فوق هام السحب ( الشعر الشعبي) على متن القوافي

‏دكتور زاد الشوق في داخل اعضاي
ابغــا عـــلاج الشوق وابغـا أدله

هل تمتلك ياسيدي طب شكواي
ولانصحت القلب يوقـف محله

حب الزمن هـذا تفاصيل بلواي
اخذ الحبيب الزين قلبي وشله

ماكنت متوقع من الشوق إغواي
وإلا عـذاب الحب يأتــي بعله

لاكن وقعنا زادني الحب إغراي
حتى تمكـن واسكن القلـب كله

......

ياشيـــنها لا صـرت معـجب من الــروح
في شخـص گنــه بالغـلا قطــــعةٍ منــك

لا تقـــدر تعــــــبّر ولا تقـــــدر تبـــــوح
مشغـــول به بالك وهـــو ما درى عـنك


......

‏عزالله اني يوم حبيت . . حبيت
‏ماكنت احسب الحب هذي علومه

‏ضحيت واخلصت وعطيت وتفانيت
‏لو ان نفسي من عطاي محرومه

‏الظاهر اني طحت وانا ماسمّيت
‏ما اظن لي من بعد ماطحت قومه

‏ماجت لي الدنيا على ماتمنيت
‏حلمت والاحلام شبه معدوّمه

......

احيان بعض المعارف مثل فعل الذنوب
‏يبلى بها الادمي بلوى مضيّع صلاه

‏ياطيب بعض المعارف مثل وقت الغروب
‏الناس تسعد بشوفه لو قصيرٍ مداه

‏الله خلقنا على الدنيا وفينا عيوب
‏الكامل الله وحنّا كلنا في ذراه .

‏
سياف بن عبدالله

يوم الوفاء طبعك وانا عند ظنك
‏أعاتبك وأشره ولارحت عودت

‏واليوم لاتشره لو أبطيت عنك
‏على كثر مافي وصالك تجودت

‏لا عاد تنشدني عن الشوق لانك
‏عودتني … على الفراق وتعودت

......

عادالمساء والقلب ينبــض مساءخير
عســى يــدوم الخيــر دائــم عـليكــم

أسعد مساكــم ماسبح بالسمـاء طيــر
يا من فــؤادي بالـــــوفـاء يحـتـويـكم

......

‏الماضي اللي عطى قلبي شعور الأمان
‏في ليلةٍ يسري الساري .. على رعدها

‏خلّاني آقول لي كلمة .. عليها ضمان
‏ياسعد عينٍ ما جاها الحب يا سعدها

‏من جرّب الشوق واللهفة لنفس المكان
‏لا ينصدم فـ الليال إذا أخلفت وعدها

‏أنا لـ هالحين عايش في هذاك الزمان
‏حبّيت مرّة وخفت آحب .. من بعدها

......

‏نمشي على الأرض دام الأرض ممتده
و إن أظلــم الليــل ما تهنــا و لا ضعنا

عشنــا التجـارب و ذقنا الليـن والشـده
و عجايب الوقـت توجعنا وتنفعنا

......

كل البشر بانواعها تملك احساس
لا يغرك اللي ما بعد جاك يشكي

ترى اللي يضحك دايم ويسعد الناس
لو سولف . . وقال الحقيقه بتبكي

......

خيــر الكلام اللــي قليله يدلـّك
أخير من واجد ولافيه مضمون

بعض العرب هرجه كثير ويعلّك
دايم وهو مابين قـالوا يقولون

......