ديوان الأمير بدر بن عبدالمحسن

أنا فدا اللي ما انتظر مني أعذار
وما لامني وأنا أستحق الملامة

ما غير ينشد عن علومي والأخبار
أخَّر عتابه لي وقدم سلامه

البدر

اخاف انساك وتطلع منتظرني
واخاف انتظرك تطلع ناسيني

البدر

استخرت الله وبرجع استخير
كان فيك الْخير ماتبعد ابد

وكان فيك الشّر يمحيه ويصير
فيك خير وماتفارقني أبد

البدر

احتريته في صباح النايمين
ووجهي الذابل تعابيره أفا

ياعيوني لبه باقي تحترين
لو يحبك عن وصالك ما غفا

البدر

يطيح جفن الليل واهز كتفه
يفز شمع وباقي الليل مطفي

واحاكي الجدران عن حلم غرفه
ما تشبه الجدران ويطول وصفي

وتملني الجدران واظهر لشرفه
تحت السما واسكر الباب خلفي

ليت الشوارع تجمع اثنين صدفه
لا صار شباك المواعيد مجفي

وليت الروابي تشرب دموع وطفه
ويصب لمع بروقها وسط طرفي

يا طاري الغدران والعمر رشفه
مع قلها ياليتها اليوم تصفى

الصبر واجد مير الأقدار صلفه
والأرض واجد لكن العزم منفي

اللي أعرفه راح ما نيب أعرفه
ولا اظن يذكرني إليا اقبلت مقفي

ما هو حبيبي مورد القلب حتفه
ولا هو حبيبي يفرح بوقت ضعفي

تهب ريح وتسكن العظم رجفه
وتغيب ريح وتسكن اغصان نزفي

مر ثمر ها الليل وأمر قطفه
ذقته قبل يلمس شفاهي بكفي

هذا وتو الليل ما راح نصفه
يا ليل بعض اللي مضى منك يكفي

البدر

بـنلتقي واحضن كفوفك في يدي
واسولف لعينك كيف كانت لهـفتي

البدر

القصايد ما تجيب أقصى جمالك
كل شي فيك يستاهل قصيده

البدر

انا سجين الحال مهما تسليت
وانا الطليق وكل شي قبضني

البدر

ما نشدت الشمس عن حزن الغياب
علمتنا الشمس نرضى بالرحيل
كل يومٍ يغرق الضي افـ عباب
ما سمعنا ناعي ٍ مابه عويل

وما هقيت الموت يجرحني جواب
لين شفتك في سما عمري اصيل

علميني ياللي كفوفك سحاب
وابتسامك غيث واهدابك نخيل

وش أسوي لا دخل فصل الضباب
وكفت عيوني وضيعني الدليل

حاجتي والشيب بهديني الصواب
حاجتي لك ما مضى افـ عمري حصيل

آه يا سلمى مضى وقت العتاب
والحديث اللي باقوله لك طويل

اعتذر يمه حصل مني غياب
واعتذر ازريت لا ارد الجميل

من يجازيك وعطاياك الشباب
والله العالم ترى ماني بخيل

يوم انا عاري غديتي لي ثياب
وان شكيت الضر شافيتي العليل

ويوم كبر الطفل ولمتي الزهاب
كل ما في الكون من طبعٍ جميل

هي درت حايل وهذيك الهضاب
عن غيابك هو درى الروض المسيل

بنت من لا ثوروا فوق الركاب
ما يباريهم سوى نصل وأصيل

واخت من لا كسرت سمر الحراب
من عنيف الطعن ردوا للصقيل

وام من جدانهم مثل الشهاب
كاسبين المجد من جيلٍ لجيل

يالله المطلوب يا جزل الثواب
تجعل الجنة لها ظلٍ ظليل


البدر

الناس ما همَّها ظروفكْ
كود الذي يحزن لغمّكْ

وإن شلت حملك على كتوفكْ
بتموت ما أحدٍ ترى يمّكْ

البدر