اخترنا لكم

عسانا لانصانا اللي ماريحه الزمن يرتاح
وعسانا مانسوي طيب وانا ننتضر رده

وعسانا لاتجملنا في احد مانذكر الي راح
وعسانا مانقابل راعي المعروف بالصده

وعسانا لاحصل منا قصور بساعة الافراح
مايلقون العرب منا قصور بساعة الشدة

حزمي سعد السبيعي

جفى الغايبين الي ليا عاهدو ماجاو
هـو الـي يخلي سيرة الحب مكروهه

لهم فالحشا مضراب شلفن تقص الماو
أشـد التهـابٍ مـن ذوايب ثـم الفوهـه

ياشيب الخفوق وهشم كبدي وياه وياو
صـواب عذابـه يخلف الـرأي والبوهـه

.....

اثقل ديون الطيب دين الجماله
وألذ طعم الطيب طيب المواقيف

وازكى دروب الطيب درب العداله
وابرز صفات الطيب رد المعاريف

واللي تجمل فيك بأغلا حلاله
لا تتركه لا عارضنه صواديف

ترا الجزاله مالها الا الجزاله
والمرجله قد قيل تبغا تكاليف

‎محمد سالم الطريسي

رزقي على اللي لا عطى شي مامنّه
وإلا يديـن العرب تعـطي ومنانـه

لو شحوا الناس ربي يعطي الجنّه
مايـغني إلا كـريم الـوجه سبحانه

والعز للنفس واجب والحيا سنّة
وأنا إيديني من الثنتين مليــانه

‎رشيد الزلامي

فــزعة رفـيقٍ ماحسبت حــسابه
في ساعـةٍ عـذر الــردي بغـيابه

تبقىٰ على طـول الدهـر محفوظه
في صفحة أهـل الطيب وسط كتابه

يخذلك بعض أحيان أقرب مالك
وينفعك مطنوخٍ من أقصىٰ أجنابه

‎غزاي الحربي

من كان ذا مالٍ ولم يكسب الثنا
فلا المال موفور ٍولا الحال كاسبه

والاجواد دون الحال بالمال تتقي
والانذال دون المال بالحال حالبه

ولا خير في حالٍ غلا المال دونه
ولاخير في مال حوى ذم صاحبه

راشد الخلاوي

ألآ يالله اني سد وجهك من الخذلآن
ومن غيبة الغايب ومن موتة الفجعه

ومن صحبة الي نعتبرهم مثل لخوان
وهم ماهم بصــافين وقلوبهم وجعه

وانا م اظلم الي شانهم بالمواقف شان
رجالٍ على دنيا من المجد مضطجعه

منتشريات

اليتم يتم الأدب والموت موت الضمير
والحب حب المعالي باختلافاتها

والجرح جرح المشاعر من لسان الحقير
والصوم صوم الجوارح عن شهواتها

والبخل بخل الغني والجود جود الفقير
والبعد بعد النظر ماهي مسافاتها

والعز عز التقى والصبر صبر الضرير
والذل ذل المعاصي واقترافاتها

.....

راسي تركز فـيـه شـيــبـه وشـبــه
غير جماله عقب ماكان زاهـــي

والشيب ياراسـي نــذيــر مـنـبه
عساه يوقض غفلتي بانتباهــــي

نصف العمر قفا وكــنـي بـغـبــه
مشغول في الدنيا وسالي ولاهي

فرقا الاهل والمال واللـي نـحـبــه
لابد منها غير مدري متاهـــــي

بدر الحويفي

جعل حظي مايطيح ولا يصير قريب
فى نحى اللي تالي الايام جاهم خفه

وجعل طاريه وذكري مايقال امغيب
من هل الامجاد معروفين واهل الوقفه

ولويشيب الراس هقواتي ماهيب تشيب
فالرفيق اللي على ماقيل ماسك صفه

وخل عنك اللي يقول انا تراني طيب
الظروف تطلعه بكره يالين اتعرفه

زايد نوار