فوق هام السحب ( الشعر الشعبي) على متن القوافي

‏حتى لو إن النفس بالعزله تهيم
‏كم واحدٍ مجروح لكن ماشكى
‏
‏لا تقنع بجملة ترا قلبي سليم
‏القلب ماله صوت لا منّه بكى

......

أطيح وأقوم وأرجع اوّقف لحالي
والعون من عند ربي جل تقديره

ويالله ياللي عليم بضيقة أحوالي
أنا بوجهك من الحاضر وتدميره

يالله لا تحوجني لطلب الأنذالي
اللي على لازمي تكثر معاذيره

اما تجي مثل ماودي ويحلالي
ولا عساها تروح وجعلها خيره

......

‏اللي يـحـاول يـسـتـفـزك بالكلام
‏ضحّك عليه الناس لاتضحك معه

‏وإن قال هذي من ميانه واحترام
‏قل اذكر الله واسمع العلم اسمعه

‏بعض العلوم اخف من ريش النعام
‏لا فرّقت شمل ولا هيب مجمّعه

......

الناس مثل البن والوقت محماس
‏ومن تحتهم نار السنين العجافي

‏نوع ليا ذقته يكييف لك الراس
‏ونوع عسى ربي يديم العوافي

......

‏محبتك بس من مده إلى مده
والوصل دايم على كيفك ومشهاتك

دامك نويت الجفى والبعد والصده
مافيه داعي تراجع عن قرارتك

وان كان جو الملل حدك على الرده
ما الله خلقني عشان املى فراغاتك

......

كل ما شانت وجيه الناس وسّع صدرك
‏لا تحسب إن في يدين الناس نار وجنّه

‏القريّب لا تكدّر خاطره وإستدرك
‏سامحه وإن جيته بزلّه تسامح منه

‏ولا تعلّق خافقك باللي ما يحفظ قدرك
‏كثر ما تقدر توخّر عنْه وخّر عنّه

......

ما يموت الود لا مات الكلام
لك مكان و ذكريات ولك شعور

ما انت عابر في حياتي والسلام
انت حتى في غيابك لك حضور

......

الله خلقنا ألوان وأوزان وأشكال
‏مثل المعادن لكن نفوس وعقول

‏اللي يشيل بعينه الناس ينشال
‏واللي عيونه تجهل الناس مجهول

......

اضحك ترى عوج الليالي مدابير
وما للخلايق في قضا الرب حيله

ترى الشـدايد قافيـتها التياسير
يالــلي تـشيل الــهم ربك يزيله

......

لا تلوم الحظ يوم الحظ خانك
الحظوظ أرزاق مافيها زعـل

خلها دايم على طرف لسانك
قــدر الله مـا شـاء فــعـل

.....