فوق هام السحب ( الشعر الشعبي) على متن القوافي

كرامة الرجل وجه ابيض وعرضٍ نزيه
والسمعه الطيبه ماهي بـ عقد اشتراك

عن طلبة التاجراللي حاجتك في يديه
رح اطلب الواحد المعطي وتلقا عطاك

لا تجعل اسمك بشاره في لسان السفيه
ترا المعزه تجاره .والضعافه هلاك

يحاربون الحيا اللي يعبدون الوجيه
يالله لك الحمد يوم انّا مانعبد سواك


ابن خشمان

ياراسي لاحدتك الصواديف سج وغن
مصير الظروف تشين وتزين وتغني

اعرف صاحبك قدام تعرف عدوك من
والحقني ملام ان شفت كثر العتب مني

ترا الموقف الغصاب رؤيه ونبذه عن
وجيه الرجال اللي خذو نبذه عني

اقول المشاكل من ورا سيئين الظن
ولقيت المشاكل كلها من حسن ظني


عبدالله بن خشمان

يانفسي ترا الدنيا عقايب وهجمة خيل
من المغريات ولذة المعصيه توبي

انا والهموم الجايحه بين حط وشيل
الد النظر عنها وهي تلفت صوبي

افكار البنادم عند نفسه ضعيفة حيل
ياساتر عيوب المسلمين استر عيوبي

ترا اللي قدر يغسل بطون الثرا بـ السيل
هو القادر من المعصيه يغسل ذنوبي


عبدالله بن خشمان

مايهتني بالنوم قلب النداوي
تومي به الدنيا على كل مرقاب

لو هو على الاقراب عدٍ رهاوي
ما يامن الايام من قرصة الداب

ولا هو على الدنيا كثير الهقاوي
ان ما حدَاه القوم حدوه الاقراب


صهيب السلمي

‎

‏لا تعجّل خذ الدنيا على مهلك
كان تبغى مع الايام تتعلم

ماتجيك المشاكل غير من جهلك
من تعلم عرف وشلون يتكلم

لاتجـاوب سـؤالٍ ماتوجه لك
ولاتعاتب غريبٍ مر ماسلّم

خل شرهتك وميانتك عند اهلك
عند الاغـراب لاتشره وتتظلم


عبدالله الطلحي

حطّيت لك عندي مكانـه وقيمه
وعلى جميع الناس دايم مبدّيك

وجازيتـني بعد الخطـا بالضليمه
لكن عسى ربي على الحق يهديك

مضـرّة الاجواد ماهي غنيمه
ترجع عليك ان قاله الله وتعميك

ان طعتني خـل النوايا سليمه
من قبل لاتندم وتصفق بأياديك


الصريح

‎

الزمن يدرج رحاه ودورته مقلوبه
ابتلش به عاقل العقال ممّا شافه

والسبايب عالمٍ من جهلها منكوبه
سالفتهم وش دخل بالبنك والصرّافه

مادروا ان الحساب اللّي وراه عقوبه
مايساوي وزن عود الرّاك والاّ السّافه


محسن المداريه

‎

دورات الايام يـومً لك ويـومً عليك
ماهيب دايـم سعة خاطـر ووجـهٍ رضِي

اوداعتك لاقضى صبرك وخليت يديك
وبيح سدودك امحاضى لازمً ماقِضِي

لاتشكي ضروفك وتبدي خفى مالديك
الا على مشوربٍ بـ نصاف مثلك حَظِي

ترى الشكاوي على الي مايحسون فيك
مثل الـصـلاة الي تصلـى بليا وضِي


سلطان بن الشايب

لايغرك الظاهر من النقص والزود
وجه الرضا تبين فيه العباده

لاتنخدع في حسن منطق ومردود
متسلّقين المرجله في زياده

حتى البخيل يسولف بمدة الجود
وهو بخيل اخلاق من قبل زاده

عز الله ان بعض الجمر يظلم العود
العود كمبودي وجمره رماده


بن كحله

‎

حنا ضيوف الارض والكل عابر
كم غاليً عقب المواصل فقدناه

رحلة قصيرة و النهايه مقابر
فيها مصير الادمي والمجازاه

يشقى بها اللي بالمعاصي يكابر
ويسعد بها من طاب دينه ودنياه

وياالله عفوك وانت للكسر جابر
يوم الحشر والناس حافين وعراه


رجا عوض العازمي