اخترنا لكم

أصعب شعور انك تمثل على الناس
‏وتظهر قبل حلـــو الكلام ابتسامه

‏ويظهر على وجهك علامه من الياس
‏والضيق له بين الحــواجب علامه

.....

‏يوم طاب السهر عيت تطيب النفوس
‏جت من الله وأنا كم كنت محتاجها

‏كنها من حلاها كل ليلة عروس
‏خايفة من عيون الناس وإحراجها

.....

دار الزمن حولي وانا في مكاني
حاولت ارجع كل شي لا مكانه

لاكن حسافه مافهمني زماني
ولا فهمته بعدما اسرج حصانه

.....

‏يا مُنــادي إذا ناديت فينا شديــد
ودهم بـس والا فأبشــرك بالسعد

كلنـا يد وحــده عنــد رأي السديد
يأمـر الحاضـر الغايب وجاه المدد

عند زحــف الكتايب ما ندبر شريد
من حضــر مننا غطى وما أحد رقد

في حِمَــانا تقَدِّم كُل أُسْرَة شهيديد
قافِلــة خِيرة الجدعــان واَحنِج ولد

وإن قـدرنا عــدلنا وإن نقصنا نـزيد
من طناخة بنــي عمي نسينا العدد

الله اللي خلقنــا احرار ما احنا عبيد
لو تقــوم القيامة ما خضعنـا لاحد

.....

‏اصبـر على الـدنيـا وقـدر ثمنهــا
ولا تبيــع الاخـرة لاجــل دنيـــاك

بالعقل تعـرف قبحهـا من حسنها
وبالقلب تعرف من يحبك ويشناك

ان اقبلـت لا تأمـن العيـــب منهـا
وان ادبـرت نـوخ على الله مطـاياك

الاقــدار ما تعمـي اذا الله دحنـــها
والابصـار ما تنجيك لو جت منـاياك

.....

يا كثركم يا جعلكم ما تكثرون
‏ياهل الهروج اللي ما منها فايده

‏وقت العوافي تذبحون وتصلخون
‏وقت القسى ماتنطحون الكايده

.....

من جـاد لك جـد له وخصـه بتقدير
واحرص على وصله وعطه اهتمامك

وان كان قـصّـر فالتمس له معـاذير
وافـتـح له ابـواب الـغـلا واحـترامك

ما ينـكر المعـروف من يبـذل الخـير
والطيب حـبـله بـين الاخيـار سـامك

.....

يالله يامجري تصاريف الاقدار
ياعالمٍ جهري وخافي السريره

اعوذ بك من عثرة الوقت لا دار
واسألك توفيقٍ وحسن البصيره

.....

الجرح لا طول يجي فيه التهاب
‏مير التحف عنه العباه الدافيه

‏دور علاجه في الطبابه والكتاب
‏وأحذر تولع ناره اللي طافيه

‏كثر المجامل يورث النفس العذاب
‏لكن لا تجرح نفوسٍ صافيه

.....

‏المواقف تكشف الطيبين من الرخوم
وكل طير سـود الايام تكشف برقـعه

.....