اخترنا لكم

لو حصلي شوفته همي يزول
وقتها أنسى البشر وأجلس معه

وأذكر إني بغيبته دايم أقول
هو حياة القلب وهو له مطمعه

.....

‏يانجد انا شاعر واحاسيسي كبار
‏وانتي بعد عليا مقام وكبيره

‏جيتك وانا موقد على شوفتك نار
‏كيفي عليها حابكه ماستعيره

‏رغباتي الدله واحاسيسي بهار
‏وفنجالها قافن ماهو مثل غيره

‏من شفت خطوْ إسمك على الذاكره مار
‏عرفت باني رايحن معك ديره

‏ماخترت احبك بس الأيام خطّار
‏ يجي معاها شي نجهل مصيره

‏ قلّطت جمع سهومك بصدري يسار
‏ وزبّنتها طيب وتقاليد جيره

‏انا طويل الباع يا اطوال الاعمار
‏وانا الشوير اللي لاجيت استشيره

‏عليك أنا وعزومي نشق الأقطار
‏اقعد يابو مدري بجنب أبو حيره

‏مشاعري لك ملك ماهي للاجار
‏ وعليك شاعرها مريّح ضميره

‏انا ابن عم لقلبك الطاهر البار
‏ لو كان مابيني وبينك عشيره

‏افتح علشانك من الضيقه زرار
‏واقفل علشانك مداخل كثيره

‏وشلون ماحبك وأزيّن لك أشعار
‏لا صرتي الاولى معي والاخيره
‏
‏لو بيني وبينك مسافات وأقفار
‏نبتك بقلبي كثر الله خيره

.....

ماهي صدفه هذا من سوء إختياري
وش يجي من الحب إذا ماجتك خيبه

راح أصحح غلطتي وأخذ قراري
وأترك الفرقا تجيب اللي تجيبه

ليتني مبعد فتيلك عن شراري
كان باقي ما أشتعل قلبي بشيبه

بأبتعد وأرد بالصد إعتباري
لو حياتي من بعد وصلك غريبه

لا رجوع ولا خضوع ولا طواري
ولا حنين ولا ملاقاةٍ قريبه

الصدر صدري وهذي النار ناري
ولو نَحَب قلب محد سامع نحيبه

كنت أشوف الغلطه بعينك وأداري
كان باين فيك شك وفيك ريبه

وأنت داري وقتها أني كنت داري
الأسف بعد الخطأ أكبر مصيبه

كل دار تلمنا ماهيب داري
وكل درب يلمنا الله حسيبه

إنفض غبارك وأنا بأنفض غباري
الجريح يطيب لا فارق حبيبه

.....

مبارك المطرباني يقول :

صدّت تبي يعني تغلى يابلفيت
‏قصايدي فيها علي كبرّتها

‏والله ماعاد تذوق مني ولا بيت
‏إلا رثاها لاسكنّت مقبرتها

لكن اعلن انهزامه بعد ماساقته الهواجيس
لدروب حبيبته وقال :

وأرضيني أدنات حاجه منكْ ترضيني
‏خيْطي معاليق قلبي وأخمدي ناره

‏لعيونش السود كن القاف يدعيني
‏أطاوع القاف تاره والعنه تـاره

‏ماردني عن سواد عيونش يْميني
‏كتبت فيها قصيد وسقت كفاره

محتاج دربٍ يا أول شفّي ومسعاي
‏وشعرٍ يواسي شعور الصمت والغربة

‏محتاج نورٍ يبشرني على رجواي
‏وأعرف هذا السديم إن طال يا قربه

‏محتاج فجر وسكينة لين أعس أقصاي
‏محتاج شيءٍ يرجّع روحي الطربه
‏
صالح الهويملي

‏على دربك لو إن العمر يوقف تمشي الاقدام
‏إلين اموت ابيك وغيرك من الناس ما ابيها

‏یا روح الشعر وحروف الكلام وسطوة الالهام
‏احاسيسي معك ماني بعارف كيف اخبيها

‏یا مرساي الاخير وذكرياتي في مدى الاعوام
‏يا ضحكة وجهي اللي تذبح اشواقي وتحييها

.....

‏عفى الله عن مواعيد إنتظارك والسنين حيام
‏وقفت وما معي غير الوله واقف ومتسامي

‏يخوّفني ضجيج الشوق لا ارتاد الطريق العام
‏وتغيرت بكل إتجاهاتي وتأثيري وهندامي

‏حرارة فقدك اقسى ما تجيبه بارد الانسام
‏وانا للحين من حر المفارق ترجف عظامي

.....

‏وش ذنبنا لا صار منطقنا صحيح
وقلوبنا ما كل من جاها قَلَط

‏حنا نحب الصدق ونقول الصحيح
‏والمشكلة بالناس تفهمنا غلط

.....

ودك تحطه بالعيون من العيون
‏وتبسط على رمض الثرى يمناك له

‏وتظله من الشمس في ظل الجفون
‏ولا يمر اذنه سوى لبـّاك له

محمد بن فطيس

هي راس مالي والعرب مايدركون
‏اني على باب الممات وماحكيت

‏يا قو قلبي يوم قفن الضعون
‏الي على ذاك الموادع مابكيت

‏وياصبر صبري والعواذل يحسبون
‏اني دلهت من الهوى ولا سليت

‏اسكت عساهم من اسكاتي يسكتون
‏وانا عن الي في ضميري مانتهيت

محمد بن فطيس