فوق هام السحب ( الشعر الشعبي) على متن القوافي

أقبلـي يـا طب قلبـي وإرتياعـي
أقبلي عقب المسافات الطويله

واحضنيني يا جميله من ضياعي
الضياع اللـي مـاخـلا لي وسيلـه

مرحبابـك من ذراعي لـ ذراعـي
جابك الله علم وأنتي حلم ليله

يا ثمر قلبي وشوقي وإندفاعـي
يا غناتي فالسنين المستحيلـه

......

يا من تطلب الله كثّر الحمد والتكبير
وعلى الحمد والتكبير داوم ولا تجنب

طلبته وانا مذنب وكثر علي الخير
فما بالك بطلبة فقيرٍ ماهو مذنب

......

تغانموا فعل الجمايل مع الناس
‏الناس صعبات الظروف اجرحتها

‏فعل الوفاء والخير فالناس نوماس
‏الطيب فوق الأرض ماهو تحتها

......

مهما الزمن يخفيك ياراعي الطيب
يبقى شذا طيبك على النفس طايب

وفي كل يوم تشرق الشمس وتغيب
تبقى رفيق الروح .. وإن كنت غايب

......

ياسامرين الليل في بحر الاشـواق
‏ياليتني معكم يلـوح شراعـي

‏بين القمر والموج لمعه وبراق
‏والنسمه العذبـه للاحبـاب داعِـي

‏القرب ياالغالين للروح ترياق
‏والبعد ذباح القلوب الوجاعـي

......

لا تمادى فالخطا مرّه و مرّه
‏غلطة العاقل تنقّص من وقاره
‏
‏ان تشرّهنا لنا حق إنتشرّه
‏وإن سكتنا يفهم الحر الاشاره

......

من بادي الوقت هذا طبع الايامي
عذبات الايام ما تمدي لياليها

حلو الليالي توارى مثل الاحلامي
مخطور عني عجاج الوقت يخفيها

أسري مع الهاجس اللي ما بعد نامي
وأصوّر الماضي لنفسي وأسليها

أخالف العمر أراجع سالف أعوامي
وأنوخ ركاب فكري عند داعيها

تدفا على جال ضوّه بارد عظامي
والماء يسوق بمعاليقي و يرويها

إلى صفى لك زمانك علّ يا ظامي
اشرب قبل لا يحوس الطين صافيها

الوقت لو زان لك يا صاح ما دامي
يا سرع ما تعترض دربك بلاويها

حتى وليفك و لو هيّم بك هيامي
صيّور الأيّام تجنح به عواديها


الأمير خالد الفيصل

يا عقاب مدري مدح والبستك اوشاح
والا الرموز يْحلها من طرقها

يا سيّد الزرقا تعلّي ومرواح
لن سقتها مع قبة الكون سقها

تكّي بصدرك للذعاذيع وارتاح
وافلج محاديب السحايب وفقها

خلّ السواري عنك وانزاح وانزاح
واعلا مراقيبٍ على الجدي وقها

مثلك ليا ستّل جناحه مع الضاح
وارخى سمار الريش في معتلقها

استسلمت كل الجوارح لمن شاح
عنها وجدّد من علّوه رهقها

سيفٍ ليا جرّد على الصيد ذبّاح
وموسٍ ليا ناش الضوافي حلقها

اهواي نجم وكفختك بارقٍ لاح
وتكبيرة الميت على اللي لحقها

وما بين مخلابك وفلاج الاصباح
بيض الثنادي قبل يرهج علقها

زوعتك سيل وطعنتك عَيْلم ارماح
من مخلبٍ واليا صفقها صفقها

لا ملت شلت ولا تواسيت وان طاح
ضلّك على كبد الطريده فلقها

والا ليا نشت الخريشه من الراح
ما كن ربك بعد تدمي خلقها

واليا شلعت وجالك صْياح وطْياح
كنّك وكنّ اللي ذبحها وفقها

وصف الاصيل اللي ليا لز طفاح
هذي توطاها وهذي فهقها

عن بعد حر ولا تقاربت سراح
وان جيت عبد اضنى الحرار وعتقها

واخطا عليك مْسمي الصقر يا صاح
بالحر وانت الحر للي فرقها

وشلون حر وجذب راسه بْملواح
عيشه على كف الرجال وْعرقها

وانته سندك عْضود وصْعود وجْناح
وحداد سم الطايره في شنقها

ما ذلّك البرقع ولا ردّك صْياح
ومن حيث ما تبغى مع الكون سقها



خالد العتيبي

خلوني ارقـى عاليـات المراقيـب
في تختخ ما حولـي الا الهبايـب

في عالي مدهال عكـف المخاليـب
شقر الحرار اللي تعلـى الرقايـب

واسلى من هموم سواة المغاليـب
صكت علي ما بين مخطي وصايب

واشوف روض فيه حرش العراقيب
خطل الايـادي زاهيـات الجنايـب

جرد الرقاب اللي عليها الكلاليـب
هزع الفقـار ونابيـات الترايـب

فجح من السيقان سود الحنازيـب
وساع النحور بشوفها البال طايـب

فنس الخشوم اللي ذنيها نواصيـب
روس السهوم مركزات الحرايـب

ذود لنا من عاد وقـت المكاسيـب
ماجات في سوق الجلايب جلايـب

اليا مشت تبري الجروح المعاطيب
كنها على الممشى تقـود الكتايـب

يازينها في ساقة السقس والجيـب
في فياض نجد اللي سقته السحايب

والعمـر مـره والليالـي مكاتيـب
والموت حـق والمنايـا سبايـب

وانا من الدنيا خذيـت التجاريـب
توني شباب وفي التجاريـب شايـب

اقدر اللـي يقـدرون المواجيـب
من قاصي العربـان والا القرايـب

وابعد مجالي عن ربوع العذاريـب
قلال الروابـع تابعيـن النسايـب

ياقربهم اليـا صفـن المشاريـب
ويابعدهم عنـد احتكـام النوايـب


خليل بن هدلان

واطيري اللي مانبي غيره خيار
حر كما وصف ثلاث بوفاها

عدل المناكب لابرق الريش حشار
لاشاف حفال الحباري نصاها

يودع بديد الريش بالجو نثار
وعينه كما عين العديم بسناها

ليا انطلق يكرك تو الخرب ماثار
وصكه بكفه والثنادي فراها

هديته عصير واثر طلعه طيار
طالع خلوج مقفيه واقتفاها

وسقت الونيت بساقته حد الاسفار
والارض ماانظر رملها من حصاها

بس العيون بساقة الطير سمار
ونظرات عيني شاطحه في سماها

والشمس غابت وحال من دونها ستار
ليل غشى روس الجبال وغطاها

وامسيت بالحروة وبس اقعم النار
واقول كود اللي يجيبه سناها

واصبحت في راس الطويلات سبار
ولابه طويل الا ونيتي رقاها

واصيح بالملواح واقول نصار
واصيح صيحات يجلجل صداها

وانكفت ميس منه من عقب ماصار
ونصار مدري وين دار نواها

تكفون ياللي مولعين وصقار
وحروات طيري تضربون بحراها

ترى وصوفه بينه ياهل الكار
اوضح من شمس الضحى في ضحاها

اشقر وفيه دقات رشات صغار
بياض على ذيك المناكب زهاها

حرش كفوفه مخلبه تقل شنكار
افجح حنف هجر الكراع بوفاها

تضفي سراويله على الوكر لادار
وحجول سبقه من رهاها يخطاها

والزور طالع والثنادي له كبار
متفهن الجنحان عدل سواها

وعنقه طويل وجوهره يعيط انوار
لاقام يهاوز طلعته وانتواها

افدع تقول جفون عينه صبر نمار
والعين عين اللي غضبها ملاها

عين العديم اللي حضر صيحة الجار
فادى بنفسه والقوافي نساها


عقاب بن مصقال السهلي