اخترنا لكم

يامدمنين الخيانه والجفاء والحبوب
رغم ختلاف القضايا كلهم مدمنين

وياقاتلين المحبه وقاتلين القلوب
رغم ختلاف القضايا كلهم قاتلين

.....

يكفيني رحلت ولا حصل مني خطا وقصور
‏وانا حتى وداعي فيه بصمه تثبت اخلاقي

‏تخير فالديار اللي يغشيها ظلام ونور
‏وفرق النور بالظلمه يبين غلطة فراقي

‏تمرك ليلة تطغى مشاعرها على المغرور
‏تدور فالبشر مثلي ولكن صعبه تلاقي

‏فمان الله يا اخر محطه والسنين تدور
‏فمان الله والهقوه تخيب هقوة الهاقي

.....

صحيح ما جتنا الليالي على الكيف
مرة يجن ثقال ومرة خفافي

والحال ما يحتاج نشده وتوصيف
ما كل يوم ينحسب لي عوافي

ظروفنا تشبه سحابٍ من الصيف
بعد المطر تعب صلف السوافي

وإليا نشدنا من يحب السواليف
قلنا بخير ولا لحقنا خلافي

.....

مادام ترقد ليلتك ومتعافي
وغيرك لذيذ النوم ماطب عينه

خذلك نصيحة ود من قلب صافي
استغفر الله واشكره واستعينه

صحيح

عسى مقبل الأيام كله فرح و سرور
‏وعسى ماضي الأيام مغفور من ربي

آمين

انا يا بحر يوم أصد واخفي دمعتي معذور
لك الله يابحر صديت والصدة هي الصدة

اخاف تقول عني يابحر ضيدان بن منصور
وقف في يوم من الأيام ودموعه على خده

وانا ماني بحي الله بشر يكشف لك المستور
أنا رجلٌ يموت ولا درت الأمواج عن سده

.....

الغياب ان طيّح دموعي ماطيّح قدري
راح أذوق مْن الشعور المر لين أتعوّد

وليه أفكر فيك من بعد المفارق وأدري
مستحيل اني أجيك ومستحيل تعوّد

.....

ما تنفع الحبه على جباه الأموات
لا أقفى المقفّي من يرد المقفّي

حضورك الغايب بعد فايتً فات
حبّة عذر على جبين متوفّي

.....

من خلقنّا الله وحنا عزيزين نفوس
مانوطي شمّخ الراس غير لربها

ماردينا والليالي لها وجهٍ عبوس
خل يوم إن الليالي سميحٍ دربها

.....

العدود من القـراح الـعـذب ملي
والقلـوب مدربه وصـل وقطـاعه

علم اللي ماستفاق وعـلـم اللـي
متعبن نفسه علـى قـلـة سناعـه

ان بغاوها باللي احسن جيت كلي
وان بغاوها بـاللكاعه بـاللكاعه