اخترنا لكم

‏على البال ياللي كل ما مرني طاريك
‏بدت كل تنهيده تمارس هوايتها

‏انا لو ينسيك الزمن ماني بناسيك
‏محبتك قصّة ما اقدر اكتب نهايتها

‏لو الوقت يرجع قبل اعرفك وقبل اجيك
‏وقبل الهقاوي تنثني دون غايتها

‏بأروح انتظر فأول مكان ٍ جمعني فيك
‏وبأعيد تجربتي معك من بدايتها

.....

‏خل ابو نوره يغني لو يزيد احزاني
‏البشر ماعاد تفهمني وانا مافهمها

‏مذهبات الروح شوق وحنجرة جيزاني
‏ومذهبات العقل خمر وحبةٍ من فمها

.....

‏الديره اليا صفا لك حب من فيـها
‏راحـت بعينك مثـل باريس وفـيـنّا

‏صحيح حب الدّير من حب اهاليها
‏والّا المـنـازل حـديـد وطـوبٍ يـبـنّا

.....

‏افخر بصمتي عن كلام المهابيل
‏اذا افــتـخـر فـي زلّـتّه كـل جاهل

‏انا سكوتي عن هل القال والقيل
‏يـدرّس الجـهّال فن التجاهل

.....

‏والله اني حافظك يالغالي بقلبي وعيني
‏حافظك وادرى عليك وكلني لك وانت غالي

‏راهنٍ روحي بمرضاتك وماتملك يديني
‏ياحسين الوصف يازين الطبايع والخصالي

.....

ياصباح الخير يالعود المسقى
‏في بساتينه على الفلجان راوي

‏ارتوى بالزين ما خلا وبقى
‏قلبي المغرم عنه ماهو بقاوي

‏من تعلق في غرامه ما تشقى
‏اشهد انه طب للقلب الهواوي

.....

‏لك فالدلع عـاده ولك فالحلا ذوق
وانت الاميـــــر وكلهـــم لك حراسه

تسلم لقلبي يا هواء الحب والشوق
يا مالكــه فـي الروح كامــل حواسه

اصبحت بك شاعر وهايم ومعشوق
واصبحـــت لي عالم بربعـه وناسه

مايشبهك في العين والروح مخلوق
ياللي اخذتــي خافقــي من اساسه

.....

‏يا صاحبي وش بك علينا تغيرت
حتى الرسايل من طرفكم قليله

مدري الزمن قساك ولا تكبرت
ولا الزمن نساك ذكرى جميله

.....

تمخطر بخصرٍ ما يحتاج تشبيه
من كثر ما هو مفرطٍ في الليانه

في خطوةٍ وحده تعدله و تثنيه
كنك بيدينك تثني الخيزرانه

.....

معك ربّيت المحبة على قد الطموح
والنصيب يحدها والجفى يوميلها

اثري الغيبه حقيقة وأنا احسبها مزوح
قامت الدنيا علينا وشدّت حيلها

ياحبيبي انشد الوقت والحظ الشحوح
من جدار البال صورتك كيف أشيلها

.....