فوق هام السحب ( الشعر الشعبي) على متن القوافي

لاباعك اللي بعت روحك عشانه
لاتنصدم منه ترا الناس اجناس

شخص تحبه مايصون الامانه
وشخص يبادلك المشاعر والاحساس

حط للذي شاريك قدر ومكانه
حطه لوحده لاتحطه مع الناس

......

‏احذر تصك الباب في وجه من جاك
واحذر تبيع انسان بهالوقت شاريك

ولا تحقر اللي بالليالي يبي رضاك
ولا تشتري اللي بالزمن ما يدانيك

......

‏ياليال الــــــود ودي له رساله
لا قــــــراها يعرف أني مانسيته

عـــــلميه أن الغلا فاحت ادلاله
فوق جمر الشـوق يومن أحتريته

مانسيته لـــــو طراله ما طراله
ساكن بقصاالحشاوالقلب بيته

......

الصبر هيبه والتواضع معزّه
وخير الكلام اللي به الصدق موجود

ومن لا يعزك ... جنبه لا تعزّه
م انته على اللي تكره النفس محدود

ولا فيه شخصٍ في حياته منزّه
ألاّ النبي المصطفى .. منبع الجود

( صلوا عليه وسلموا كل حزّه
خير الأنام اللي بالافعال محمود )

بقلمي

‏يالعزيز الي ما نعبد ولا نحمد سـواك
‏نفسي اشملها برحمتك واغفر ذنـبّـها

‏كل ما يـذبحني الهم يحييني رجاك
‏اشكي اللي تجهل الناس وانت اعلم بها

‏جعلني من سو الاقدار دايم في حماك
‏وجعل عمدان الهقاوي ما يِـقطع طنبها

‏انت ملجا كل خايف وميقن كل شاك
‏وكل نفسً ندري ان ذنبها في جنبها

.....

‏كل ما شانت وجيه الناس وسّع صدرك
‏لا تحسب إن في يدين الناس نار وجنّه

‏القريّب لا تكدّر خاطره وإستدرك
‏سامحه وإن جيته بزلّه تسامح منه

‏ولا تعلّق خافقك باللي ما يحفظ قدرك
‏كثر ما تقدر توخّر عنْه وخّر عنّه

......

‏ياخاطري لا باح صبرك ومليت*
‏مالك عن المقسوم صده وحيله

‏ان زان حظك جاب لك ماتمنيت
‏وان شان خلا الهينه مستحيله

......

‏ليت الليالي علمتني بالاقدار
‏كان ابتعدت وزال عني خطرها

‏واثر الليالي ماتبين بالاسرار
‏تضحك لنا ساعه وتبدي كدرها



.....

أنا مُسالم ماحب العداوات
العمر فاني و الليالي قصيرة

ترى السكوت أحيان مثل الاجابات
الصمت نعمه له معاني كثيرة

اللي يعيش الوقت عنده قناعات
لا مات يبقى عند الأجيال سيرة

ماهو ضروري تعيش عندك علاقات
العزله أحياناً علاقة كبيرة

......

أطيح وأقوم وأرجع اوّقف لحالي
والعون من عند ربي جل تقديره

ويالله ياللي عليم بضيقة أحوالي
أنا بوجهك من الحاضر وتدميره

يالله لا تحوجني لطلب انذالي
اللي على لازمي تكثر معاذيره

اما تجي مثل ماودي ويحلالي
ولا عساها تروح وجعلها خيره

......