فوق هام السحب ( الشعر الشعبي) على متن القوافي

الشوق يذبح والمعاني لها بوح
بسمعك سطر له الصوت مبحوح

دامك عزيز النفس في الناس مرتاح
تستاهل المهره معا الصقرياصاح

......

‏ترى خوة الشاعر مثل خوة المسؤل
وانا خوة الاثنين ماني بدانيها

لولا المبدع الرجال والطيب المقبول
تركنا بيوت الشعر للي يغنيها

......

‏لا تعاتبني على قل اتصالي
وأنت تدري لو تبيني عند عينك

ولا تحاسبني على الغيبة لحالي
قبل تسأل أنا ويني أنت وينك

......

‏ما عندي الا حزن ليل وقصيده
وانسان متكبر على فرحة الطيش

اما اعتنق فرحه بفرصه سعيده
والا بلاش العيش مثل الخفافيش

......

‏تـرى الوفا و الصـد كلـه توافيق
ونفوسنا شافت كثيرً و عافت

مانزعل لمنهو نسانا عقب ضيق
الناس تنسى علاجها لاتشافت

......

أحيان طيبك يحطك بين فك الأسد
بلاش ياخوك كثر الطيبه الزايدة

خليك موزون لا تطرح جبينك لحد
ولا تزيدها في التعالي تهدم القاعدة

كم غر مفتون في شخصيته يا حمد
يشوفها خمس في عينه وهي واحدة

رجاحة العقل ياابن الناس توزن بلد
وقلة العقل ماشي منها فايدة

......

سبحانه اللي يزرع بذور المحبة فالقلوب
‏واليا عطى عبده قبول الناس جاته مقبلة

‏بعض الآوادم تقبله لو فيه شي من العيوب
‏وبعض الآوادم لو تحااول تقبله ما تقبله

.....

لاتضيع وتغرك الازوال
‏ترى البراويز خداعـه

‏ماكل شارب على رجال
‏ولا كل لحيه على طاعه

......

يا جافي الغصّن لا تبكي على أوراقه
‏بعد البطى خل دمعك لانزل يرقا

‏خلّك مع اللي يحاول يصنع أشواقه
‏يتصنّع إن الهوى في خافقه يرقا

‏العام علمتك إن ما عاد لي طاقه
‏واليّا افترقنا ترى الفرقا هي الفرقى

......

‏يالله توسّع خاطري دامني حي
‏وتجعل هناي وراحتي في صلاتي

‏يارب مابي خاطري يكسره شي
‏ابيك تسعد ما بقى من حياتي

بقلمي