اخترنا لكم

كلش يهون إلا الكِبر والتغطراس
‏هذي هي اللي عاقبتها مخيفة

‏وأبغى أعرف ليش التكبر على الناس
‏وبدايتك نُطفة وتاليك جيفة

ظافر بن فرحان

يا رب لا يفرح بنا كل شمات
‏ولا تحمّلنا ما لا نستطيعه

‏يا باسط الأرض وبديع السموات
‏تستر من صدوف الليال الشنيعة

‏ما نطلب ولا نرجي إلا أنت بالذات
‏ونفوسنا ماهي لغيرك مطيعة

‏وإن ضاقت الدنيا علينا سهالات
‏صدورنا من فضل ربي وسيعة

.....

من لا يكون بحوزته غير شاكوش
‏شاف الجماعه كلّبوهم مسامير

ناصر الفراعنة

أطى على نفسي برجلي وأهينها
ولا يهينها واحدٍ ما يعينها

أطى عليها من غلاها وعزها
يكفل لها التوفيق باقي سنينها

طاوعتها وقت مضى سافطٍ لها
وأثر دلال النفس لازم يهينها

علي أبو ماجد

فمان الله والعذر السمين أبلغ من التبرير
‏عفى الله عن خطايا اللي خطايانا على شانه
‏
‏فمان الله يالغصن اللّيان اللي هَجرك الطير
‏هذا طيرك يبلغك السلام بروس جنحانه

‏سمحت من المحبه وسامحني على التقصير
‏وصلنا آخر حدود العشره اللي مالها خانه

علي الدعيه

ماعندنا في القدس موقف حيادي
‏ القدس تبدا منّنا وْتنتهينا

‏وتبقى بلادي ثابته في المبادي
‏ولو حاولوا التشكيك منّا وفينا

.....

طويل عناني صقيل سناني
سليط لساني ملي الخزاين

شجاع منجى كريم محجى
أحل المسجى وأدل الدفاين

أفد المطايا وأصل السبايا
وأشق السرايا وأفك الرهاين

أنا ثمان السبع سبع العجايب
وعندي بدال المكينة مكاين

ناصر الفراعنة

عليت ياللي بالحشا طق الأوتاد
بالجنة العليا عسى لك مكاني

نزه عن الأدناس ما جاه نقّاد
يا نافلٍ جيله بكل المعاني

زيد الخشيم الخالدي

مهما يكن بين العرب من خلافات
‏جميعهم في ساعة الضيق واحد

‏يا غَزّة الإيمان صيحي في الأموات
‏لو ما يقوم من العرب غير واحد

ناصر الفراعنة

من التوافق بين الشعر النبطي والشعر الفصيح
هو قول الشاعر الكبير عبدالله بن نايف بن عون:

‏لا تبدي الشكوى ولو ضامك الشيل
‏إلا على رجل ً يحسّ بوجعها

‏وقول الشاعر الكبير كريم العراقي:

‏لا تشكُ للناسِ جُرحًا أنتَ صاحبه
‏لا يُؤلم الجرح إلا من به ألم