فوق هام السحب ( الشعر الشعبي) على متن القوافي

لا واللـذي اغــلاك في قلب مغليك
واللي جـمـع بالحـب بـيني وبـيـنك

أنا عـلى عـهدك اصـونك واراعـيـك
وترخص مـداين كلـها لاجـل عـينك

ولاهب نسناس الهواء جاب طاريك
والشـوق لا ذعــذع يحاكي حنـينك

......

وشلون مدري كيف روحين في روح
ماكنـت اصـدق بانـدمـاجك يالارواح

معقول احد يمشي معي وين ماأروح
ومعـقول انا امـشي مـعه وين ماراح

......

لا تشتكي همك على ساير الناس
ماكل من تـشـكيلـه الــهـم يــمــك

مهما تسوي خير ياطيب الســاس
الناس احد يمدحك واحـــدٍ يذمــك

......

فزت الاشواق واحتار الكلام
وابتدى يوم من العمر محسوب

دقت الساعه وله شوق وغرام
ساعتي اثنى عشر بعد الغروب

ابتدت تركض ثوانيها حرام
كل شمعه من بعد شمعه تذوب

القمر نوره فضح ستر الظلام
ما ترك له من بقايا الليل ثوب

......

اغراك صمتي واصدق الصمت كذاب
للصمت وجهٍ مـايعكس الـحقـيـقه

موحش سـراديـب الحكي دونها بـاب
عيـت مقـاضـيب الضمـاير تطـيـقـه

بعض الجمل إعرابهـا مالهـا إعـراب !
وبعض الـنـفوس ثقال لوهي رقـيـقـه

الـسـهل تـبـرير المواقف بـالاسباب
الـصـعب إطفاء اللهب بـالـحريـقـه

......

في طريقك تحريت المواعيد
من يقول الهوى مابه كلافه ؟

كم لشوقي وانا انادي واعيد
انت عفت الوعد .. ولا تخافه ؟

لا تلحق عتب عيني مناقيد
ولا تلحق ندم قلبي حسافه

حس بي .. منت عن تنهيدي بعيد
من متى وانت تحسب هالمسافه ؟

من بعادك امتلى صوتي تجاعيد
وزاد قلبي من الفرقا نحافه

......

طاريك تالي الليل ما يخلف عهود
يحتل فكري بين ضحكــه وبسمه

يهز قلــــبي هــــــزة الريح للعود
لا هبــني من ريحة الشوق نسمه

جنة قصيــدي ببسمته تقتّح ورود
والشـعر يسهل تالي الليل نظمه

ما يمر شــعري غير يثبت له اوجود
لن مر يترك فــي يد القاف وشمه

......

‏بعض البشر لا غاب عن ناظر العين
احـس كل الناس في الكـون راحت

وبعض البشر لوغاب ايام واسنين
مااشتاق له قلبي ولاالنفس ناحت

انا اشهد ان البعض ماله شبيهين
بافعاله اللي مثلما الطيب فاحت

غالي وحُبـــه حــل بين الشرايين
ومكانته وسط القلوب استباحت

......

‏كل مافكرت بالوقت القديم
والقلوب الطيبه وأهل الوفا

قلت يارب الخلايق ياكريم
أعف عنهم ياعليمٍ بالخفا

وأجعل الجنه لهم دارٍ مُقيم
يامحل الخير وأعظم من عفا

يسألونك وأنت غفار ٍرحيم
أعطهم جنه وقرب المصطفى


......

موج الغلا في داخلي حرك الشوق
وقلبـي تحـرك من يسـاره ليمـينـه

ليت الـغـلا بالكون انسان مخلـوق
في كل لحظة كـنت اقـبل جـبـيـنه

انت الهوا والشوق يا كامل الذوق
وانـت الغـلا ياروح روحـي بعيـنه

غـلاك فـي دمـي بيجـري بالعروق
لو غـاب طيـفه زاد قلـبي حنـيــنه

......