فوق هام السحب ( الشعر الشعبي) على متن القوافي

مانيب قايل على خيبتك تستاهل
ولاني مداري مشاعرك ومخدرها

اقول يمكن فهمت الدرس ياجاهل
كبّرت هقوتك في اللي مايقـدرها


عبدالله الطلحي

لا تهقــوى وأنت تـوك فالبدايه
بالمسـافه تفرق الخيل الأصيله

الوعـــد لا قربن خــــط النهايه
لرتخا عزم الكديش و مات حيله

ولو تسمــي ما تجملك السمايه
الضعيف ضعيف لو يكثر حصيله

حط وجهك قــــدم برواز المرايه
وشف عيوبك والفتى نفسه دليله


جري بن عبيد

‏من أول الصحه و انـا نـطرد المال
طرد السراب الي تــسوقه عوالي

واليوم أناوالمال نطرد ورى الحال
الـي تناحت صــحته مـ الـزوالـي

دنيـاك هـذي بيـن راحـل و نزّال
ولا بـد من بـعد النّـزول ارتـحالي


عبدالله الشلوي

علم اللي يجهل الطيب لا يفتح فمه
لا يحسب إن المراجل كلامً يسرده

حي راسً ماأرتخا بالشدايد محزمه
ومن نصاه بعسر الأيام يبشر بسعده

مع مسار الطيب ثابت ولازل قدمه
وارثً طيبه وربى على الطيب ولده

نعرف أن الطيب يستاهله من قدمه
ومن زرع حب الردا مجبر إنة يحصده


جري بن عبيد

لا تواضع للوضيع يضيع قدرك

مأنت مجبورٍ على بعض التواضع

مساعد الرشيدي

اكبر مشاريه العـرب بين قوسيـن
يشتالـها اللي مايعـرف النصيحـه

خبلٍ لسانـه فالسواليـف شبريـن
واكبـر منـه مقـدار راس الذبيحـه

إن كان مالك فالجماعـه محبيــن
راسٍ بدون متون ماسّرع مطيحـه

وأن كان مانت فاللوازم حمر عيـن
تبـا تمــوت ولاكسبـت المديحـه


لاحق العضياني

الهقاوي فالعرب تبغى شطارة
لاتقول ان السّمي يشبه سميّه

فيه ملحً في محلات التجارة
وفيه ملحً في رصاص البندقية


......

إلا ليت حظـي ماعطانـي مقفاه
ياليت لي حظن مع الناس يغني

حدتني الليالي لين وصل الصبر اقصاه
ولا به رفيقََ مـن همومي ‎يسليني


......

ترا كثر الحكي يرتبط مع قل الافعال
متى ما كثر حكي الرجل قلت فعوله

والى منك بغيت تعرف لك طبع رجال
شف اللي يفعله خل عنك اللي يقوله


محمد المقحم

لا عاد تتوجد على فايتٍ فات
الفايت اقفى لا تحرى رجوعه

دنياك لو فيها جميع الملذات
عشيقها لابد يذرف دموعـه

واخير ما فيها صيام وصلوات
ونفسٍ بما ربي عطاها قنوعة


......