ديوان قصائد لشعراء المملكة العربية السعودية (متجدد)☘️☘️

» بدر بن عبد المحسن » صداقة بالنظر

علمتني .. أعقد صداقة بالنظر
مع ساعتي .. قبل اللقا ...
وكيف الثواني ما تمر ..
والشمس .. ما تنوي المغيب ..
علمتني .. إن الحبيب .. دايم حبيب
مهما هجر ..
سيل الظلام ..
يملى الشوارع ليل ..
ولا جيت أنام ..
أرخي الستاير .. عن شعاع ..
عن صوت .. وأقفل بابنا ..
يدخل قمر أحبابنا .. مدري أنا من وين
ساكن قمر أحبابنا .. بين الهدب والعين ..
أرجع أناظر ساعتي .. واللي مضالي من السهر ..
علمتني .. إن الحبيب .. دايم حبيب ..
مهما هجر ..
ياللي عيوني مرايتك ..
وفي كتاب دمعي حكايتك..
ما اظن تنساني أنا ..
وجهي تركته في ساعتك
لا .. تخون وداعتك
تذكرني في ليل .. وفـ سهر .. وفـ حلم
تذكرني في بيت من شعر .. أو اسم ..
علمتني .. إن الحبيب .. دايم حبيب ..
مهما هجر ..

» بدر بن عبد المحسن » الظما عشق

كل ما حث الخطى .. ينبت
الطلح في عيوني
تبني الرمال رمال
كل ما حث الخطى .. يولد
من رحم السراب جبال
أثر الظما عشق
وردت يا بير السما
الشمس دلوي والشعاع حبال
أثر الظما عشق
يا ربعي الخالي
وأثر الأماني جمال
ترعى عشب بالي
والشمس ترس نحاس
وأثر الشعاع نصال
وراعي الهوى خيال
يفكها من الياس
واحث الخطى .. ينبت
الطلح في عيوني
تبني الرمال رمال
يكبر الطلح في عيوني
ويغيب ..
يسيل من تحت القدم
رغم الجفاف .. شعيب
اقطع تجاعيد السهال
بسيف الظلال ..
ويشرق سواد بيوتكم
في ( مرو ) التلال
وغيم الخريف
البرق له وميض .. ورفيف
يشرب الطلح في عيوني
وتسقي الرمال رمال

» بدر بن عبد المحسن » العشره الحلوه

العشره الحلوه .. على الراس والعين ..
أحلى الليالي .. اللي مضت .. لكن مضت ..
ويش رايك في هالحين ..
دايم .. تذكرني .. اللي فات ..
كل الحياة ماضي بعيد ..
باكر تراه .. يومٍ جديد ..
أحلى الليالي .. اللي مضت .. لكن مضت ..
ويش رايك في هالحين ..
بالله .. لا تخلي الوفا .. يصبح صبر ..
لا تختصر .. كل العمر ..
وتعيش امل .. عطني عمر ..
أحلى الليالي .. اللي مضت .. لكن مضت ..
ويش رايك في هالحين ..

» بدر بن عبد المحسن » ظل وطباشير

اشاره .. تعقد الحاجب
نوقف طوابير
الليل في الشارع ..
ظل .. وطباشير ..
ووجيهنا لوح
اشاره .. نعقد الحاجب
توقف نوافير .. النور ..
وتجري نوافير ..
ويدور .. الشريط يدور
وسيارةٍ قبل الأخير
اتعيد نفس الأغنية ..
نفس الأغنية ..
ويمر الوقت ثقيل .. ثقيل ..
على القليل .. من الجلد ..
اعد حبات العرق .. في جبهتي ..
وفي مرايتي .. يصرخ ولد
وينعس كبير ..
وسيارةٍ قبل الأخير ..
اتعيد نفس الأغنية ..
نفس الأغنية ..
يصرخ نفير ..
اشارة تطلق الحاجب
وحبلٍ يلين ..
اطلق يدي .. من الشعور ..
اني سجين ..
اشارةٍ تطلق الحاجب
وتركض نوافير .. النور
آه .. السؤال ..
دربي شمال .. والا يمين ..
شمال .. يمين
انا وين اروح .. وين اروح ..
ظل .. وطباشير ..
ووجيهنا لوح ..

» بدر بن عبد المحسن » العمر أحبك


لليل احبك مابقى في السما نور
والى ضواني الليل .. للصبح أحبك
واللحظة اللي كلها عند وغرور
أشوف قبري بين عينك .. وقلبك
في صدري سراجٍٍ حزينٍٍ .. ومكسور
رغم المطر والريح .. شلته في دربك
والله مابه غير لوعاتي قصور
وخوفي عليك الله ربي وربك
ما بي جهد ابني على صمتك جسور
لا حيرتني أسباب سلمك وحربك
العمر أحبك .. مابقى فيني شعور
والى جفاني العمر .. وشلون أحبك

» بدر بن عبد المحسن » طيف

نامت الشمس .. واستيقظ عناي
حال دون الكرى طيفٍ ضوى
ساعة أقبل نطحته من عماي
وصحت يا سيدي .. طال النوى
أحسب إنك معي ليتك معاي
يوم ضميت بيديني الهوى
يا بعيدٍ عليه انزف دماي
لاقضى الصبر .. ولا الشوق ارتوى
نبتة الدم .. تورق في حشاي
من سببها ترى حالي ذوى
وين أنادي ومين يسمع نداي
صرختي فيك .. وسكوتي سوى

» بدر بن عبد المحسن » ضيعت الدليل

كل ما أقفيت . . ناداني تعال
وكل ما أقبلت عزّم بالرحيل
وكل ما أجنبت واعدني شمال
يا أهل الحب ضيعت الدليل
الحقيقة غدت مثل الخيال
هو عدوّي . . وهو أغلى خليل
شفت أنا الظلم من بعض الدلال
يجرح القلب لو كانه جميل
أشهد إن الهوى ما به عدال
هو خلي . . وأنا قلبي عليل
وكل ما قلت له يا ابن الحلال
المحبة عطا . . وانت بخيل
التفت لي وهو عجل وقال
لذة الحب في الشي القلي

» بدر بن عبد المحسن » على النوى

على النوى علمي .. بهم هجعة الليل
نجل العيون من البكا كحلها سال
واليوم غير الياس.. قل المراسيل
يا من يطمّني عسى ليلهم طال
الله على اللي ما صفط لي غرابيل
لاشك شرع الحب همٍ وغربال
قفّى ولي في حجر عينه تعاليل
تقول يا ذا البعد نجزيك بوصال
وتعلقت روح الليالي المقابيل
و يا عنك ما يامن من الوقت رجّال
لا ما علي لو دمع عيني هماليل
الموت دمع القلب لا صار همّال

» بدر بن عبد المحسن » ظماي انت

ظماي انت .. ومن يعشق ضماه غيري
جروحي انت .. ومن يكره دواه
اسقني لو ما ارتويت .. داوني لو ما شكيت
ماهقيت اني اعطش .. في حياتي لغيرك انت
مادريت ان مابه أغلى منك ..الا انت
ما تصور ان عيني مره تغفى وما اشوفك
ما تصور لو يطول الصمت ما اسمع حروفك
تدري احساسي بخوفي هو أماني
لما تسأل عني ليله عن مكاني
ما تصور كيف تحرقني الثواني
شمعه في ليل انتظارك..!
ياللي يسبقني زماني .. من عطش .. ليلي ونهاري
عطني موعد .. وانسى موعد
بس لا... تهجر وتبعد
يا ظما قلبي لقلبي .. وغربة اعيوني عن عيوني
وينك انت
ياترى الليله في صدري
لا ..
في جفني
لا ..
في الشعور اللي خطفني
اه ... لو تدري بشوقي
آه ... .يا ظما الدنيا بعروقي

» بدر بن عبد المحسن » عاشق هالزمان

لا انت حارس للنجوم .. ولا انت غارس للقمر
وما انت حابس للسموم .. ولا انت حاسس بالمطر
شايلٍٍ هم التراب .. وشايلٍ هم السما
وانت يغويك السراب .. وانت يقتلك الظما
تحمل هموم وهموم
وانت في الآخر بشر
***
لا انت فارس هالرمال .. ولا نوارس هالبحر
أعظم حروبك خيال .. واقصر دروبك سفر
شايلٍ هم الصديق .. وشايلٍ هم العدا
ليه تمشي والطريق .. كل ما خلص .. بدا
وليت به شيٍ يدوم
وانت في الآخر بشر
***
لا انت عاشق هالزمان .. ولا مشانق هالزهر
انت تحتاج الأمان .. لو تعانق لك حجر
شايلٍ هم الغياب .. وشايلٍ هم اللقا
كافي ضيعت الشباب .. لا يضيع اللي بقى
ما لأوهامك لزوم
وانت في الآخر بشر