ديوان شعراء السعودية في العصر الحديث (متجدد)☘️☘️

قصيدة عمري


يا قصيدة عمري اللي تكتبيني

كل يوم حرف من نغمة هواك

ارحميني يالهوى والا اذبحيني

لا تخليني معلق في سماك

كل ما اخذتي عمر مني عطيني

لحظة من ساعة داخل حماك

الحياة آشوفها والموت فيني

واعذاب اللي بغاك ولا لقاك

اسهر الليل وقمر طيفك بعيني

والشعاع الصبح يوقظ بي رجاك

أن حدى حادي تولاني حنيني

وإن عرض طيفك على طرفي بكاك

كيف هذا من هوى قلبي يجيني

يا أرق الناس قولي وش دهاك

لو تماديت بملامي سامحيني

قد تماديتي بذبحي من طغاك


خالد الفيصل

تدلل


.

تدلل علينا يا سمي الضبي وش عاد


تدلل ولك بأمر الهوى شافع عندي
ولك في خيال الشاعر المهتوي ميعاد


ومجلس على غيمة وليلة قمر نجدي
أسافر معك لبلاد وانزل معك في بلاد


من غيمة لغيمة ولا للمساء حدي
رسمتك بحروف الفجر يافرحة الأعياد


ولمعة شعاع ينغمس في ندى وردي
وغنيت بك صوتي لقلب الهوى ميلاد


ونغمة غرام ذاب في لحنها وجدي
أشوفك مطر هتان لا برق ولارعاد


من الوسم يبعد بالصحاري زهر ودي
أحبك وسط وبعاد..أحبك رضى وعناد


ولايختلف وعدي ولا ينتقي ضعفي

خالد الفيصل

يوم انا طالب


يوم انا طالب هقيت اني عرفت

كل مافي الكون من سر الحياه

يوم انا طالب تحمّست ووعدت

اني اصلح ما تبيّن لي خطاه

يوم انا طالب على الغيمه رسَمت

ضحكة الدنيا على عذب الشفاه

يوم أنا طالب تخيّلت وحَلمت

اني البس من هَدب شمسي عباه

يوم انا طالب حَسبت اني وصلت

اثرني ما دست بالرجل الوطاه

وانتهى ربيع الاحلام وظهرت

اصدم الواقع ويصدمنى عطاه

ينجرح شوف العيون الى التفت

كن في حجر العيون اكبر قذاه

ان بغيت امشي لقيت انّي وقفت

وان رفعت الصوت ما جاني صداه

الحقايق فاجأتني ما بدأت

والزمان اسرع من اللي في رجاه

وانكسر غصن الخيال اللي زرعت

والتوى صدري على تسعين اه

لكن اني رغم هذا ما انهزمت

واستمريت ادعس الشوك بحفاه

كلما زادت مواجيعي صبرت

بين ثلج وبين جمرات الغضاه

ما غلبت الوقت لكن ما انغلبت

اعتصر نبعي من بطون الصفاه

كلها لعيون معشوقن عشقت

ديرتي ديرة رفيعين الجباه

في ثراها غالي احبابي دفنت

وفي سماها اجمع الحلم وهواه


خالد الفيصل

ياعابر الخاطر


ياعابر الخاطر تصوّرت معناك

لا شك ماكل الخواطر تقالِ

خذ صورتك لَى جيت ساري بمسراك

مالك بها مصلوح تبقى ولا لي

تلقى من الشعّار الاقصين ذولاك

من ياخذ المعنى على كل حال

وأنا اتخيّر من معقّل مطاياك

مركوبة الفكره وافكّ العقال

إمّا سريت الليل مع نجم الافلاك

والاّ مع شمسي تبعني ظلالي

أوزن كلامي قبل يكتب بالابواك

واقلّب المعنى على ماطرى لي

الورد طيبي واتسوّك من الرّاك

والثوب ضافي والقصر راس عالي


خالد الفيصل

طعم الدموع


بالله ..كفو العذل،خلوني اصيح

يرتاح قلبي كلما صحت صيحه

خلو دموعي فوق خدي سوافيح

طعم الدموع لمثل نفسي مريحه

ابكي على حُب ذريته مع الريح

موتي ولا شوف الكرامه جريحه


خالد الفيصل

إنتحار موجه


..

مين يقول الليل للعاشق ضرير...

الهوى في كل وقت له نظر...

شوفت العاشق عن الباقين غير...

له نظر بالعين وبقلبه بصر...

ساهر بالليل فارقت السرير...

والبحر رفيقي بليل السهر...

موجة تسري وأنا فكري يحير...

ليتني يافيصل بسره خبر...

تلعب الموجه وللغبه هدير...

والقمر من فضته رش البحر...

من غزير القاع للشط القصير...

قامت من النوم في لحظة عمر...

شنها عنده اتثنى في حرير...

اسرعت يمب الحبيب المنتظر...

عشقها ترقص على نسمة عبير...

ترتفع ثم تنعصر ثم تنحدر...

ساقها شوق على العاشق خطير...

شوق من يهوى مواعيد الخطر...

خلفه خواتها صفوف تسير...

هايمات مايعرفون الحذر...

زفها في محفل الزار الكبير...

كل مسحور بشيطانه حضر...

تلتوي في ثوب أبيض ثم تطير...

في حضن شط تحبه تنتحر...


خالد الفيصل

لبست الليل


لبست الّليل وعانقني قمرها

وزفّتني نجوم الليل ساري

ركبت الموج أسافر في بحرها

على شطّين ليلي مع نهاري

وعيني صاحبت لاجلك سهرها

وقلبي وهّج الظّلما بناري

غروب الشمس أواصله بْسحرها

بنورٍ من شعاع الحب جاري

وإذا شفتك نسيت أطول شهرها

وطارت فرحتي والوقت طارِِِ

ضحك في عيني بشوفك بصرها

وغنَّى سمعي بْصوت الكناري

وهلّت غيمتي باحْلى مطرها

وطالت كل الأغصان القصارِ

رعاك الله يا ناعم زهرها

تفوح بريحك ريْاض الصحارى


خالد الفيصل

حدني وقتي


حدني وقتي على شين جديدِ

السهر ما هوب من عادة عيوني

أَبعدوني عن هوى بالي وسِيدي

وامنعوا عنّي خطوطه ياصلوني

شطّروني عنه في دارن بعيدِ

حسبي الله كانهم منه اقطعوني

صارت الفرقا لنا علمن وكيدِ

ليتهم راحوا وأنا عنده نسوني

عاقني عن صاحبي سورن حديدِ

دونه البحور حراسن ودوني

الرجا بك يا بو خالد يا عضيدي

لا تخلّيني تراهم عذبوني


خالد الفيصل

الزكمة


تجيني على موعد ومن غير موعد جت

وأنا ما دعاني للوصل شوق ومشتاق

تجيني متى شاءت لها كل وقت وقت

تهز البدن والروح ما دونها واقي

وإذا ما هقيت أني من معاشرتها مت

تفهق وأشوف بقى بالعمر باقي

وفاها معي يذبح ورا ما تخون وخنت

أبا أسمح جعله اتلى مواعيد الأشواق


خالد الفيصل

نستعجل الأيام


نستعجل الأيام وأعمارنا ايّام

والشّيب يطغى والأماني فتيّه

نهاري أقفى واجمل الحلم قدّام

والحال يضعف والهقاوي غنيّه


خالد الفيصل