل ما يملي العين
لكن قصيدي بالسنام وجملها

نكتب وزن بالقاف معنى وتعيين
خل الذي قد قالها ما فعلها

صقر(ن) تروالي يطوي شعابين
يا زين وحي اللي جناحه سدلها

شامخ قصيده والشعر له بساتين
محظوظ منهو جاب حبه شتلها

تثمر بساتين الادب يا مشرّين
لكن يا شراي غيرك قتلها

مجاراة لقصيدة الشاعر علي بن سعد الشمراني

قال الشاعر علي سعد الشمراني
:
قلت فيني حزن واصل منتهاه
قالت ادري بس شف قلبك حجر..!

قلت مادام الأمل طوق النجاه
باتشبث فيه وارضى بالقدر

قالت احسك غريب وقلت هاه؟
قالت: تمثل وقلت الوقت امر

وكانها عالبسمه اللي في الشفاه
لازم اساير ملايين البشر

ولا انا مطعون من كل اتجاه
الليالي هم وايامي قهر

خافقي بستان وهمومي طغاه
احرقوه وما بقى وسطه ثمر

كل ماهب الشقا خذني معاه
قلت له صبرا ولكن ماصبر

لعن ابو هالحظ مدري وش وراه؟
في حماه الهم وبغفله كبر

اسمعي يابنت عيريني انتباه
باعترف لك واعترافي لك خطر

صدقيني مانخلقت لهالحياه
انخلقت احيا على سطح القمر


و قمت بمجاراته

وقلت
:

القمر والكون ما تسوى جفاه
طول عمري ما افارق له حدر

ما أبي غيره من أموالن وجاه
كل ما سجيت فكري به ظهر

طول عمري والدهر احدا حداه
ان كتبت في غيرها قل السطر

يارقيق الحس فيك الحسن تاه
يا رفبق القلب وين احلى بشر

الخلق والزين في اول صباه
قد طعني حبك البالي غدر

إن لمحت اقبالهم ضوح سناه
يا مراحيبن تراحيب المطر

ودي أكمل مابقى كله معاه
أو مماتي ياعرب صدره قبر

والكفن من شعرها ولا عباه
من طرفها أقطعولي لو شبر

ياحلاه و يا جماله يا بهاه
كل ما شفته تلاشى لي كدر

يفتخر شعري بها يومه طراه
والشطر فيها يجيبه لي شطر

والقلم في ابتهالن من سباه
والقلم لو جف ما جف الحبر



وسلا متكم ...

الطراز القديم عشنا وعرفنا حكينا وتهذيبه
ان اكرمت الكريم ملكت يده ** و ان اكرمت اللئيم غدوت نده



عشنا وعرفنا حكينا وتوظيبه ** ونحشم اللي قد تظاهر شيبه

ونوزن الكلمات من يسمعها ** تختص به واعرابها تعريبه

وابوي رباني وشيد بيتي ** باجزل صفات الناس في تهذيبه

ابوي علمني معاني جزلة ** ماجابها الطيب ولا تطييبه

واسقاني الترياق لين اشفاني ** بقدرة الله ذا كتب تطبيبه

وشب نارن للمسافة تبقى ** من تجربة تكفي عن التجريبة

لكن جربنا شربنا ماها ** وايقنت بانه حق بي تدريبه

يالله ياالحي الولي النافع ** ترزق ابي مما يريد تثيبه

والله يالحي الولي النافع** فامي تربيني على تدريبه

لو شذ طرفي عنهم يذبحني ** وامي تحد السيف له و تجيبه

فارحمهما واحفظهما ذخراً لي ** يباب جناتي ويا تبويبه

جاني كلامن مايسر الخاطر ** واصطادني البهتان قبل الغيبة

واني عصيت امر الكبير الفاهم ** واني بذيء القول في ترتيبه

واني قليل المعرفة ما افهم ** هرجن وربي كاتبن تكذيبه

واني ضعيف العزم لانني طايش ** وارد عالعزّل وادور هيبه

لكن ربي عالمن بالخافي ** ما دسدسة جيبي ودسة جيبه

والله باني قادرن عالردة ** وان شاء ربي عارفن تاديبه

ان التزمنا بالرجال اوفينا ** بالشور والاحسان ولا الطيبه

والطيبه اللي ما تجي للطيب ** تقلب على الطيب اذى وتخيبه

والطيبة اللي للرجال الونعم ** مثل التجارة صايبه ومصيبه

جريت ياصوت التهم موالي ** واجر صوتي مابرى تعطيبه

كم من رجاجيل ن تجي للواجب ** مافادت الوقفات في توجيبه

يالله يا رافع وباني سبعة ** سبعة شداد مالها تعقيبه

بانك تجازي الظالم اللي يكذب ** بئس المنيب النار فيه منيبه

نارن تلظى توصل لعرقوبه ** فانت الذي قادر على ترهيبه

نشرب من الجال الهني الصافي ** كم حاولت اجناس في تشويبه

وناكل من اللحم المباح ونشبع ** يوم ان لحمي ياكله بالغيبه

والكلمة اللي جاهلن منبعها ** لديت عنها والوصوف مريبه

من خوف يتحقق هدفها مني ** بكرة تشوف المجتمع يهذي به

والقوم لوم ان صوّبك لايمهم ** لا تستمع له صد عن تثريبه

ماصاب ولد العم فيني صايب ** من كلمةن تحدا على تعذيبة

والسيف الاملح عذربوه العذل ** يا عاذله تبطي على تخريبه

لا تحسب اذني صاغية لاقوالك ** كذاب سهمك مانجح تصويبه

فالخيرة اللي من الاله الخالق ** اقوى من العذروب في ترغيبه

والكلمة اللي عايبه في سيفي ** اتعيبني وانا ابيت العيبه

لا شكك بسيفي فلاني خايف** ولاهمني تشكيكة وترييبه

ولاهمني عشرة عمر تجمعنا ** ولاهمني تبعيده وتقريبه

فالسيف ابو حدين مابه عيّة ** يشرب من الدم الحمر ويذيبه

لا ترخي لسانك على حدانه ** يقطع لسانك وانت ماتدريبه

فالهرج يمحيه الزمن مايبقى ** اما الشبى يزداد في تذريبه

والكلمة اللي جاهلن منسبها ** نجزع عن اللي قالها ونسيبه

قصيدة الشاعر جابر بن زهير في الشاعر محمد بن احمد - مع الرد

يقول جابر بن زهير :

شامخن راسه وميال العقالِ
كالصقر شيهان والعزوة تهامة

كالجمل سمحان حمال الثقالِ
والبعير يشيل ماهزوا مقامه

ملتقن للضيف بقدوع ودلالِ
والكريم اللي تعدته الملامه

شاعرن وكلمته مثل الزلالِ
حظ منهو حافظن وارد كلامه

أمدح ابن العم والاخ المثالي
فالشهامة ماتجي الا للشهامة

من طحاطيح القبايل والرجالِ
من شمارين التهم عز وكرامه

لا نوا للجد حتم ولا محالِ
خصمهم مقتول والا به علامه

أفتخر بك يبن عمي يالحوالي
وانبسط لاشفتك بخير وسلامه

وانا من قومن توزّن بالجبالِ
ال عامر ذروة المجد وسنامه

محتمين الطارفة بانفس ومالِ
واسود البارود غطى عالغمامه

عزوتي باول طوابير القتالِ
حاظرة ياللي وجوده بانعدامه

وافية في الحرب والا في نزالِ
والصفوف تهيب كلن مع حسامه

والسلام ختام في تالي مقالي
واقعدوا في الخير واتم السلامه


والرد من محمد احمد :

الله اكبر كيف تحرجنا الجزالي
من جزال اللي طرى فيني حزامه

جعلني مااخيبه باول وتالي
واجعله فرحان ما شاف الندامه

لو عصاني الوقت واشتدت رحالي
لال عامر وجهتي واترك تهامة

اطيب ال الناس واقربهم لآلي
ساكنين اعلى نوايفها العدامه

من عداهم في الوغى يومه خوالي
مثل موج البحر يا قو التطامه

لو بشيّد من جزال الفكر عالي
دونكم ما يعتلي يفقد نظامه

الكلام الحق ماهي من خبالي
والكلام اللي من الجَد استلامه

وانت ياجابر من الناس المعالي
نعرف المعدن ليا حان التحامه

النفيس نفيس و والغالي بغالي
والرخيص نشوف فالقاع انحطامه

وانتم الغالين في قلب الحوالي
وانتم البيت الذي يأبى انهدامه

والله ان البيت هذا بارتجالي
يوم شوشني قصيدك في اهتمامه

قمت ألد الصدر عالصوب الشمالي
واركب الاشعار واشد اللجامه

نصايح العود - جديد
الا ي العود ي المقفي تعال وداوي الالام
طعون الوقت في صدري بمخلابه بمخلابه

وحين الجرح يبرحني اشوف الناس كالاصنام
تشوف الهم يغرس في فوادي شابي اطنابه

وكني اجنبي ي دار وكني للبشر اوهام
اصيح وماحدن يسمع ولاحد فك لي بابه

اجر الصوت بالالام ودمي حبر للاقلام
وكني تايه يدور مواطن رحلة اعرابه

واطلال الفرح في داخلي باقي جمر وخيام
اقص اثارها غير الاثر ما فادت اصوابه

الا ي العود تكفى دلني وانا على الاسلام
تراني كلما عينت خيرن طارت اسرابه

ورد العود في نظراته العثرات والالهام
ويرسم في التراب اشكال يرسمها بمشعابه

يقول ان البشر هذي طبيعتها مع اللوام
ولكن خذ بيوت الدوح ضو(ن) فاز شبابه

تحكم بالوقايع لا ترجح عاطفة مقدام
ترى سود النوايا تحتري زلتك طلابه

توقع من خفى الايام واسال زلتك في العام
وحاورها وخذ شفك ترى الايام جلابة

يجوز تكون عزة نفس يقلل قدرها سوام
وبكسر شوكة العزة وسط عذال غلابه

يجوز تروح ليلة أمس ولكن دمعها همّام
يجوز الجرح ما يبرى ولكن الدهر شابه

فلا تابه لمن قالوا وكشر نابها بالسام
فلو طالت سموم الناب فانت السم شرابه

كثير من البشر ينسى بانه قد فطر من صام
كثير من البشر قفل عن الغفران بوابه

ولكن الاله الواحد الحي الصمد دوّام
برحمته الوسيعه يغفر لعصيان توابه

تخاف من القوادم وانت يومك ماهو بقدام
فعش يومك ولا تبني أمل للغد ماجابه

ولا تيأس طموحاتك فتقلب واقعك احلام
ترى الاعراض موجوده ولكن منهو يجابه

ولابد انه يصيبك هموم تسهر النيام
و شي عادي يصيبك من ضروف الدهر وانيابه

من تهيب صعود الشم ماعمره صعد أو قام
ومن يبكي على ميت بينسى حزة غيابه

الروية - #غزل - محمد بن احمد
غزتني طواريك التي تسرق الهوجاس
وانا سارحن فكري ورده علي ابليس
وقمت اتخيل عنقك اللي عليه الماس
والد النظر للعين و الخد و التقويس

نور الحسن في وجهها يطفي المقباس
جميلة بلا مكياج و حلوة مع التعبيس
تحر العذارى نظرة(ن) من عيون نعاس
بعين)ن( وسيعة كحلها من كحل رمسيس

و شعري على وصافها يعلن الافلاس
احاول اوصفها وتزعل علي بلقيس
ومن زينها مامثلها في البشر مقياس
وتعجز تلاقي وصفها في قصايد قيس

اذا مررت من الناس تكسر رقاب الناس
ولا كنها الا من خيار النياق العيس
واذا كلمت جلاس تطرب لها الجلاس
واذا شافها العالم ترجعه للتدريس