فوق هام السحب ( الشعر الشعبي) على متن القوافي

‏مشكلة عقلي نبيه ومشكلة قلبي سروح
‏وبين هذا وبين ذاك آتوه وآجن واعتمي

‏آه من طيش الهيام ونزوة القلب اللحوح
‏اكسروني كسرة الابيات بلسان اعجمي

‏السؤال اللي سلب لُب الإجابة: وين اروح؟
‏وغربتي غربة مشاعر بس لقلبك تنتمي

......

‏يابو ضحكةٍ ماتعترف في وطن وحدود
‏تمر القلوب الصادقه .. دون تأشيره
‏
‏وانا واحدٍ قلبه نظيفٍ وعِرفه زود
‏مهو ب لاحقك شرّه إذا ما الحقك خيره
‏
‏يشوف السنين اللي معك هي عمر و وجود
‏وباقي السنين اللي بليّاك تقزيرره
‏
‏جعل وجهك أبيض من كثر ما يديك تْجود
‏يا ويش الشعور اللي معي منك تأثيره

.......

‏ليت الليالي علمتني بالاقدار
‏كان ابتعدت وزال عني خطرها

‏واثر الليالي ماتبين بالاسرار
‏تضحك لنا ساعه وتبدي كدرها

......

يمكن أبشع صفة فيني الزعل والعناد
‏وأملك أسلوب قاسي بس ما اجرح أحد

‏منطقية حياتي ماتعرف الحياد
‏غصب عني أكابد بالعمر وأجتهد

‏والمفارق مايعني بأن قلبي جماد
‏العلاقات رزق إن ماصلحت ابتعد

‏الحشيمه بتبقى لو يروح الوداد
‏بحفظ العشره بقلبي وأصون العهد

.......

لا تفتح أبوابْ ما تقدر تسكّرها
دامك على قدّ حالك خلك بحالك

ولا تكسر قلوبْ منْت بكفو تجبرها
في ما بها خلّها… وخلك على فالك

المرجلة ما تبي من لا يقدرها
مقصودها وقفتك ماهو كثر مالك

.......

‏حمدتك على خير وحمدتك على مكروه
‏وسبحانك اللي لا ألتجى عبدك، أنصفته

‏أجي لك بوجهٍ ساير الناس ما شافوه
‏على شان وجهٍ ساير الناس عارفته

.......

مخافة الخالق معزه ونوماس
‏ومكارم اخلاق ونقاوه و مله

‏ومخافة العالم نقيصه ووسواس
‏و دناءة اخلاق و جهاله و ذله

‏النار والجنه هي ادق مقياس
‏على مراحل عمر الانسان كله

‏احزن على فئة كثيره من الناس
‏خافت من الناس وماخافت من الله

.......

ياصاحبي وش بك علينا تغيرت
حتى الرسايل من طرفكم قليله

مدري الزمن غيرك ولا تكبرت
ولا الزمن نساك ذكرى جميله

.......

‏صرنا نراقب بعضنا من بعيد لـ بعيد
هو يحتري جيتي و أنا أحتري جيته

هذي حياة العنيد إليا عشق له عنيد
كلن جلس ينتظر حسب مزاجيته

.......

قال المثل من يجهل الصقر يشويه
ومن عرف قد ر الأسد ما يصيده

من داس في رجله على النار تكويه
يتحمل اوجاع الجروح الصديده

وإنسان ما يقطع به العيش ما ابيه
لو كان أقرب شخص لي ما أريده

و الصاحب الي ما يغير مباديه
باعطيه من فيض احترامي وازيده

و الي مرض بالذل ما حد يداويه
لان الهلع والخوف داخل وريده

من كان يعرف قيمتك لا تعاديه
اوقف معه وقت الظروف الشديده

وانسان صاحب مصلحه لا تخاويه
حتى ولو يحلف بسوره مجيده

الصاحب الوافي يجي وقت تدعيه
ما تحجبه عنك مسافه بعيده

و الورد يتقطف على يد ساقيه
لا اغراه محبوبه بجمله مفيده

كثر الثقه بالشخص أحيانتعميه
لو شاف نفسه مفتخر في رصيده

احذرعدوك وان طلب عفو فاعفيه
هذه من اخلاق العقول الرشيده

وانسان ابو وجهين لما تلاقيه
قله تعرفنا وفرصه سعيده

.......