فوق هام السحب ( الشعر الشعبي) على متن القوافي

‏أحتري جيّتك وأتعبني الأنتظار
‏وقفي دقة الساعة بـ صوت الكعب

‏ذقت رغم الهزيمة لذة الانتصار
‏أشهد ان الهوى ما هو بـ مزح و لعب

‏بتغانم زماني معك ليل ونهار
‏حتى لو حالتي حرجه وظرفي صعب

‏وأتركي من يقول أن المحبة دمار
‏وبشري من يدوّر راحته بـ التعب

......

‏لا تعوّدني على شي وتغيّر
‏أَبسط أَبسط من ظنونك مطمعي

‏طبْ بين جروح مَفتونك .. تَخيّر
‏إدفن اقساها و ريّح مَسمعي

‏غنّ لي يا قبلة النّور المذيّر
‏انثري مِن طول ليلك واجمعي

‏لك وطن صدري تحت حكمك مْسيَّر
‏استبدّي واستردّي واقمعي

......

‏ان جيت قلنا مرحبا بك وحياك
‏وان رحت قلنا رافقتك السلامه
‏
‏لاني ولي امرك ولا من دناياك
‏ولا محاسب عنك يوم القيامه
‏
‏روابطي بالناس مثلك وشرواك
‏بيض الهقاوي والنقاء والكرامه
‏
......

‏تبختري ياكبيره بييين كل الحضور
‏واستفردي بالقصايد واغِري أوزانها

‏واطغي على الناس وامشي بالدلع والغرور
‏انتي من اكبر حمايلها و شيخانها

‏عيونك اللي تحلّى بالتعب و الفتور
‏مدري متى الله يخفف من طَيشانها

‏غيداٍ ترد المعيف من الزمان الدهور
‏للواحه اللي تهب النود بـ اغصانها

......

قالت من انت وقلت مجموعة انسان
‏من كــل ضــــد وضــــد تلقين فيني

‏فيني نهـــار وليــــل وافـراح و احزان
‏اضحــك ودمعي حــــايرٍ وسط عيني

‏فينـــي بدايــــة وقــت ونهاية ازمان
‏اشــتاق باكــر واعطــي امسي حنيني

‏واسقي قلـوب الناس عشقٍ وضميان
‏واهــدي حيارى الــدرب واحتار ويني

‏واحـــاوم طـــيور السما حوم نشوان
‏واســـيل الوديــــان دمــــعٍ حــزيني

‏في عينـــي اليمنى من الـــورد بستان
‏وفي عينــي اليسرى عجــاج السنيني

‏تهزمنـــي النجــــلا و انا نـــد فرسان
‏واخفـــي طعـــوني والمحبـــه تبيني

‏ان ما عــرفتينــــي فلانيب زعــــلان
‏حتــى انـــا ترانــــي احتــــرت فيني

......

مع السلامه فمان الله وحان الضياع
‏يهوّن الله تعب قلبً لقى ما لقا

‏دروبك وساع ياراع العيون الوساع
‏يااول محطه شقا واخر محطه شقا

‏رغم اني اخترت احبك حب حتى النخاع
‏ماخترت اشوفك صديق بقائمه الاصدقا

‏كانت خطاويك شبر وخطوتي لك ذراع
‏وتنزل من عيوني احبابي وحبك رقا

‏ومن القناعه جهلت اللي خلاف القناع
‏ايلين خابت هقاوي القلب ف اللي هقا

‏ومن بان وجه الحقيقه عقب زيف الخداع
‏صرت اعرف الساقي بيسقى مثل ما سقى

‏وصار اختياري لـ بعدك في حياتي متاع
‏وفارقتك بطيب نفس وطيب قلب ونقا

‏و كثر ماوقفت للفرقا وقوف الشجاع
‏قدرت اوقف ولكن الظروف محقا

‏معوداً قلبي انه ماااا يخاف الوداع
‏من وين جبت الوداع اللي بثوب اللقا

......

‏عيني بعينك صمت وإحساسنا تم
‏قلبي على قلبك شروهه تراكى

‏كم لي على لامـاك ، مافادني كم
‏وجروح صدري فـ الحنايا تشاكى

‏ماهمني لو عشت من هم في هم
‏دون [ الكرامه ] لو يبونا إنتذاكى

‏مشاعر الاحساس أصدق من الفم
‏خل المشاعر بالمشاعر تحاكى

......

‏أنادي من سكن بأقصى فؤادي
‏على منهو نفس روحي وزادي

‏يزور العين طيفه ثم اضمـه
‏واحس ان الهواء عطره واشمه

‏صحيح ان الزمن فرق حبايب
‏وانا رجواي في انسان غايب

‏انا وياه والذكرى الجميله
‏خليلٍ ما نسى عشرة خليله

......

‏ترا الشعر ما يدوم ولا تدوم الحياه
‏والدايم الله ولا تنسى دوام الاحد

‏والشاعر اللي قصيده يلفت الانتباه
‏يطلع بيمناه مايطلع على كتف احد

......

أحدن على ربعه شجرته مظله
‏وأحدن على ربعه سموم ولواهيب
‏ٰ
‏وأحدن وجوده بس بلشه وعله
‏وأحدن وجوده يبري الجرح ويطيب

......