اخترنا لكم

‏لولا الحياء وعاداتنا والتقاليد
وسلومنا وأطباع جدك وجدي

لاقول أحبك وأعترف للأجاويد
ولاهمني من عارض اليوم ردي

وأجيك أنا كلّي بليا مواعيد
تمد لي يمناك وأمد يدي

وتضحك لنا الدنيا ونرجع مواليد
ننسى زمان كان ضدك وضدي

لكني أخاف العتب والمناقيد
ولاضاع فينا العمر معاد يمدي

.....

تغيّرت يمكن بس ماني عديم احساس
لهالحين نفسي مشغلتها مشاعرها

ادوّر ملامح وجهها في وجيه الناس
انا خايف انساها ماني خايف اذكرها

.....

علاجي مَن الجفا في نظرة عيونك
عيونك اللي تداوي علة المرضى

بـجيك لو الليالي وقفت دونـك
ماهو بكيف الليالي يوم ماترضى

.....

لا تنصدم طبع الزمن ما يبالي
أحيان حتى لو تجملت صدك

حتى الرفيق اللي من الناس غالي
عادي يجي له يوم ويصير ضدك

.....

باب الغلا لأجلك محصّن ومقفول
حتى ولو غيرك طرقه وتسوّل

حبّك يحكم القَلب ويصول ويجول
فارض على العشّاق حظر التجوّل

أنا معك عن باقي الناس مشغول
وأحنّ لك وأحتاجك أكثر من أوّل

.....

زلة اللي يود القلب مدموحه
دايم ٍ حبه يغطي عذاريبه

.....

يا حبيبي لا تخاف من السحَايب
لاتروعّك المزون المستهّله

المطر مايعشقه غير الحبايب
وابله لاهّل يبري كل عله

الرعد والبرق خّلان وقرايب
في علاقتهم غرامٍ ما تمت

.....

مادامك تفعل المعروف لاتحزن لامنه ضاع
ترا المعروف مايمحق لاسويته لـوجه الله

.....

‏انضج مراحل فالحياة التغافل
تدري عن الزله وتسكت عن الرد

.....

حنا بسيطين وادنى مايفرّحنا
رشة مطر ممكن تبيّح خوافينا

مع المطر كنها تزهر ملامحنا
وكنه مايسقي عروق النبت يسقينا

.....