فوق هام السحب ( الشعر الشعبي) على متن القوافي

‏عود بي لاحضنــك الدافــي فديتك
عود بي قــد هدنـــي كثــر الغياب

عود بي ياحــب انامن شوق جيتك
عود بي مافايـــده جــــور العتاب

ياحبيب الروح اقســـم ما نسيتك
في غيابـــك صــارت آمالي سراب

ضاق بي حظي مـن اول ماجفيتك
والغياب احـرق عيونــي والهداب


......

‏علاقتـــــــي بالناس مثــــــل الاخوه
محال افرق بين الاخـوه والاصحاب

طبعي اذا صاحبـــت اصاحـب بقوه
وانصح في الصحبه ولاهُم الاتعاب

واقــدر الصاحــــــب وقــدر سموه
وارفع مكانه واحفظه بين الاهداب

واصارحــــــه في حضرته او غّدوه
ولا اذُمــــه فــي غيابـه ولا اغتاب

......

أحنه من الدنيا و أحبه نقا و أغليه
‏وهو بالغلا عندي يجي بعد شيباني

‏واداريه حتى من النسانيس لا توذيه
‏واخصه بدعواتي لاصليت وانساني

‏له عهود قلبي تالي الوقت وماضيه
‏ما ابدل مكانه لو يقفي ويجفاني

‏بعوّد على العزله واردد قصيدي فيه
‏وهو لو قسى وقته بيرجع ويلقاني

......

‏اضحك ومن شاف الضحك قال مرتاح
وامرح ومن شاف المرح قال سالي

مايدري انـي ضحكتي ضحكت اجراح
ومايدري ان المزح من ضيق حالي

يااهل العيـون الحاسده وضعنا طاح
ماعاد بقــــي للراحـه ايت مجالي

الوضع حطــم داخلــــي كل الافراح
والياس حطــم داخلـــي مابقالي


......

‏تعال قبل الوّرد يذبل والسهر عينه تنام
قبل تجف الـ مرحبا وتموت بلسانيَ هلا

ترىّ عزيز النفس لامن عاف عاف بلا كلام
والله لو أنه وطن ماعاد له حبَ وولا

ماينتهيّ كثر الغلا إلا بقل الأهتمام
وإن جيتني بعدين مالك لا حضوَر ولا غلا

......

‏صبحتني بالخيـــــر ياعــــز الاحباب
منك صباح الخيــــر يسعد صباحي

ياللي بصباحــك تنفتح كل الابواب
ومعاك احـــس براحتـي وارتياحي

بأنوارك الضيـه لها خاطــري طاب
اسعدتني ياابو العـيون الصحاحي

شوفتك تجلي داخلي كـل الاتعاب
في صبح يومــي يامليح الملاحي


......

‏المعـذره يا اصحابــي الحال منهار
والنفـس منزعجـه من الكون كله

محتاج اتباعد على شـوف الانظار
ومحتاج لي يانـاس وحـده وعزله

مالي بخاطر احكي اللي معي صار
ولا القلب يبغا يشرح اللي حصله

كل الذي في داخلي كومـة اسرار
وسكـوت يحمـل داخله كل عله



......

‏يا حب لك عنـــدي محبــه وميثاق
حالـــف بربــي متركــك لو دقيقه

صـــرنا انا وانتـه حبايــب وعشاق
والصعب حد يقدر يفارق عشيقه

ياساكن اعماقي لك القلب مشتاق
والشــوق لك فينـي مولع حريقه

كامل حواسي ترتجتي ضمةاعناق
وروحي تمنـى ضمتــك لو دقيقه



......

‏أنشـر لك احساســــي على شان تقراه
ماهو عشان تسوي اعجاب👍🏻 وتروح

حبيت تعـرف ماحـوى القلب واخفاه
وتفهم فديتــك ماقصدته فـي البوح

لك فـي خفوقـي حُـب ياحب مقواه
ولك عشق فينـي ساكن الروح ياروح

ولك في صميمــي ود ما اقدر انساه
ولك شوق دايم مسكنةداخل الروح

......

‏سويـت لك من داخـل القلب فنجال
بنـــه أحاسيســي و هيلـه طموحـي

الهيـــل انا اهـــواك في كل الأحوال
والبـن أحبــك يابـعـد روح روحـــي

هذا شعـوري لك على شكل الامثال
ترجمتهـا لك في حروفـي وبوحــي

بإحساس مغـرم داخله عشق قتال
وشوق يسكن يا الغلا وسـط روحي

......