اخترنا لكم

‏لو يردّك دمع سيّلنا لك بحر
‏ ولو يردك صوت صرنا لك رعود

‏يرحمك ربي عدد قطر المطر
‏وعدد حبات الصحاري والنفود

‏وعدد ماكبر على القبله بشر
‏وعدد ركعات المصلي والسجود

آمين

عرفت إن القدر فرصه سعيده والحياه أعراف
‏لو إن الشوق من كثر البعاد المُرّ يصلينا
‏
‏أزورك حلم من خلف الحقيقه والشعور لحاف
‏ما دام إن الوله واقف على سكة هقاوينا

.....

‏ياعميقه في زمان الفارغين
‏أنتي وحده صح في عالم غلط

.....

‏من الماضي وانا وياك للمستقبل المجهول
‏اعالج كل جرحً وسط قلبك ناقلً همه

‏مع ان قلبي غدا كنه جسد سيف الله المسلول
‏ماتلقى موضع الا فيه جرحً نازفً دمه

.....

‏مابين غفلات الضميّر وبين لحظات الجنون
‏رجعت أعدل غلطتي لو أنها ب لحالها

‏والله معاد أطرد ورى ذيك الهقاوي والظنون
‏الى متى والنفس تطرد بطيشها وهبالها

‏الناس والدنيا ودورات الليالي من تكون
‏ماطيّبت فالي عشان اقوم اطيّب فالها

.....

فمان الله والعذر السمين أبلغ من التبرير
‏عفى الله عن خطايا اللي خطايانا على شانه
‏
‏فمان الله يالغصن اللّيان اللي هَجرك الطير
‏هذا طيرك يبلغك السلام بروس جنحانه

‏سمحت من المحبه وانت سامحني على التقصير
‏وصلنا آخر حدود العشره اللي مالها خانه

.....

‏على الهون يازهرة شبابي وتو الناس
‏علام العمر يمضي والافراح منسرقه

‏تلّج الطواري كل ماذعذع النسناس
‏على واحدٍ بين العرب واضحٍ فرقه

‏شعور المسافة بين حبل الرجا والياس
‏شعور المسافر كل ما طالت الطرقه

.....

‏ما ذبحنا الا الحيا والثقل طول السنين
‏لين راحت كل الاحلام مرواح القطاه

‏يا وجودي ليت قلبي مثل عقلي رزين
‏ اعذروا قلباً من الوقت جاه اللي كفاه

‏فيه من شر المخاليق سحر وحسد عين
‏وفيه من شيمة ذوي عون مايجبر عزاه

‏المهم اني لهالحين يجذبني حنين
‏ للسنين الاوله يوم للدنيا طراه

.....

‏ياغريبه ويش أسوي وانا شاعر حزين
‏يوم شافك قال قلبه لقلبك ياهلا

‏والله انه مايزين قصيد المبدعين
‏غير وجه ياخذ العقل وينقط حلا

.....

‏وانتي يا ملفى الشعر والملح والقبله
‏اعاتب الحور ولا المبسم الصافي

‏آمال ليلى وقيس وعنتر وعبله
‏راحت مثل ريش طيرٍ في طرف سافي

‏ما دام ما فيه لا مشلح ولا دبله
‏سمحت واللي مضى من طيشنا كافي

‏نحرك ساحة حرم وشفاهك القبله
‏لكنّي آثرت دين آبائي واسلافي

.....